Pawlae ma Rom märü üng kangkawng tähang tärü saite cae 9 - Asang Khongso New Testament

Sithaw hoi Angmah Kaminawk

¹ Ka thuih ih lok hae loktang ni; Khrih iah ka oh moa amsawn lok ka thui ai. Cai Pakhra mah uk ih kasae kahoih panoekhaih mah doeh kamlai ai tito kamnoek ta-ah ang thuih.

² Kai palungsethaih ih loa a nat parai, ka thii ka ngan ah kaom kaimah ih caeng kaminawk hanah,

³ palungnathaih mah boeng ai. Anihcae hoihhaih hanih pongah kaimah hae Sithaw ih tangoenghaih thungah ka oh moa Khrih Jesuh hoiah ampraek doeh ka koeh halat!

⁴ Anihcae loa Sithaw ih kami ah oh o; a caanawk ah a coenghsak moa a lensawkhaih to anihcae khaeah amtuengsak; angmah hoiah paipinawk to a sak moa Tawklok to a paek; bokhaih tangtang to a tawnh o moa Sithaw ih lok amaihhaih ihnawk to a hnuk o.

⁵ Anihcae loa aicae ih saeza Hebru kami ahmin kamthang hoitoah ka tacawt kaminawk ni; kami coenghhaih bangah loa Khrih doeh anihcae ih caeng ni. Tiboih boih ukkung Sithaw loa dungzan ah pakoehhaih oh na soe! Amen.

⁶ Sithaw ih lok amaihhaih loa azom azin ni tiah ka thuih koehhaih ih na ai ni; kawmawtiah Israel kaminawk boiboih hae Sithaw ih kami ah om o king ai.

⁷ Abraham ih catawnnawk doeh Sithaw ih caa ah om o king ai. Sithaw mah Abraham khaeah, “Kaimah catawn kamaih ihnawk hae Isaak ranghoiah na tawn tih,” tiah a naa.

⁸ Ahi mah a thuihkoehhaih ih loa, kami coenghhaih tawk hoiah zah ih canawk loa Sithaw caa na ai tihaih ih na ai ni; Sithaw ih lok amaihhaih ranghoiah zah ah kaom caanawk khueh to ni catawn tangtang ah kroek han oh, tihaih ih ni.

⁹ Kawmawtiah Sithaw ih lok amaihhaih loa hitiah a oh: “Atue a koep na-ah kangzoh let moa Sarah mah capa tawn tih,” a ti.

¹⁰ Hi khueh na ai vop ni. Kawmawtiah Rebekka ih capa longhnetto mah ampa maeto khueh a tawnh hoi moa anih loa aicae ih saeza Isaak to ni.

^11-12 To-e qoih ih maeto mah Sithaw mangtaenghaih ih to acungsak hanah Sithaw mah Rebekka khaeah, “Amza mah amnauk ih tok to sah pae tih,” tiah a thuih. Hi lok a thuih hae anihcae to zah o ai nahlanah ni, kahoih doehsoe, kahoih ai doehsoe, tita doeh sak ai nahlanah ni; topongah Sithaw mah kami to a qoih na-ah a sak o ih pongah na ai moa angmah a kawk ih pongah ni.

¹³ Cabu Kacai mah, “Jakob loa ka palung moa Esau loa ka hnukmaa,” tiah thuih ih batiah oh.

¹⁴ Totiah om nahaeloa Sithaw loa toeng ai tiah thuih o han maw? Thui mak ai roeroe.

¹⁵ Kawmawtiah anih mah Mosi khaeah, “Kaimah ka koeh ih kami to ka tahmen moa kaimah ka koeh ih kami to palung ka nat han,” tiah a thuih.

¹⁶ Topongah cungriboih hae kami koehhaih hoi sakhaih ih pongah na ai moa Sithaw tahmenhaih ih khueh pongah ni a oh.

¹⁷ Kawmawtiah Cabu Kacai mah Izipt sangpahrang khaeah, “Kai ih Tharahhaih patueng han hoi ka hmin to longnui bum boih ah amthangsak hanah sangpahrang ah kang sak,” tiah a naa.

¹⁸ Topongah Sithaw loa a koeh ih kami to tahmen moa a koeh ih kami to palung a thahsak.

Sithaw Palungphuihaih hoi Tahmenhaih

¹⁹ To-e nangcae thungih longto mah kai khaeah, “Hitiah om nahaeloa, kawbangmaw Sithaw mah kami to zaenet thai tih? Mimah maw Sithaw koehhaih to pakaa thai tih?” tiah na naa tih.

²⁰ To-e kampui, Sithaw to ka pathim vam loa ami nang khoe maw? Long laom mah ka bopkung khaeah, “Tipongah maw hitiah kai hae nang sak?” tiah naa vaih ai.

²¹ Thuih tangtang nahaeloa laom bopkung mah angmah a koeh batiah patoh thai ih akaa a tawnh, amlailong tamhlom maeto khae hoi-ih laom hnetto a boh thaih; maeto loa ni kalen tue ni na-ah patoh han hoi maeto loa patoh romram hanah a boh.

²² Tobatih toengah Sithaw mah sak ih doeh a oh. Angmah ih palungphuihaih to amtuengsak han hoi tharahhaih ih to panoeksak hanah a koeh. To-e palung ka phuisak kungnawk hoi kamro moa kanghma kangtaa han kaminawk nuiah palung a sawk parai.

²³ A lensawkhaih kacung to amtuengsak han doeh a koeh moa ato lensawkhaih to a tahmenhaih ka hnuhkung aicae nuiah ang bawh, aicae loa angmah ih lensawkhaih to hnuk hanah paroep coek ih kaminawk ni.

²⁴ Kawmawtiah aicae loa angmah kawk ih kaminawk ni, Judah kaminawk thung hoitoah kawk ih kami khueh na aiah Gentel kaminawk thung hoitoah kawk ih kaminawk ah doeh oh o.

²⁵ Hosea cabu thungah Sithaw mah, “Kaimah ih kami ainawk to ‘Kai ih kami’ tiah ka kawk han. Ka palung ai ih caeng kami to ‘Ka palung ih kami’ tiah ka kawk han.

²⁶ ‘Nangcae loa kai ih kami na ai ni’ tiah a thuih o ih hmuenh ah to ‘Ka hing Sithaw ih caanawk’ tiah kawk o tih,” tiah a thuih.

²⁷ Topacoengah Isaiah mah Israel kaminawk kawng to, “Israel kaminawk loa tuiculi ih sa-ih zetto pop o langla cadoehsoe kami zetta khueh ni pahlong ah om o tih;

²⁸ kawmawtiah Sithaw mah hi longnui kawng hae lokcaek palang tih.”

²⁹ Isaiah toengtoeng mah, “Cungri sahthai Angraeng mah thoemto cadiinawk to pahlung aiah om o nahaeloa Sodom batiah coeng king ueloa Gomorrah batiah om o king tih,” tiah a thuih ih batiah oh.

Israel hoi Tamthang Kahoih

³⁰ Topongah kaicae mah thuih ih loa Sithaw hoiah ka toeng ta-ah oh hanah panki ai Gentel kaminawk loa taanghaih ranghoiah Sithaw mah kami ka toengah a suek boah.

³¹ To-e Sithaw kaminawk, toenghaih hnuk hanah tawklok ka pakrong kaminawk, ato to na hnuh o mak ai.

³² Tipongah maw hnuh o ai loa? Anihcae loa taanghaih ih pongah amhnga o ai moa a sakhaih ih pongah amhnga o lat pongah ni. Topongah anihcae loa amthaekhaih ih hlung pongah amthaek o.

³³ Cabu Kacai mah, “Khen ah, kaminawk amthaekhaih hanah Zion ah hlung maeto ka suek, ato lungsong mah kaminawk to amthaeksak tih. Kawmawtiah ami doeh angmah ka taang loa azat phawhhaih ih om mak ai,” tiah a thuih.