Filipikailu 1 - Alla la Kitabu Seniman

Tuwaliilu

¹ Nde Pɔli ni Timote, Ɲenematɔmɔnin Isa la baarakɛlailu, an ka ɲin de sɛbɛ ka a lawa aile Ɲenematɔmɔnin na jama sɛniman na mɛnilu ye Filipi so kɔndɔ a ni dina kuntiilu ni dɛmɛnninnailu.

² An Fa Alla a ni Maari Isa Ɲenematɔmɔnin ye hina ni jususuma di ai ma.

Pɔli la Alla matara Filipe lemɛniya mɔɔilu yɛ

³ Ai la ko wa labila n ma waati si ma, n di baraka bila Alla yɛ.

⁴ N ye Alla matarala ai yɛ sɛwa le rɔ waati bɛɛ,

⁵ ka a masɔrɔn ai ra n dɛmɛn Isa la ko Kibaro Ɲuma lase diya ka bɔ lon fɔlɔ ma haan bi.

⁶ N lani a la fewu, Alla mɛn ka baara ɲuma ɲin damira ai tɛma, a ri a lakanbali haan a la Ɲenematɔmɔnin Isa na lon.

⁷ A bɛnni ai bɛɛ la diyaɲɛ ye to n dɔ ɲa kelen dɔ, ka a masɔrɔn ai la ko lamarani n jusu rɔ. Baa ni n sidini jɔlɔkɔ la, wala ni n ye Isa la ko Kibaro Ɲuma kɛlɛ kɛla, ka a ɲabɔ, an bɛɛ ye Alla la sɔli rɔ.

⁸ Alla le n sere ri ko ai la lɔɔ ye n na kaninteya bɛrɛ rɔ mɛn bɔni Isa Ɲenematɔmɔnin jɛrɛ rɔ.

⁹ N na Alla matarali le ɲin di: Ai la kaninteya ye makafu fewu, lɔnnin ni famunyali bɛrɛ la,

¹⁰ kosa ai ye se ko fisamantɛ lɔnna, ka to fɛɛtanya ni joo korontanya rɔ haan Ɲenematɔmɔnin na lon.

¹¹ Ai ye dafa telenbaya jiriden dɔ mɛnilu ye bɔla Isa Ɲenematɔmɔnin dɔ, Alla gbiliya ko ni a bato ko rɔ.

Pɔli ye kaso la

¹² Nakelenɲɔɔmailu, n ye a fɛ le, ai ye a lɔn ko mɛnilu kɛra n na, woilu ra Isa la ko Kibaro Ɲuma dɛmɛn, ka wa ɲafɛ.

¹³ Ka a masɔrɔn a ra yiraka mansa la bɔlɔn kɔnɔgbɛnna bɛɛ ni mɔɔilu bɛɛ la, ko n ye kaso la Ɲenematɔmɔnin de la ko rɔ,

¹⁴ Nakelenɲɔɔ siyaman, mɛnilu ka ii la landaya la Maari rɔ, baa n bilani kaso la, woilu ra wakali sɔrɔn Alla la kuma lase diya kosɛbɛ, ii ma silan.

¹⁵ Tuɲa le wo ri, ii le doilu ye Ɲenematɔmɔnin na ko kawandili bɔla minlɛ ni bɛnbaliya le rɔ, kɔni doilu ye a kɛla wɔnike ɲumaya le rɔ.

¹⁶ Woilu ye a kɛla kaninteya le rɔ, ka a masɔrɔn ii ka a lɔn ko Alla ka n lɔ yan Isa la ko Kibaro Ɲuma la kɛlɛ kɛ ko le rɔ.

¹⁷ Doilu ye Ɲenematɔmɔnin na ko kawandili bɔla nata le rɔ. Ii miriyailu ma ɲi. Ii mirini ko ii ye do lala n na tɔrɔya kan kaso la.

¹⁸ Foyi tɛ wo ri. Ni ii miriya kɛra a ɲuma ri, ni a kɛra juuman di, Ɲenematɔmɔnin na ko ra lase ɲa bɛɛ ma. Wo ra n sɛwa, n di to sɛwa rɔ fanan.

¹⁹ Ka a masɔrɔn n ka a lɔn ko wo bɛɛ ye kɛla n na kisi le ri ai la Alla mataraliilu ni Isa Ɲenematɔmɔnin na Nii baraka le rɔ.

²⁰ N ye mɛn makɔnɔla, ka n jii la a rɔ ko n kana maloya ko si sɔrɔn muumɛ. Kɔni n ye lala a la ten ikomin waati taminniilu rɔ kosa Ɲenematɔmɔnin di gbiliya n faribanku rɔ, ni n tora n nii la, wala ni n faara.

²¹ Ka a masɔrɔn Ɲenematɔmɔnin de kɛni nde la dunuɲaratɛɛ ri, ka saya kɛ tɔnɔ ri n yɛ.

²² Kɔni ni n tora nii la faribanku rɔ, n di se baara tɔnɔma do kɛla. N ka kan n ye nfen kɛ? N ma a lɔn.

²³ N gbɛrɛnni ko fila ɲin bɛɛ la: N ye a fɛ ka bɔ dunuɲa ɲin dɔ, ka wa to Ɲenematɔmɔnin tɔrɔfɛ, wo le ka fisa kosɛbɛ.

²⁴ Kɔni ai le la ko rɔ, a bɛnni n ye to n nii la faribanku rɔ.

²⁵ Baa n lani wo la, n da a lɔn ko n di to ai tɛma kosa ai ye wa ɲafɛ, ka sɛwa ai la lemɛniya rɔ.

²⁶ Kosa n wa n kɔsɛ ai tɔrɔfɛ tuma mɛn na, ai ri Ɲenematɔmɔnin Isa matɔɔ makafu n na ko rɔ.

²⁷ Kɔni, ai taama ɲa ye bɛn Ɲenematɔmɔnin na Kibaro Ɲuma ma, kosa ni n di na ai tɔrɔfɛ, wala ni n ye jan, n ye a mɛn de ko ai ye to hankili kelen dɔ, ko ai ye ai bolo don ai ɲɔɔn bolo ka Kibaro Ɲuma lase lemɛniya rɔ.

²⁸ Ai kana silan ai kɛlɛɲɔɔilu ɲɛrɔ muumɛ! Wo ye a yirakala ii la le ko ii ri halaki, kɔni ai le ri kisi Alla baraka rɔ.

²⁹ Baa a ra a sɔn a la hina rɔ ko ai ye la Ɲenematɔmɔnin na, wo kelen tɛ kɔni ka tɔrɔ a la ko rɔ fanan,

³⁰ ai ye to wo kɛlɛ kelen donna, ai ka n yen mɛn donna, ikomin ai ra a mɛn ɲa mɛn ma, haan sisen n ye wo kan.