Yuhana 16 - Alla la Kitabu Seniman

¹ Isa ka a fɔ ko: «N da wo bɛɛ ɲafɔ ai yɛ sa ai kana lafili.

² Ii ri aile gbɛn salibon kɔndɔ, wo fanan waati natɔ sela mɔɔ mɛn ye ai faa ko rɔ, wo tii mirini ko a ye Alla le batola wo ɲa ma.

³ Ii ri woilu kɛ ka a masɔrɔn ii ma n Fa lɔn, wala nde jɛrɛ.

⁴ N ye wo fɔla ai yɛ, sa woilu wa se, ai hankili ri bila a rɔ ko n ka a fɔ le ai yɛ. «N ma wo fɔ ai yɛ a damirala, ka a masɔrɔn n tɛrɛ ye ai tɔrɔfɛ.

⁵ Sisen, n watɔla le wo ma mɛn ka n kelaya, kɔni ai kelen ma n maɲininka ko: ‹I watɔ mi?›

⁶ Ai jusumakasini kojuuya ko ɲinilu kosɔn, n nɔ mɛnilu fɔla ai yɛ.

⁷ Kɔni n ye tuɲa fɔla ai yɛ ko: ai la hɛrɛ le a rɔ ni n wara, baa ni n ma wa, Lalilila ti nala ai ma. Kɔni ni n wara n di a lawa ai ma.

⁸ Wo wa na, a ri julumun ko ni telenbaya ko ni kiti tɛɛ ko gbɛ dunuɲa yɛ, ka a yiraka ii la ko ii filini woilu bɛɛ rɔ.

⁹ Ii filini julumun ko rɔ ka a masɔrɔn ii ma lemɛniya nde ma.

¹⁰ Ii filini telenbaya ko rɔ, ka a masɔrɔn n watɔ n Fa ma, a ni ai ti n yenna butun.

¹¹ Ii filini kiti tɛɛ ko rɔ, ka a masɔrɔn, dunuɲa ɲin kuntii a ra jalaki.

¹² «Kuma siyaman de n bolo ka a fɔ ai yɛ, kɔni ai ti se wo kɔrɔ sisen.

¹³ Nii Sɛnimanna Tuɲa wa na tuma mɛn na wo ye ai taala tuɲa le rɔ, baa a sa kumala a jɛrɛ yɛ ɲa wo ma, kɔni a wa fen fen mɛn a ri wo fɔ. Ko mɛn ye nala a ri wo ɲafɔ ai yɛ.

¹⁴ A ri n na gbiliya yiraka, baa mɛn tɛrɛ ye nde rɔ a ri wo ta ka a lase ai ma.

¹⁵ Fen fen mɛn ye n Fa bolo a bɛɛ ye n ta le ri. Wo le kosɔn n da a fɔ ai yɛ ko mɛn tɛrɛ ye n dɔ Nii Sɛniman di wo ta ka a fɔ ai yɛ.

¹⁶ Sani waati ai ti n yenna butun, waati wo wa tamin a ti mɛn bakɛ ai ri n yen fanan.»

¹⁷ A la karandenilu tɛma ii tɛrɛ ye i ɲɔɔn maɲininkala ko: «A ye nfen fɔ ko rɔ an yɛ ko: ‹Sani waati ai ti n yenna butun, waati wo wa tamin a ti mɛn bakɛ ai ri n yen fanan›? A ni fanan ‹ka a masɔrɔn n watɔ n Fa ma›?»

¹⁸ Ii ye a fɔla ikɔ tuunni ko: «A ye nfen fɔla ko: ‹Waati dando›? An ma a lɔn a ye mɛn fɔla.»

¹⁹ Isa ka a lɔn ko ii ye a fɛ ka a maɲininka, a ka a fɔ ii yɛ ko: «Ai ye i ɲɔɔn maɲininkala ko n ye nfen fɔla kuma ɲin dɔ ko: ‹Sani waati ai ti n yenna butun, waati wo wa tamin a ti mɛn bakɛ ai ri n yen fanan›?

²⁰ N ye tuɲa le fɔla ai yɛ ko: ai ri kasi a ni ka kule, ka a tɛrɛn dunuɲa mɔɔilu ri sɛwa bakɛ ka ɲaalen. Ai ri to jusukasi rɔ, kɔni ai la jusukasi wo ri yɛlɛman ka a kɛ sɛwa ba ri, fo ka ɲaalen.

²¹ Ni muso kɛra tin ma a jusukasini, ka a masɔrɔn dimin ye a kan, kɔni ni a wa den sɔrɔn a ri sɛwa ka ɲina a la tɔrɔyaba wo kɔ, baa adamaden sɔrɔnda dunuɲa rɔ.

²² Wo ɲa kelen de ma, ai mɛn fanan jusukasini sisen, kɔni n di ai yen kokura, ai jusu ri sɛwa. Sawani mɛn ye wo ri, mɔɔ si ti se wo bɔla ai bolo.

²³ Wo lon wo rɔ ai ti n maɲininkala foyi la. N ye tuɲa le fɔla ai yɛ ko: ai wa foyi maɲininka n tɔɔ rɔ n Fa yɛ, a ri wo bɛɛ di i ma.

²⁴ Haan bi ai ma foyi maɲininka n tɔɔ rɔ. Ai ye a maɲininka, ai ri a sɔrɔn, sani ai la sɛwa ye dafa.

²⁵ «N ka ɲin bɛɛ fɔ ai yɛ kuma kɔrɔlama le rɔ. Waati natɔ sela n ti sɔn kuma kɔrɔlama si fɔla ai yɛ butun, kɔni n di n Fa la ko bɛɛ fɔ ai yɛ gbɛ rɔ.

²⁶ Wo lon ai ri maɲininka n tɔɔ la, n ma a fɔ ko n di n Fa madiya ai ta fan dɔ.

²⁷ Hen! Ai duman n Fa jɛrɛ yɛ ka a masɔrɔn n diyara ai yɛ, a ni ai lara a la ko n bɔni Alla le rɔ.

²⁸ N bɔni n Fa le rɔ ka na dunuɲa rɔ, sisen n bɔtɔ dunuɲa rɔ ka wa n Fa ma.»

²⁹ A la karandenilu ka a fɔ a yɛ ko: «A mafɛnɛ, sisen i ye kumala gbɛ rɔ, i ti foyi fɔla kuma kɔrɔlama rɔ.

³⁰ Sisen an ka a lɔn ko i ka ko bɛɛ lɔn a ni i mako sa a la mɔɔ ni i maɲininka fosi la. Wo le rɔ an ka lemɛniya a la ko i bɔni Alla le rɔ.»

³¹ Isa ka a jabi: «Ai ye lemɛniyala sisen wa?

³² Waati natɔ sela, a don gbun da se, ai ri jɛnsɛn ai ɲɔɔn na bɛɛ ri wa a wara. Ai ri n kelen to. Kɔni n kelen tɛ, baa n Fa ye n tɔrɔfɛ.

³³ N da ko ɲinilu fɔ ai yɛ, sa ai jusu ri suma sɔrɔn n na ko rɔ. Ai ri tɔrɔya sɔrɔn dunuɲa rɔ, kɔni ai ye sɛɛbɛ don, baa nde ra se dunuɲa la.»