Pawlae ma Rom märü üng kangkawng tähang tärü saite cae 6 - Asang Khongso New Testament

Zae Thungah Duek, Khrih Ah Hingh

¹ Totibaloa kawbangmaw thuih o han? Sithaw tahmenhaih pung aep aep hanah zaehaih to sak o poe han vop maw?

² Sah mak ai roeroe! Zaehaih thungah duek o boah, kawbangmaw zaehaih thungah to hing o nganglang thai tih?

³ Kawmawtiah Khrih Jesuh hoiah nawnto baptisma hak o na-ah a duekhaih hoiah doeh nawnto baptisma to hak o tito hoihdak ta-ah na panoek o.

⁴ Topongah aicae ih baptisma ranghoiah angmah hoiah aphum ah oh o moa a duekhaih iah doeh baptisma to hak ah oh o toengh; tobatih toengah Pa ih lensawk Tharahhaih hoiah Khrih to duekhaih thung hoiah angthawksak let batiah aicae doeh hinghaih kangtha ah hing o tih.

⁵ Kawmawtiah angmah hoiah nawnto ah duek o boah pongah duekhaih thung hoiah angthawksak let ah oh na-ah aicae doeh angmah hoiah angthawk nawn tih.

⁶ Aicae ih hinghaih kangquem loa Khrih hoiah kraws nuiah takhing boah tito panoek o; zae hoiah kakoi hinghaih kangquem Tharahhaih to takhinghaih ih loa zaehaih ih misong ah oh han ai iah ni.

⁷ Kawmawtiah kami longto a duek na-ah zae Tharahhaih thung hoiah to a loih boah.

⁸ Aicae loa Khrih hoiah duek o nawn boah pongah anih hoiah nawnto hing tih tiah ka taang o.

⁹ Kawmawtiah Khrih loa duekhaih thung hoiah angthawksak let boah moa dueh let mak ai boah tiah ka panoek o; duekhaih mah a nuiah uk mak ai boah.

¹⁰ Topongah anih loa a duek pongah zaehaih mah a nuiah uk thai ai boah; vaihi a hinghaih ih loa Sithaw angkomhaih hoiah a hingh boah.

¹¹ Tobatih toengah nangcae doeh zaehaih bangah loa duek o boah moa Khrih Jesuh ranghoiah Sithaw angkomhaih hoiah ka hing o tiah dawn oah.

¹² Takngan koehhaih to na pazui o han aiah ka dueh thai takbum to zaehaih mah uk hmah lai na soe.

¹³ Nangcae ih takbum to hmuen kahoih ai zae sakhaih hanah paek o hmah.

¹⁴ Zaehaih to nangcae ukkung angraeng ah om hmah na soe; kawmawtiah tawklok thungah na hing o ai boah moa Sithaw tahmenhaih thungah ni na hing o boah.

Toenghaih Misongnawk

¹⁵ Totisoe nahaeloa kawbang maw om tih? Tawklok thungah om o ai moa Sithaw tahmenhaih thungah oh o pongah zae sak o han boah maw? Sah mak ai roeroe!

¹⁶ Kami longlongto ih lok tahngai hanah misong batiah nang paek o na-ah ato angraeng ih misong ah na oh o tangtang tito hoihdak ta-ah na panoek o. Zaehaih ih to na pazui o nahaeloa zaehaih ih mah tacawthaih ih loa duekhaih ih ni; to-e Sithaw lok to tahngaih o nahaeloa ato lok tahngaihhaih ih mah tacawthaih ih loa Sithaw mah kami katoeng ah suekhaih hae ni.

¹⁷ To-e Sithaw khaeah kawn lok oh na soe! Kawmawtiah nangcae loa zae misong ah na oh o vaih langla doehsoe patukhaih na hak o thungih loktang thung hoiah loktang lok to palungthin boiboih hoiah pazui o boah.

¹⁸ Zaehaih thung hoitoah loihsak na oh o boah moa toenghaih misong ah na coengh o boah.

¹⁹ (Takbum bangah tha na hnaem o pongah duem khawn patoh ih lok to ka patoh). Zanghnii ah nangcae loa hoihhaih ai ih hmuen sak hanah nangmahcae ih takbum to thoengcaihaih ai ih misong ah nang paek o king boah. Tobatih toengah vaihi aloa ka thoengcai hmuen to sak hanah nangmahcae ih takbum to toenghaih misong ah oh hanah nang paek o king boah.

²⁰ Zaehaih misong ah na oh o na-ah toenghaih thung hoitoah na loih o.

²¹ Nangcae mah na sak o ih hmuennawk to amraihaih ih timaw na hnuk o? Vaihi na hnuk o ih loa azat ka om ah na oh o hae ni. Tobatih hmuennawk mah tacawthaih ih loa duekhaih ih hae ni.

²² To-e vaihi loa zaehaih thung hoitoah na loih o boah moa Sithaw ih misong ah na oh o boah. Nangcae amraihaih ih loa angmah khaeah hinghaih tahlang king hae ni. Ato mah tacawthaih ih loa dungzan hinghaih ni.

²³ Kawmawtiah zaehaih tho loa duekhaih ni; to-e Sithaw ih azom paek langrae loa aicae Angraeng Khrih Jesuh hoiah angpaehhaih ranghoiah dungzan hinghaih ni.