Pawlae ma Rom märü üng kangkawng tähang tärü saite cae 16 - Asang Khongso New Testament

Miloeng Pringlanghaih

¹ Kenkhria Khrihca kangkom ah tok ka sah aicae ih tanu Fibi hae nangcae khaeah panoeksak han ka koeh.

² Sithaw kaminawk mah sak hankoi ah oh batiah Angraeng hmin hoiah anih to talawk oloa abomhaih angtoeng nahaeloa abom pae o rae ah; kawmawtiah anih hae kami paroeai hanah ampui kahoih ah oh moa kai hanah doeh a oh toeng.

³ Khrih Jesuh ih toksakhaih ih pongah ka toksak ampui Priskilla hoi Akuila hnit to ban ka sinh;

⁴ anih hnit loa kai hanah duek doeh a vam hoi. Anih hnit nuiah ka kawn parai, kai khueh aiah Gentel Khrihca kangkomnawk boih mah doeh a kawnh o toengh.

⁵ Anih hnit im ah kacu Khrihca kangkom to doeh ban ka sinh. Asia prae thungah Khrih ka taang hmaloe koek, ka palung ih kampui Epenetas to ban ka sinh.

⁶ Nangcae han-iah toksak ka zom parai Meri to ban ka sinh.

⁷ Kai hoiah thong ka krah nawn, kaimah ih Judah caeng kami Andronikas hoi Junia hnit to doeh ban ka sinh; anih hnit loa kawkpatoehnawk mah hoihdak ta-ah panoek iah oh moa kai ponghdoeh Khrihca ah a oh hoi hmaloe boah.

⁸ Angraeng ih angkomhaih thungah ka palung ih ampui Ampliatas to ban ka sinh.

⁹ Khrih ih toksakhaih pongah kaimah ih caeng kami toksah ampui Urbanas doeh ban ka sinh. Kaimah ih ampui kahoih Stakis doeh ban ka sinh.

¹⁰ Khrih hanah oepthok paraiah kaom Apelles to ban ka sinh. Aristobulas imthungtako ah ka omnawk to ban kang sinh o.

¹¹ Kaimah ih Judah caeng kami Herodion hoi Narsissas imthungtako ih Khrihcanawk to ban kang sinh o.

¹² Angraeng ih toksahkung Trifena hoi Trifosa hnit to ban ka sinh; Angraeng hanah paroeai tok ka sahkung ka palung ih kampui Persis to ban ka sinh.

¹³ Angraeng ih toksak na-ah kahoih kamhlai ah ka tok Rufas hoi a caa batiah na khenzawn toemoe amno to ban kang sinh hoi.

¹⁴ Asinkritas, Flegon, Hermes, Patrobas, Hermes hoi anihcae khaeah kaom Khrihca naukamzanawk to ban kang sinh o.

¹⁵ Filologas hoi Julia, Nereus hoi a tanuh Olimpas hoi angmahcae hoiah kaom Sithaw ih kaminawk doeh ban kang sinh o.

¹⁶ Longto hoi longto mokhaih kacai hoiah angkawn oah. Khrih ih Khrihca kangkom boiboih mah ban ang sinh o.

Hnukkhuem Loktaqukhaih

¹⁷ Naukamzanawk, ampraekhaih tacawtsak kaminawk hoi taanghaih ih angkhraengsak kaminawk hoi na hak o tangcae ih patukhaih ka aek kaminawk to acoe aha oah tiah kang pacae o. Anihcae to yaetak o ving ah.

¹⁸ Kawmawtiah ato batih hmuen ka sahnawk loa Angraeng Khrih ih tok to sah ai moa angmahcae ih zokzae han-iah ka tok kaminawk ni.

¹⁹ Mi boih mah nangcae ih Tamthang kahoih pongah oepthok ah na oh o ih to panoek o boih, topongah nangcae kawng pongah kanghoe parai. Kahoih hmuen kawng pongah loa kacing kami ah om oah, to-e kahoih ai hmuen pongah loa zaehaih ka tawn ai kami ah om oah tihae ka koeh.

²⁰ Aicae monghaih takung Sithaw mah nangcae ih khok hlim ah akraa aiah Setan to naep tih boah. Aicae Angraeng Jesuh ih tahmenhaih to nangcae khaeah om na soe.

²¹ Kai hoiah toksah nawn ampui Timote mah ban ang sinh o; tobatih toengah aimahcae ampui Judah caeng kami, Lusias, Jason hoi Sosipater cae mah ban ang sinh o.

²² Hi ca tarikkung kai Tertias mah Khrihcanawk to ban kang sinh o.

²³ Ka imtoemh imkung Gaias, Khrihca kangkom acuhaih na-ah a im patohsakkung mah nangcae to ban ang sinh; hi vangpui ih tangka pakuemkung Erastas hoi aicae ih amnauk Quartas hnit mah doeh ban ang sinh o.

²⁴ Aicae Angraeng Jesuh Khrih ih tahmenhaih loa nangcae boih khaeah om na soe. Amen.

Pakoehhaih hoi Aboeng Khophoehhaih

²⁵ Sithaw to lensawkhaih paek o si! Jesuh kawng ka thuih ih Tamthang Kahoih batiah doehsoe, ka laem tangcae dung paroeai thungah hawk ah kaom loktamqu loktang lok taphong ih batiah doehsoe, Sithaw mah loa nangcae taanghaih ih to kangcak ah angdoesak thai tih.

²⁶ To-e vaihi loa loktang lok to tahmanawk ih cabu tarikhaih ranghoiah amtuengsak ah oh boah; dungzan kangcak Sithaw ih lokpaekhaih ranghoiah mi boiboih mah taang o moa pazui o thai hanah caeng kami boiboih khaeah taphong ah oh boah.

²⁷ Maeto khueh ah ka om moa angmah khueh mah tiboih panoekkung Sithaw loa Jesuh Khrih ranghoiah lensawkhaih dungzan ah om na soe! Amen.