Psalmowo 130 - Agbenya La

Psalmo 130

Mɔzɔha.

¹ O! Yehowa, mele koko ƒom na wò tso nye dzi me ke.

² O! Aƒetɔ, ɖo to nye gbe. Wò to nenɔ te nàse nye nublanuiɣli.

³ O! Yehowa, ne àlé amewo ƒe nu vɔ̃wo ɖe agbalẽ me ada ɖi la, O! Aƒetɔ, ame ka ate ŋu anɔ te?

⁴ Ke wò la, tsɔtsɔke le gbɔwò, eya ta wovɔ̃a wò ɖo.

⁵ Mele Yehowa ƒe asinu kpɔm, nye luʋɔ le lalam, eye metsɔ nye mɔkpɔkpɔ da ɖe eƒe nya dzi.

⁶ Nye luʋɔ le lalam na Aƒetɔ la wu ale si zãɖialawo kpɔa mɔ na ŋu ƒe keke; mebe wu ale si zãɖialawo kpɔa mɔ na ŋu ƒe keke.

⁷ O! Israel, tsɔ wò mɔkpɔkpɔ da ɖe Yehowa dzi, elabena lɔlɔ̃ matrɔ le Yehowa si, eye ɖeɖe blibo le eya amea gbɔ.

⁸ Eya ŋutɔ aɖe Israel tso eƒe nu vɔ̃wo katã me.