Pawlae ma Rom märü üng kangkawng tähang tärü saite cae 8 - Asang Khongso New Testament

Pakhra Ah Hinghaih

¹ Vaihi loa Khrih Jesuh hoiah kangpaeh ah ka hing kaminawk hanih loa zaenethaih ih om mak ai boah.

² Kawmawtiah Khrih Jesuh hoiah kangpaeh hinghaih aicae han ka paekkung Pakhra tawk mah loa zaehaih hoi duekhaih tawk thung hoitoah kai hae ang loihsak boah.

³ Kami coenghhaih ih mah thazok pongah Tawklok mah sah thai ai ih to Sithaw mah a sak. Angmah ih Capa patoehhaih hoiah kami coenghhaih thungih kaom zaehaih to a thoengcaisak; ato Capa loa zaehaih to phraek hanah kami coenghhaih hoiah angzoh.

⁴ Hi batiah Sithaw mah toksak haih ih loa kami coenghhaih ih batiah hing aiah Pakhra koehhaih ih batiah aicae thungah hae Tawklok mah a nguek ih toenghaih to acungsak hanih ni.

⁵ Kami coenghhaih ih mah patoeh ih batiah ka hing kaminawk loa kami coenghhaih ih mah a koehhaih ih hoiah palungthin to a uk. Pakhra mah thuih ih batiah ka hing kaminawk loa Pakhra mah a koehhaih ih hoiah palungthin to a uk toengh.

⁶ Kami coenghhaih ih mah a uk ih kaminawk mah a tongh hanih loa duekhaih ni; Pakhra mah uk ih kaminawk mah hak hanih loa hinghaih hoi monghaih hae ni.

⁷ Topongah kami loa a coenghhaih ih mah a uk na-ah Sithaw ih misa ah oh; kawmawtiah Sithaw ih tawklok to pazui ai moa pazui doeh pazui thai ai roeroe.

⁸ Kami coenghhaih ih tawk ka pazuinawk loa Sithaw to palung anghoesak thai ai.

⁹ To-e kami coenghhaih ih mah pahruek ih batiah na hing o ai; Sithaw ih Pakhra loa nangcae thungah om tangtang nahaeloa Pakhra mah koehhaih ih batiah ni a hingh lat boah. Ami doeh Sithaw ih Pakhra ka tawn ai loa Khrih ih kami na ai ni.

¹⁰ To-e Khrih to nangcae thungah hing nahaeloa Pakhra loa nangcae hanah hinghaih iah a oh, kawmawtiah zaehaih pongah nangcae ih takbum loa duek hanah oh boah e nangcae loa Sithaw mah kami katoeng ah suek o boah.

¹¹ Duekhaih thung hoitoah Jesuh kang thawksakkung Sithaw mah Pakhra to nangcae thungah hing nahaeloa duekhaih thung hoitoah Khrih angthawksak kung Sithaw mah nangcae thungah a Pakhra to a ohsak ranghoiah kadueh thai nangcae ih takbum to hinghaih paek toeng tih.

¹² Topongah naukamzanawk, aicae mah sak hanih tawnh o, to-e kami coenghhaih tawk koehhaih hoiah aicae mah hing han om ai.

¹³ Kawmawtiah kami coenghhaih tawk hoiah nangcae mah na hingh o nahaeloa na dueh o tih; to-e zaehaih na sak o ihnawk to Pakhra hoiah na paduek o nahaeloa na hing o tih.

¹⁴ Sithaw ih Pakhra mah zaehoih ih kaminawk loa Sithaw ih canawk ni.

¹⁵ Kawmawtiah Sithaw mah paek o ih Pakhra misong ah ka coenghsakkung hanih Pakhra na ai moa zit-om ah ka sahkung hanih doeh na ai; Sithaw ih caa ah a coenghsak moa Pakhra ih tharahhaih hoiah Sithaw to, “Abba, Pa,” tiah kawk o.

¹⁶ Hitiah kawk o na-ah hae Sithaw ih Pakhra hoi aicae ih pakhra to amtom moa Sithaw ih caa ah oh tito taphong.

¹⁷ Aicae loa Sithaw ih caanawk ah oh pongah angmah ih kaminawk hanah a suek ih tahamhoihhaih ka toepkung ah oh o; Sithaw mah Khrih hanah a suek pae ih to Khrih hoiah nawnto ah hak o tih; kawmawtiah aicae mah Khrih hoiah nawnto ah patang khang o nahaeloa a lensawkhaih ih to doeh abo o nawn toeng tih.

Hmabang Lensawkhaih

¹⁸ vai tahang tue ih patang khanghaih ih hae hmabang ah aicae khaeah kamtueng hankoi lensawkhaih hoiah patah han ka krah ah ka dawn ai.

¹⁹ Sithaw mah angmah ih caanawk amtuengsak hanih tue to sak ih hmuen boiboih mah oepdoenghaih hoiah a zing o.

²⁰ Kawmawtiah sak ih hmuen boih hae angmahcae koehhaih ih pongah na aiah, Sithaw mah totiah oh na soe tiah a koeh ih batiah mangtaenghaih ih om aiah anghmat angtaa hanah lok takroek tangcae ah oh boah. To-e oepdoenghaih ih to loa a oh.

²¹ Ni nito na-ah sak ih hmuen boiboih amrohaih hanih misong thung hoitoah loihsak ah om ueloa Sithaw caanawk loihhaih ih lensawkhaih to bo o toeng tih.

²² Kawmawtiah vaihi tue karoekto ah sak ih hmuen boiboih loa naukzah tom na-ih kana batiah ahaam o tito aicae mah panoek o.

²³ To-e totiah ka haam loa hmuensak ihnawk khueh na ai ni, Sithaw ih langrae hmaloe koek Pakhra ka tawn kami aicae hae doeh Sithaw mah a caa ah ang suek moa aicae ih takbum qoek hae loihsak hanah zing o na-ah a thungbang ah a haam o.

²⁴ Kawmawtiah aicae loa oepdoenghaih hoiah ni pahlong ah oh o; to-e aicae mah oepdoenghaih ih to hnuk o thai nahaeloa oepdoenghaih ih tangtang na ai ni. Mimah maw a mik hoiah hnuk thai ih to ka oepdoeng loa?

²⁵ To-e aicae mah hnuk ai ih to oepdoeng o nahaeloa palung ka sawk ah zing o.

²⁶ Tobatih toengah aicae loa thazok kami ah oh o pongah Pakhra doehsoe aicae abom hanah angzoh. Kawmawtiah aicae loa kawbangmaw khophoeh han tito panoek o ai na-ah, lok hoiah doeh thui thai ai ih ahaamhaih hoiah Pakhra mah aicae hanah Sithaw khaeah ang hnik pae.

²⁷ Palungthin hnuhkung Sithaw mah Pakhra ih dawnhaih to timaw tito a panoek; kawmawtiah Pakhra loa Sithaw koehhaih ih batiah angmah ih kaminawk hanah a hnik pae.

²⁸ Hmuen boiboih to Sithaw loa angmah ka palung kaminawk han hoi angmah patoephaih ih batiah a kawk ih kaminawk hanah to cungriboih hae hoihhaih hanah tok a sak tito ka panoek o.

²⁹ Sithaw mah a qoih kok ih kaminawk loa a Capa batiah coengh hanah pahloe lah, totitoah naukamza paroeai thungah a Capa loa calu koek ah oh hanah ni.

³⁰ Topongah Sithaw mah pahloe lah ih kaminawk to a kawk, a kawk ih kaminawk to kami katoeng ah a suek moa a lensawkhaih ih to doeh a bo o.

Khrih Jesuh Ah Sithaw Amlunghaih

³¹ Hi boiboih hae thaih o pacoeng aloa timaw thui o han vop? Sithaw mah aicae hae angdoe haih baloa mimah maw na tuh thai tih?

³² Ka tuhkung loa Sithaw na ai ni, a Capa to doeh pa-awt aiah aicae hanah ang paek boah! Aicae hanah a Capa ka paekkung loa tiboih boih to a zom ah paek aiah om tih maw?

³³ Sithaw mah qoih ih kaminawk to mimah maw zaenet thai tih? Anihcae loa zae ai tiah Sithaw angmah taphong boah!

³⁴ Totibaloa mimah maw anihcae to zaenet o tih? Khrih Jesuh mah zaenet mak ai, anih loa anihcae hanah a duek moa angthawksak let pacoengah Sithaw ih bantang bangah a oh moa aicae hanah ang hnit pae!

³⁵ Totisoe nahaeloa aicae hae Khrih amlunghaih hoitoah mimah maw tapraek thai han? Raihaih ih mah maw, patanghaih ih mah maw, pacaekhlaekhaih ih mah maw, zok amhlamhaih ih mah maw, amtanghaih ih mah maw, zit ohhaih ih mah maw, duekhaih ih mah maw, atonawk tapraek thai tih maw? Tapraek thai mak ai!

³⁶ Cabu Kacai mah, “Nang hanih pongah niduem thunqui duekhaih zit kaom ah ka oh o; hum hanih ah kaom tuu batiah ang suek o,” tiah a thuih ih batiah a oh.

³⁷ Timah doeh tapraek thai mak ai, aicae palungkung ranghoiah hi hmuen boiboih nuiah aicae loa pazawkkung ah oh o.

³⁸ Kawmawtiah angmah ih palunghaih thung hoitoah timah doeh tapraek thai mak ai tihae kamnoek ta-ah ka panoek: duekhaih mah doehsoe, hinghaih mah doehsoe, van nui ih kaom vanmi mah doehsoe, van bangih ukkung mah doehsoe, Tharahhaih ih mah doehsoe, vaihi dung mah doehsoe, hmabang dung mah doehsoe,

³⁹ longnui ranui bangih mah doehsoe, longnui ahlim bangih mah doehsoe, sak ih hmuen boiboih mah doehsoe, kaicae hae tapraek thai mak ai. Aicae Angraeng Khrih Jesuh ranghoiah aicae iah kaom Sithaw ih amlunghaih hoitoah ka tapraek thai hankoi tidoeh om ai.