Yuhana 9 - Alla la Kitabu Seniman

Isa ka ɲa fuyen do ɲa laka

¹ Nba, Isa tamintɔla, a ka cɛɛ do yen a ɲa fuyen de sɔrɔnda.

² A la karandenilu ka a maɲininka ko: «Rabi, ni ɲin na sɔrɔnbailu ka hakɛ kɛ wala ni ale jɛrɛ le ka julumun kɛ, a ɲa fuyen sɔrɔnni wa?»

³ Isa ka a jabi: «Ɲin ma sɔrɔn ka bɛn a jɛrɛ la hakɛ ma wala a la mɔɔbailu la julumun ma. A ɲa fuyen le sɔrɔnda, sa Alla la sebaya ri yiraka mɔɔilu la ale fɛ.

⁴ Ni a kɛla tele ri, an ka kan ka baara kɛ a yɛ mɛn ka n kelaya. Su ra sudunya. A wa ko: mɔɔ si ti se baarala.

⁵ Ka n to dunuɲa rɔ, n ye dunuɲa kɛnɛbɔlan de ri.»

⁶ A banni kuma wo la, Isa ka daji labɔ duu ma ka bɔɔ lamun wo la, ka bɔɔ wo ta ka a sisa ɲa fuyen ɲa la.

⁷ A ka a fɔ ko: «Wa i ko Silowe jilamaradiya ji la.» Silowe kɔrɔ ye le ko «kela». Ɲa fuyen wo ka a wa a ko ji wo la tuma mɛn na, a nara a ɲa yenna!

⁸ A siiɲɔɔ ni mɛnilu ka a yen taralila kɔrɔman na woilu ka a maɲininka ko: «Cɛɛ ɲin de siini tɛ taralila kanma kɔrɔman na wa?»

⁹ Doilu ka a fɔ ko: «Ale le.» Dogbɛrɛ ka a fɔ ko: «Ale tɛ, kɔni imunuɲani.» Cɛɛ ka a fɔ ko: «Nde le jɔ!»

¹⁰ Ii ka a maɲininka ko: «I ɲa lakara di?»

¹¹ A ka ii jabi: «Cɛɛ mɛn tɔɔ ko Isa ka bɔɔ kɛ ka wo sisa n ɲa la ka a fɔ ko: ‹Wa Silowe ka i ko.› N wara. N banni n kola, n ka yenni kɛ.»

¹² Ii ka a maɲininka ko: «Cɛɛ wo ye mi?» A ka a jabi: «N ma a lɔn.»

Farisilu ka cɛɛ ɲa lakani fɛsɛfɛsɛ

¹³ Ii ka cɛɛ ɲa lakani wo lana Farisilu ma.

¹⁴ Awa Isa ka bɔɔ sisa a ɲakɔrɔ da la lon mɛn na a ɲa lakara wo lon de, Ɲɔɲɔ lon de tɛrɛ.

¹⁵ Wo le rɔ Farisilu ka cɛɛ maɲininka ko mɛn taminni ko a ye yenni kɛla sisen. A ka a fɔ ii yɛ ko: «A ka bɔɔ le sisa n ɲa la, n ka n ko: wo rɔ n ka yenni kɛ.»

¹⁶ Farisi doilu ka a fɔ ko: «Mɛn ka wo kɛ a ma bɔ Alla rɔ, baa a ti Ɲɔɲɔ lon sariya bonyala.» Kɔni, doilu ka a fɔ ko: «Kojuukɛlailu ri se ko makabani su ɲin kɛla di?» Ii talara.

¹⁷ Farisilu ka ɲa fuyen mɛn ɲa lakani maɲininka fanan ko: «I ri se nfen fɔla i dandanninna la ko rɔ, ka a masɔrɔn a ka i ɲa laka?» A ka ii jabi: «Nabiɲuma le.»

¹⁸ Yahudiyailu tɛrɛ ma sɔn lala a la ko a ɲa fuyen le tɛrɛ, a ni a ɲa ra a laka, sani ii ka a la sɔrɔnbailu kili.

¹⁹ Ii ka ii maɲininka ko: «Ai dencɛ le wa, ai kan mɛn ma ko a ɲa fuyen de sɔrɔnda? Nfen de taminni wa a ye yenni kɛla sisen?»

²⁰ A sɔrɔnbailu ka ii jabi: «An ka a lɔn ko an dencɛ ye. A ɲa fuyen le sɔrɔnda.

²¹ Kɔni an ma a lɔn fewu ko mɛn taminni ko mɛn a ye yenni kɛla sisen. An ma a lɔn fanan fewu mɛn ka a ɲa laka. A ye a maɲininka, a ra bonya ka kɛ mɔɔ ri, a ri se a jabila a jɛrɛ yɛ!»

²² Cɛɛ sɔrɔnbailu ka jabila kɛ ten, ka a masɔrɔn ii silanni Yahudiyailu la ɲɛmɔɔilu yɛ. Baa woilu tun da bɛn a ma ko ni mɔɔ mɔɔ ka a lɔ a la ko Isa le ye Ɲenematɔmɔnin de ri, ko ii ri wo tii gbɛn ii la salibon na.

²³ Wo le rɔ a sɔrɔnbailu ka a fɔ ko: «A ye a maɲininka, a ra bonya ka kɛ mɔɔ ri.»

²⁴ Farisilu ka cɛɛ wo kili kokura, mɛn tɛrɛ ye ɲa fuyen di, ka fɔ a yɛ ko: «I ye i kali Alla ɲakɔrɔ ko i ri tuɲa fɔ. An ka a lɔn ko cɛɛ wo ye kojuu kɛla le ri.»

²⁵ A ka ii jabi: «N ma a lɔn ni julumuntɔ le walama Kojuukɛla tɛ, kɔni n ye ko kelen lɔnna kɔrɔ, n ɲa fuyen de tɛrɛ kɔni n ye yenni kɛla sisen.»

²⁶ Ii ka a maɲininka ko: «A ka nfen de kɛ i la? A ka i ɲa laka di?»

²⁷ A ka ii jabi: «N tɛrɛ ra a fɔ ai yɛ fɔlɔ, kɔni ai ma a lamɛn. Nfenna ai ye a fɛ ka a lamɛn kokura? Ai fanan ye a fɛ ka a kɛ a la karandenilu le ri wa?»

²⁸ Ii ka a manani ka a fɔ a yɛ ko: «Ile le a karanden di. Ande le Musa la karanden de ri.

²⁹ Ande ka a lɔn ko Alla kumara Nabi Musa yɛ, kɔni ɲin, an ma a lɔn a ye bɔla yɔrɔ mɛn dɔ.»

³⁰ Cɛɛ ka ii jabi: «Hen! Ko makabani ba le ɲin di. Ai ma a lɔn a ye bɔla yɔrɔ mɛn dɔ, kɔni a ra n ɲa laka!

³¹ An ka a lɔn ko Alla ti a tolo malɔla kojuu kɛla la, kɔni a ye a tolo malɔla mɛn ye a bonyala ka a sawo kɛ.

³² Habadan mɔɔ si ma a lamɛn ni mɔɔ ra mɔɔ ɲa laka mɛn ɲa fuyen sɔrɔnda.

³³ Ni cɛɛ ɲin ma bɔ Alla rɔ, a ti se foyi kɛla.»

³⁴ Ii ka a jabi: «I ye i la julumun dɔ kɛbi i sɔrɔn waati. I ri an karan wa?» Wo rɔ, ii ka a gbɛn salibon na.

Yon ye ɲa fuyen jɛrɛjɛrɛ di?

³⁵ Isa ka a mɛn ko ii ra a gbɛn. A ka cɛɛ wo ɲinin ka a yen, ka a fɔ a yɛ ko: «I ye lemɛniyala Mɔɔ Dencɛ ma wa?»

³⁶ Cɛɛ ka a jabi: «Maari, yon ye wo ri? I ye wo fɔ n yɛ, kosa n di lemɛniya a ma?»

³⁷ Isa ka a fɔ a yɛ ko: «I ra a yen. A ye kumala i yɛ sisen.»

³⁸ Wo rɔ a ka a fɔ a yɛ ko: «N da lemɛniya, n Maari.» A ka a birin Isa kɔrɔ ka a bato.

³⁹ Isa ka a fɔ ko: «N nara n nani dunuɲa la kiti la kanma. Ɲa fuyen ɲa ye a laka; mɛnilu ye yenni kɛla, woilu ye kɛ ɲa fuyen di.»

⁴⁰ Farisi doilu tɛrɛ ye a tɔrɔfɛ, woilu ka kuma wo mɛn ka a maɲininka ko: «Ande le fanan ye ɲa fuyen de ri?»

⁴¹ Isa ka ii jabi: «Ni ɲa fuyen ye ai ri, ai tɛ jatɛla julumuntɔ ri. Kɔni sisen ai ye a fɔla ko ai ye yenni kɛla. Wo le kosɔn, ai la julumun da to ai kan fɔlɔ.»