Pawlae ma Rom märü üng kangkawng tähang tärü saite cae 15 - Asang Khongso New Testament

Mi Kalah To Anghoesak Oh

¹ Taanghaih pongah tha ka rah aicae mah taanghaih pongah tha ka rah ainawk ih hmuenzit to phawh haih bom han oh. Aimahcae koehhaih ih khueh to sak han om ai.

² Aicae ih naukamzanawk to taanghaih bangah qoenghsak hanah anihcae ih hoihhaih to dawn siloa palunghoihsak o lat si.

³ Kawmawtiah Khrih loa angmah taham khueh to dawn ai. Cabu Kacai mah, “Nang pacaekhlaek kaminawk mah khetsaehaih ih loa kai nuiah krak boah,” tiah a thuih ih batiah oh lat boah.

⁴ Cabu Kacai thungah tarik ih cungriboih loa aicae ang patukhaih hanih ni. Totiah tarik koehhaih ih loa Cabu Kacai mah ang thuih ih palungsawkhaih hoi palungthin tharahhaih ranghoiah oepdoenghaih ih to tawnh o thaih hanih ni.

⁵ Khrih Jesuh to khetpatawthaih hoiah nangcae salak thungah palungthin maeto ah amhong thaih hanah palungsawkhaih hoi palungthin tharahhaih takung Sithaw mah na bom o na soe.

⁶ Totiah nangcae boih mah palungthin vaanto ah aicae Angraeng Jesuh Khrih ih Ampa Sithaw to na pakoeh o thaih tih.

Gentel Kaminawk Hanah Tamthang Kahoih

⁷ Topongah Khrih mah nangcae to talawk o batih toengah Sithaw lensawkhaih han-iah nangcae doeh longto hoi long talawk o toeng ah.

⁸ Kawmawtiah Sithaw loa oepthok ka om ni tito amtuengsak han hoi saezanawk khaeah a lok amaihhaih ih to akoepsak hanah Khrih loa Judah kaminawk zuengah tamtoeh ah a coengh tito kang thuih o.

⁹ Tokhueh aiah, Gentel kaminawk mah Sithaw ih palungnathaih to pakoeh o thaih hanah doeh ni. Cabu Kacai mah, “Topongah kai loa Gentel kaminawk salak thungah nang to kang pakoeh han moa; Nang pakoehhaih ih to laa hoiah ka thuih han,” tiah a thuih ih batiah a oh.

¹⁰ Topacoengah, “Gentel kaminawk, Sithaw mah qoih ih caeng kaminawk hoiah palung anghoe o nawn ah,” tiah a thuih bae.

¹¹ Topacoeng bae ah, “Gentel kaminawk boiboih, Angraeng to pakoeh oah; Mi boiboih mah Angmah to pakoeh oah,” ti ih hoi

¹² Tahma Isaiah mah, “Jesse ih catawn longto amtueng ueloa Gentel kaminawk to uk hanah angzo tih moa, Anihcae mah anih khaeah oepdoenghaih ih to suem o tih,” tiah thuih ih batiah a oh.

¹³ Oepdoenghaih takung ah kaom Sithaw mah angmah to taanghaih ranghoiah anghoehaih hoi monghaih hoiah koisak o na soe, toti na-ah ni Kai Pakhra tharahhaih ranghoiah nangcae oepdoenghaih ih to qoeng o poe thaih tih.

Paul Mah Capat Koehhaih Ih

¹⁴ Naukamzanawk, nangcae loa na hoihhaih hoi panoekhaih hoiah na koi o moa longto hoi longto to na patuk o thaih tito kaimah khaekhaeh mah hoihdak ta-ah ka panoek.

¹⁵ To-e ahi capat thungah kang thaihsak let ih lok thoemto kawng pongah hae misa ka hoih parai. Misa ka hoihhaih ih loa Sithaw mah Gentel kaminawk han-iah toksak hanah taham ang paek ih hae,

¹⁶ Khrih Jesuh ih tamtoeh ah ka oh pongah ni. Gentel kaminawk loa Sithaw mah talawk ih angbawnhaih iah oh han hoi Cai Pakhra ranghoiah Sithaw khaeah paek ah oh hanah Sithaw khae hoi-ih kangzo Tamthang Kahoih ka thuih na-ah qaihma batiah ka tok.

¹⁷ Topongah Khrih Jesuh hoiah angpaehhaih ranghoiah Sithaw hanah tok ka sak ih pongah kamlue thaih.

¹⁸ Gentel kaminawk mah Sithaw lok to pazui hanah Khrih mah kai patohhaih ranghoiah sak ih khueh to misahoihhaih hoiah ka thuih han. Hi batih a sak ih hae lok hoi sakhaih hoiah doehsoe,

¹⁹ dawnrai hmuen sakhaih hoi matsakhaih ih hoiah doehsoe, Sithaw ih Pakhra hoiah doehsoe a sak ih ni. Topongah Jerusalem hoitoah Illirikum karoekto ah kholong ka caeh nathung boih ah Khrih kawng Tamthang Kahoih to kacung ta-ah ka taphong.

²⁰ Kamsakhaih toemoe ih loa Khrih thaih o vaih ai ih ahmuenh ah Tamthang Kahoih taphong hae ni, kawmawtiah mi kalah mah takung amtong tangcae ih nuiah sakthuih to ka koeh ai.

²¹ Cabu Kacai mah, “Angmah ih kawng thui pae o ai ihnawk mah hnuh o tih, ka thaih vaih ainawk mah thaihkop o tih,” tiah thuih batiah a oh.

Rom Ah Caeh Han Angcaenghaih

²² Topongah ni nangcae khaeah kangzo thai aiah vaih paroeai pakaa ah ka oh.

²³ To-e vaihi loa hi prae thuem ih ka tok loa ka pacoeng boah moa nangcae khae angzoh moa hnuk hanah ka koeh ih loa saning paroeai a oh batih toengah,

²⁴ vaihi loa nangcae khaeah kangzo thaih tih boah tiah oepdoenghaih ka tawnh. Spain prae ah ka caeh taroiah nangcae to angqum hanah ka koeh moa nangcae khaeah atue setta patoh pacoengah toah to caeh hanah nang sabom o han ka koeh.

²⁵ To-e vaihi loa Jerusalem ah ka caeh rae moa toah kaom Sithaw caeng kaminawk ih tok to ka sak pae rae han.

²⁶ Kawmawtiah Masidonia hoi Akhaia ih Khrihca kangkomnawk mah Jerusalem ih kaom Sithaw kaminawk thungih kamtangnawk to abom hanah angmahcae palung angthawkhaih hoiah paek ih hmuenpaek to a oh.

²⁷ Totiah paekhaih ih loa angmahcae dawnkophaih ih pongah ni; thuih tangtang nahaeloa, kamtang kaminawk to abom hanah tok a tawnh o roeroe. Judah kaminawk loa pakhra bang tahamhoihhaih to Gentel kaminawk khaeah pazet o pongtoah Gentel kaminawk mah doeh hmuenmae bang tahamhoihhaih a hak o ih to Judah kaminawk abomhaih hanah patoh toeng hanah oh.

²⁸ Hi tok hae ka pacoeng boih moa anihcae hanah cong pae ih tangka hae anihcae ban thungah paek boih pacoeng na-ah Spain prae ah ka caeh han, ka caehhaih pangah nangcae khaeah kangzoh roeprap han.

²⁹ Nangcae khaeah kangzoh na-ah Khrih ih tahamhoihhaih kacung to kang phaw thai tih tito ka panoek.

³⁰ Naukamzanawk, aicae Angraeng Jesuh Khrih hoi Pakhra mah paek ih amlunghaih ranghoiah kang pacae o: kai hanah Sithaw khaeah kho na phoeh pae o toemoe ah.

³¹ Judea prae ih kaom Khrih ka taang ainawk ih ban thung hoitoah kasueng ta-ah oh thai han hoi Jerusalem vang ih ka toksakhaih ih hae Sithaw ih kaminawk mah talawk o thai hanah khophoe oah.

³² Topongah Sithaw koehhaih ih om nahaeloa anghoe phi hoiah nangcae khaeah kang phak han moa kai hanah tha kangtha lakhaih ih atue kahoih ah doeh om tih.

³³ Aicae monghaih takung Sithaw loa nangcae boih khaeah oh na soe. Amen.