Pawlae ma Rom märü üng kangkawng tähang tärü saite cae 4 - Asang Khongso New Testament

Abraham Khetpatawthaih

¹ Totisoe nahaeloa aicae caeng ih ampa Abraham kawng loa kawbangmaw thuih o han? Anih ih hnuktonghhaih loa kawbangah maw a oh?

² A sak ih hmuennawk ranghoiah Sithaw hma-ah toenghaih to hnuh nahaeloa amluehaih koi tawn kalang tih, to-e anih loa Sithaw hma-ah amluehaih hankoi tidoeh om ai.

³ Cabu Kacai mah, “Abraham loa Sithaw a taang moa a taanghaih ranghoiah anih to kami katoeng ah a suek,” tiah a thuih.

⁴ Tok kasah kami loa toktho to a hnuk, to-e ato toktho loa langrae tiah dawn han om ai; a tok ih thatho to ni a hak.

⁵ To-e toksakhaih ih pongah na aiah taanghaih ih pongah kamhnga moa kami kazae to kazae aiah ka sahkung Sithaw to ka taang kami loa ato a taanghaih ih to Sithaw mah a toenghaih ah a talawk pae.

⁶ Sakhaih ih tita doeh apa aiah Sithaw mah kami katoeng ah talawk pae ih kami longto ih anghoehaih to David mah a thuihkoehhaih ih loa hitiah a oh:

⁷ “Kahoih ai sakhaih ih tahmen ah oh moa zaehaih khramh pae ah kaom kaminawk loa tahamhoih o!

⁸ Angraeng mah a zaehaih ihnawk pakuem pae ai ih kami loa tahamhoih!” tiah a thuih.

⁹ David mah thuih ih anghoehaih hae tangzat hin ka aat kaminawk khueh mah hak hanih maw? Na ai ni! Tangzat hin ka aat ainawk mah doeh hak hankoi ni. Kawmawtiah thuih kok ih Cabu Kacai mah, “Abraham mah Sithaw to a taang moa ato taanghaih ranghoiah Sithaw mah kami katoeng ah talawk,” tiah a thuih.

¹⁰ Ato to natuekah maw a oh? Abraham tangzat hin aah ai nahlanah maw, tiaibaloa tangzat hin aah pacoengah maw? A aah pacoengah na ai, a aah ai nahlanah ni.

¹¹ Anih loa a hnukah ni tangzat hin a aah, anih ih tangzat hin aahhaih ih loa mathaih ih maeto ah oh moa a taanghaih ranghoiah tangzat hin aah ai nahlanah Sithaw mah kami katoeng ah talawk boah. Topongah tangzat hin aat ai langla cadoehsoe taanghaih ranghoiah Sithaw mah kami katoeng ah tapom ihnawk han-iah Abraham loa pakhra bangih ampa ah a oh.

¹² Tangzat hin ka aat kaminawk ih ampa ah doeh a oh toeng, kawmawtiah tangzat hin aah khueh na aiah, aicae ampa Abraham tangzat hin a aah ai nahlanih a hinghaih batiah taanghaih hoiah ka hing kaminawk ni.

Sithaw Lok Amaihhaih hoi Taanghaih

¹³ Sithaw mah Abraham hoi angmah ih cadiinawk to hi long loa nang iah om tih, tiah lok amaih na-ah Abraham mah Tawklok pazui pongah na ai, to-e anih mah a taang moa Sithaw mah kami katoeng ah talawk pongah ni.

¹⁴ Kawmawtiah Sithaw lok amaihhaih ih loa Tawklok ka pazui thai kaminawk khaeah paek ah oh nahaeloa, taanghaih ih loa azompui ah om ueloa Sithaw lok amaihhaih ih to atho om mak ai.

¹⁵ Tawklok loa Sithaw palungphuihaih to angsinh; to-e tawklok om ai ih ahmuenh aloa tawklok aekhaih ih doeh om ai.

¹⁶ Topongah lok amaihhaih ih loa taanghaih nuiah takung angsut moa Abraham cadiinawk boiboih khaeah Sithaw ih azom paek langrae ni tiah panoekhaih hoiah lok amaihhaih ih ni. Tawklok pazui kaminawk han khueh aiah Abraham batiah ka taang kaminawk hanah doeh ni. Kawmawtiah Abraham loa aicae boih ih pakhra bangih ampa ah oh.

¹⁷ Cabu Kacai mah, “Nangcae loa caeng kami paroeai ih ampa ah kang sak boah” tiah a thuih. Topongah ato lok amaihhaih ih loa Sithaw mikhnuk ah ahoih moa Abraham mah a taang ih Sithaw loa Kami kadueh to ka hingsakkung hoi ka om ai to a lok hoiah ka omsakkung ni.

¹⁸ Abraham loa oepdoenghaih hanih tidoeh om ai na-ah doeh a taang moa a oepdoeng toengtoeng pongah Cabu Kacai mah, “Nang ih cadiinawk loa sakae zetto ah om tih,” tiah thuih ih batiah, “Caeng kami zetpui ih ampa,” ah coengh.

¹⁹ Abraham loa saning cumvaito oh dui boah; to-e a taanghaih ih loa krah tathuk ai, a takbum loa kadueh boih batiah ka om hoi Sarah doeh canawk om thai ai kawng to a dawn na-ah a taanghaih ih to zok ai roeroe.

²⁰ A taanghaih ih prawt sut ai moa Sithaw lok amaihhaih ih to oepvawt ai; a taanghaih ih mah tharahhaih hoiah a koisak moa Sithaw to a pakoeh.

²¹ Sithaw loa angmah lok amaih ih to sah thai khaekhaeh tih tiah a taang caeng.

²² Topongah Abraham loa taanghaih ranghoiah, “Sithaw mah kami katoeng ah tapom.”

²³ “Kami katoeng ah tapom” ti ih lok hae Abraham han khueh ah tarik ah om ai.

²⁴ Duekhaih thung hoitoah kangthawk let aicae Angraeng Jesuh ka taang kami, kami katoeng ah tapom hanih kaom aicae han doeh tarik ah oh toeng.

²⁵ Jesuh loa aicae zaehaih pongah duek hanah angpaek moa Sithaw hma-ah aicae hae kami katoeng ah oh hanah duekhaih thung hoitoah angthawksak let boah.