Titas 2 - Asang Khongso New Testament

Tanghaih Kungpui Kahoih

¹ To-e nang loa tanghaih kungpui kahoih hoiah kakaih ah patuk ah.

² Nongpa saning kacoeh kuenawk to, mu paqui o hmah, palung taruetcuet ah om oah, aimah hoi aimah to kang uk thaiah om oah, taanghaih kahmaan, amlunghaih, hoi pauephaih thai ih to tawn oah, tiah thuitaek ah.

³ Tobatih toengah nongpui saning kacoeh kuenawk to doeh, nongpui ohhaih ih tawk batiah kacai ta-ah khosak hanah thuitaek ah. Anihcae loa lok pasoem pitpat kami hoi mu antha ih misong ah oh han om ai. Anihcae mah hmuen kahoih to patuk pae na soe.

⁴ Nongpui kanauknawk mah angmahcae ih savanawk hoi a canawk to palung thaiah oh han,

⁵ angmah hoi angmah kang uk thaiah oh han, kathoeng kacai ah oh han, savanawk ih lok tahngai thaiah oh han, hoi imthungtako ka khenzawn thai nongpui kahoih ah oh thai hanah patuk pahoi ah. Totibaloa Sithaw khae hoi-ih kangzo tamthang lok to mimah doeh kasae ah thui o thai mak ai.

⁶ Tobatih toengah saning kanauk nongpanawk to doeh angmah hoi angmah to ang uk o thai hanah thapaek oah.

⁷ Tiboih boih ah nangmah roeroe hae tuinuenh kahoih khetpatawt ka krah ah om ah. Na patuk na-ah palungthin tang hoi loktang ta-ah patuk ah.

⁸ Mimah doeh kasae ah thuih thai han ai ih loklang kahoih to patoh ah. Totibaloa aicae ih kawng to kasae ah thuih hanah tidoeh tawn o mak ai ueloa na misanawk to azat o lat tih.

⁹ Misongnawk loa angmahcae angraengnawk ih lok tahngai pae o soeloa tiboih boih ah anihcae to palung anghoesak o na soe. Anihcae mah angmahcae angraengnawk ih lok to pathim pae o hmah na soe,

¹⁰ vawnsainawk doeh paqu pae o hmah na soe, totoek ponghloa tiboih boih a sak o ih pongah aicae pahlongkung Sithaw kawng patukhaih ih to pakoeh o thai hanah anihcae ih a hoihhaih hoi oepohhaih ih to amtuengsak o na soe.

¹¹ Kawmawtiah Sithaw mah kami boih pahlong hanah tahmenhaih to amtuengsak boah.

¹² Ato tahmenhaih mah Sithaw tiadoeh sah aiah hinghaih hoi longnui vawnsai koehhaih hmoek ih to vah ving moa aimah hoi aimah ang ukhaih, toenghaih hoi hi longnui ah Sithaw palung angaihhaih batiah hing hanah aicae hae ang thuihtaek.

¹³ Aicae ih kalen kasawk Sithaw hoi Pahlongkung Jesuh Khrih lensawkhaih amtueng na-ah oepdoeng o ih anghoehaih Ni to aicae mah zing o.

¹⁴ Aicae ih sethaih thung hoitoah pahlong han hoi, angmah iah kaom kami to kacai ah ohsak han hoi, hoihhaih sak hanah palung kangthawk kami ah ohsak hanah angmah ih hinghaih khaekhaeh to aicae hanah ang paek.

¹⁵ Hinawk boih hae patuk aloa nang ih lokthuih ka tahngai kaminawk to tha na paek moa na thuihtaek na-ah nangmah akaatawnhhaih ih boih to patoh ah. Nang to mimah doeh hnap hmah na soe.