Psalmowo 124 - Agbenya La

Psalmo 124

David ƒe mɔzɔha.

¹ Ne menye Yehowae le mía dzi o la, Israel negblɔ be,

² “Ɖe menye Yehowae le mía dzi o la, esi amegbetɔwo tso ɖe mía ŋu,

³ eye woƒe dɔmedzoe bi ɖe mía ŋu la, anye ne womi mí agbagbee,

⁴ anye ne tsi ɖe mí hesi to mía dzi,

⁵ anye ne tɔ dzeagbowo kplɔ mí dzoe.”

⁶ Woakafu Yehowa, ame si meɖe mɔ be woavuvu mí kple woƒe aɖu o.

⁷ Míesi abe xevi si do le mɔtrela ƒe mɔka me la ene; mɔka la tso, eye míesi dzo.

⁸ Míaƒe xɔname le Yehowa, dziƒo kple anyigba Wɔla la gbɔ.