1 Jwon 1 - Findel i DeeƁwe Ti Alis i Ron

Findel i Mupwet

¹ Ni ma laksu mangga' i maɗufal ima mana tasi bya', ima ni hali, ni ɗingi, ni ɗingus ti shishat aminin, ni ngge'us ti ra aminin. Ayisyi ni laksu ti nyai a yis mii Findel i mupwet.

² Mupweti pwak ya, ni ɗingus, ayisyi ni ma laki. Ni laksu mupwet i myan hu myan, ima ma akul hu DeeƁwe Demukan ayis pwak nin hai.

³ Ni laksu aɗeng ima ni ɗingi hu aɗeng ima ni hali, ɓurti hun hwak hu fut hai hu nin. Fut ti hai amukan ma akul hu Demukan hu Al ames, Yeso Kristi.

⁴ Ni worong mai ɓa jakak amukan u hya nggya-nggya.

Mute Naya si Kweneng Hai

⁵ Muro mai ii ma ni hali ta kyel i Al ames ni laksu gbak-gbak nyai, DeeƁwe a kweneng, maɓing mata wii yusti kwa fweng.

⁶ Ɓurti andi na ka ni ka fut hai hu DeeƁwe ɗak ka kan ɗa'at ta maɓing wi, kof ka ma mute i fyarat ndai, ka hon koltifai ti mwawei.

⁷ Na kan ɗa'at ta kweneng wi, fota ngga' ima yis mata kweneng wi, ka fut hai hu ɗiyai ndai, wash i Yeso Al ames sapa kan ya ta mafwashani wi shak.

⁸ Na ka ni ka ti mafwashi kwa, ka dang ti hai sikan, mwawei ti na wii kan ti kwa.

⁹ Na ka lak mafwashani amukan ya, ma wa shwai sikan ni ya, u sapa kan ya ta si mafwashi shak, ɓurti yis a ma hyati findel ames hu makarti mwawei.

¹⁰ Na ka ni ka mas mafwashi kwa, ka hatus ii ma fyarat, findel ames mati kyel i mute na wii amukan kwa.