Pawlae ma Rom märü üng kangkawng tähang tärü saite cae 2 - Asang Khongso New Testament

Sithaw Lokcaekhaih

¹ Kampui, minawk to lok na caek maw? Ami doeh lokcaekhaih thai ih na tawn ai, kawmawtiah minawk to lok na caek na-ah a sak o ih to na sak toeng pongah nangmah hoi nangmah to mah zae nang net ah oh.

² Hibatih hmuen ka sah kaminawk to Sithaw mah zae a net na-ah ahmaan tito aicae mah panoek o.

³ To-e kampui, nang mah minawk to lok na caek na-ah ato zae na net ih hmuennawk to na sak toeng to loa! Sithaw lokcaekhaih to na loih tih, tiah na dawn maw?

⁴ Tiaibaloa a tahmenhaih kalen, palungsawkhaih hoi pauephaih to tiadoeh na sah ai. Sithaw tahmenhaih ih loa nang to dawn pakhuemsak hanah zaehoikung ni tito na panoek tangtang.

⁵ To-e nang loa palung na tangh moa palung na thah, topongah Sithaw palungphuihaih hoi katoeng lokcaekhaih ih Ni a phak na-ah na tongh hanih danpaekhaih kalen aep aep to nangmahcae mah na sak o.

⁶ Kawmawtiah Sithaw mah mi boih to a sak o ih batih toengah saktho to paek tih.

⁷ Thoemto kami loa hmuen kahoih to a sak o toemoe moa lensawkhaih, khangzahaih hoi kadueh thai ai hinghaih to pakrong o; anihcae khaeah Sithaw mah dungtasawk hinghaih to paek tih.

⁸ Thoemto kami loa angmahcae taham khueh to a poek o moa kahmaan ai to pazui han koeh o pongah kahmaan to takhoe o; anihcae nuiah to Sithaw mah a palungphuihaih hoi palung amngaehhaih ih to bawhthuih tih.

⁹ Hoihhaih ai ka sah kaminawk boih khaeah patang khanghaih hoi taknathaih ih to hnuh o tih; hmaloe koek ah Judah kaminawk mah tongh o ueloa Gentel kaminawk doeh tongh o toengh tih.

¹⁰ To-e hoihhaih ih ka sah kaminawk boiboih khaeah Sithaw mah lensawkhaih, khangzahaih hoi monghaih to paek tih; Judah kaminawk to paek hmaloe ueloa a hnukah Gentel kaminawk to paek tih.

¹¹ Kawmawtiah Sithaw mah mi boih to kangvan ripah lokcaek tih.

¹² Gentel kaminawk loa Mosi ih Tawklok to tawn o ai; anihcae loa a zae o na-ah Tawklok hoiaiah anghmat o. Judah kaminawk loa Tawklok to a tawnh o; a zae o na-ah Tawklok hoiah lokcaek ah om tih.

¹³ Kawmawtiah Sithaw mah kaminawk to katoeng ah suek ih loa Tawklok tahngaihhaih ranghoiah na ai moa Tawklok mah sak hanah lok a paek ih ranghoiah ni.

¹⁴ Gentel kaminawk mah Tawklok to tawn o ai; to-e tacawthaih maek ih thoemkophaih ranghoiah Tawklok mah sak hanah lok a paek ih batiah a sak o nakruek ah Mosi ih Tawklok to tawn o ai langla cadoehsoe atonawk to anihcae hanih loa tawklok ah a oh.

¹⁵ Anihcae ih hinghaih tuinuenh mah Tawklok mah sak hanah lokpaek ih to anihcae ih palung thungah tarik ah oh tito angmahcae ih mah amtuengsak. Ato loa amsoem tito anihcae ih kasae kahoih panoekhaih ih mah amtuengsak o; kawtih tue na-ah vailoa angmahcae palungthin lelet mah zae a net o moa avaih vaih aloa angmahcae to angtangh o.

¹⁶ Topongah Tamthang Kahoih ka taphong ih batih toengah hibatih palungthin ohning hae Sithaw mah Jesuh Khrih ranghoiah mi boih ih tamqu lamah poekhaih ihnawk to lok a caek ni ih ka om hankoi ni.

Judah Kaminawk hoi Tawklok

¹⁷ Totibaloa nangcae Judah kaminawk to loa? Judah kami na ti o; Tawklok pongah namhnga o moa Sithaw to namlue o haih;

¹⁸ Sithaw mah sah o na soe tiah a koeh tito na panoek o moa kahmaan hmuen to qoih hanah Tawklok thung hoitoah namtuk o boah.

¹⁹ Nangcae loa mikmaengnawk pahoikung ah ka oh o moa vinghaih thungah kaom kaminawk hanah aanghaih ah ka oh tiah na dawn o,

²⁰ kamthunawk patukkung, tidoeh ka panoek pacak ainawk hanah patukkung ah ka oh tiah na dawn o. Tawklok thungah panoekhaih kacung hoi loktang kacung to ka tawnh tiah na dawn o tangtang.

²¹ Nangcae minawk kalah to na patuk o, tipongah maw nangmahcae hoi nangmahcae to namtuk o ai? “Paqu hmah,” tiah na thuih o, to-e nangmahcae loa na paquk o maw?

²² “Pazang sah hmah,” tiah na thuih o, to-e nangmahcae loa pazang na sak o maw? Kraangthoi hae na panuet o, to-e nangmahcae loa tempal ih vawnsai to na paquk o maw?

²³ Nangcae loa Sithaw ih lokpaek na tawnh o ih to namlue o haih, to-e lokpaek to aekhaih hoiah Sithaw to azathaih na phawhsak o.

²⁴ Cabu Kacai mah, “Judah kaminawk kawng pongah Gentel kaminawk mah Sithaw to kahoih aiah a thuih o,” tiah a thuih.

²⁵ Tawklok to na pazui o nahaeloa tangzat hin aah to atho oh, to-e na pazui o ai mak nahaeloa tangzat hin ka aat vaih ainawk hoiah ni nahmong o toengtoeng.

²⁶ Tangzat hin ka aat ai Gentel kami mah Tawklok thungih lokpaek ihnawk pazui nahaeloa tangzat hin aah ih batih toengah Sithaw mah poek mak ai maw?

²⁷ Topongah nangcae Judah kaminawk, Tawklok to na tarik o moa tangzat hin na aah o e, Tawklok to na aek o pongah takbum bangah tangzat hin aat ai e Tawklok ka pazui Gentel kaminawk mah zae na net o tih.

²⁸ Thuih tangtang nahaeloa, ami to maw Judah kami tangtang, tangzat hin ka aat tangtang kami to? Tasabang kamtueng khueh ah Judah kami ah oh moa tangzat hin aah ih to tak nuiah sak ih khueh ah om nahaeloa Judah kami tangtang na ai ni.

²⁹ Athungbang ah Judah kami moa palungthin tangzat hin ka aat kaminawk to ni Judah kami tangtang ah oh. Ato loa tarik ih Tawklok na ai moa Sithaw Pakhra ih toksakhaih ih ni. Tobatih kami loa kami khae hoi-ih na Sithaw khae hoi-ih pakoehhaih to a hak.