Pawlae ma Rom märü üng kangkawng tähang tärü saite cae 5 - Asang Khongso New Testament

Sithaw Hoiah Toenghaih

¹ Vaihi loa taanghaih ranghoiah kami katoeng ah ang suek o boah moa aicae Angraeng Jesuh Khrih ranghoiah Sithaw hoiah angdaehhaih to tawnh o boah.

² Taanghaih ranghoiah hibatih Sithaw tahmenhaih to hnuktonghsak o moa ato tahmenhaih thungah vaihi hae oh o. Topongah Sithaw lensawkhaih ih ka hnuk o bo toeng hanah oepdoenghaih ih hae kamlue o haih.

³ Raihaih ih doeh kamlue o haih bae, kawmawtiah raihaih ih mah pauephaih thai ih to tacawtsak moa,

⁴ pauep thaihaih ih mah Sithaw palungkhuek tihaih to tacawtsak moa anih ih palungkhuek tihaih ih mah oepdoenghaih to tacawtsak.

⁵ Hi oepdoenghaih ih mah palungboengsak ai, kawmawtiah Sithaw angmah ih amlunghaih to aicae palung thungah Cai Pakhra ranghoiah ang bawh boah, ato Cai Pakhra loa aicae hanah Sithaw mah paek ih langrae ni.

⁶ Kawmawtiah ka bomkung tawn aiah ka oh o nathuemah Sithaw mah a khaeh ih atue ani ah Khrih loa kami kazaenawk hanah a duek.

⁷ Kami katoeng han-iah loa kami longlongto duek han hae ka rai parai hmuen ni. Kami kahoih han-iah loa kami longlongto duek ka vam hae om thai doeh om tih.

⁸ To-e Sithaw mah aicae hae natanto maw ang palung tihae amtuengsak. Kami kazae ah oh o nathuemah Khrih loa aicae hanah a duek!

⁹ Angmah ih athii ranghoiah Sithaw mah vaihi kami katoeng ah ang suek boah; totisoe nahaeloa anih ranghoiah Sithaw palungphuihaih thung hoitoah natanto maw ang pahlong o aep aep tih.

¹⁰ Aicae loa Sithaw ih misa ah oh o, to-e a Capa duekhaih ranghoiah ampui ah ang sak boah. Vaihi loa Sithaw ih ampui ah oh o boah pongah Khrih hinghaih ih mah natanto maw ang pahlong o aep aep tih!

¹¹ To-e ato khueh na ai ni; Sithaw ih ampui ah ka sahkung aicae Angraeng Jesuh Khrih ranghoiah Sithaw mah sak ih pongah kanghoe o.

Adam hoi Khrih

¹² Kami longto ranghoiah longnui ah zaehaih to angzoh moa a zaehaih ih mah duekhaih to angzoh haih. Anih ih zaehaih pongah duekhaih ih hae mi boiboih khaeah a phak, kawmawtiah ami doeh zae o king.

¹³ Tawklok paek ih om ai nahlanah zaehaih ih hae longnui ah om ai; to-e tawklok oh ai ih ahmuenh aloa zae hae zae ah doeh dawn pae ai.

¹⁴ To-e Adam dung hoikamtong Mosi dung khoekto duekhaih ih mah mi boih to a uk king, Adam Sithaw ih lokpaek to pazui aiah a zaehaih ih batih toengah ka zae ai kaminawk mataeng doeh duekhaih ih mah a uk king. Adam loa kangzo hankoi kami longto hnuksakhaih ni.

¹⁵ To-e ato longhnetto loa anghmong ai, kawmawtiah Sithaw ih azom paek langrae loa Adam zaehaih ih batih na ai ni. Kami longto zaehaih pongah kami paroeai duek tihae loktang ni. To-e Sithaw ih tahmenhaih loa ato ponghdoeh a lenh aep; tobatih toengah kami longto Jesuh tahmenhaih ranghoiah kami paroeai khaeah kangzo Sithaw ih azom paek langrae loa a lenh aep.

¹⁶ Sithaw ih langrae hoi kami longto zaehaih ih to a lah zawh. Vaito zaehaih pacoengah kangzo zaehaih loa “Na zae o” tihae ni; to-e zaehaih paroeai pacoengah ka tingtawk ai kangzo langrae “Na zae o ai” ti ih lok takroekhaih hae ni.

¹⁷ Kami longto zaehaih ranghoiah duekhaih mah kami to a uk king. To-e kami longto Jesuh Khrih mah sak ih ranghoiah ka tacawt loa natanto maw len aep tih! Sithaw tahmenhaih kanoi parai ka hak hoi Sithaw mah azom ah kami katoeng ah suek ih kaminawk boiboih loa Khrih ranghoiah hinghaih to uk tih.

¹⁸ Totiah oh pongah zaehaih maeto sakhaih ih mah mi boiboih to zae a net batiah toenghaih maeto sak ih mah mi boiboih to a loihsak moa hinghaih to a paek.

¹⁹ Kami longto lok tahngaihhaih ai ranghoiah mi boiboih to kami kazae ah coenghsak batiah kami longto lok tahngaihhaih ranghoiah mi boiboih to Sithaw mah kami katoeng ah suem tih.

²⁰ Tawklok oh na-ah sakzaehaih a pung aep aep; to-e zae a punghaih hmuenh aloa Sithaw tahmenhaih doeh a pung aep aep toengh.

²¹ Topongah zaehaih ih loa duekhaih hoiah a uk batiah aicae Angraeng Jesuh Khrih ranghoiah dungzan hinghaih bangah to caeh haih hanah Sithaw tahmenhaih mah toenghaih hoiah a uk.