Pawlae ma Rom märü üng kangkawng tähang tärü saite cae 11 - Asang Khongso New Testament

Israel Nuiah Sithaw Tahmenhaih

¹ Totibaloa Sithaw mah angmah ih kaminawk to pahnawt sut tih maw? Pahnawt sut mak ai roeroe! Kaimah hae doeh Israel kami, Abraham ih catawn, Benjamin caeng thungih kami ni.

² Sithaw loa atangsuek nahoiah a qoih ih angmah kaminawk to pahnawt sut ai. Cabu Kacai thungah, Elijah mah Israel kaminawk mikcophaih ai ih kawng Sithaw khaeah a thuih to na panoek o.

³ Elijah mah, “Angraeng, anihcae mah nangmah ih tahmanawk to hum o moa nangmah ih boktingnawk to doeh a phraek o; kaimah khueh ni kanghmat sut moa kai hae doeh hum hanah angcaeng o,” tiah a thuih.

⁴ Sithaw mah kawbangmaw a pathim pae? “Kaling sithaw Baal ka bok ai kami sang sarihto kaimah hanah ka suek,” tiah a thuih.

⁵ Tobatiah toengah vaihiah doeh a oh: A tahmen pongah Sithaw mah a qoih ih kaminawk thungih kanghmat kami zetta a oh vop.

⁶ A qoihhaih ih loa a sak o ih pongah na ai moa a tahmenhaih pongah ni takung angsut. Kawmawtiah Sithaw mah a qoih ih hae a sak o ih pongah takung angsut nahaeloa a tahmenhaih ih loa tahmenhaih ih tangtang ah om mak ai.

⁷ Totibaloa kawbangmaw om tih? Israel kaminawk loa a pakrong o ih to hnuh o ai. Sithaw mah qoih ih kami zetta mah khueh ni a hnuk o; kami kalahnawk loa Sithaw kawkhaih ih thaih o ai.

⁸ Cabu Kacai mah, “Sithaw mah anihcae ih palungthin to mutsak; vaihi ni karoekto hnuh o thai ai moa thaih o thai ai,” tiah thuih ih batiah a oh.

⁹ David mah doeh, “Angmahcae ih poi thungah thaang hoi dong pongah aman o na soe; amtim o na soeloa raekhaih ih hnuh o na soe!

¹⁰ Anihcae loa hnuk thai han aiah mik to maeng na soe; Raihaih hmuenzit hlimah akun o toemoe na soe,” tiah a thuih bae.

¹¹ Totisoe nahaeloa Judah kaminawk amthaek o na-ah amro moa anghmat angtaa o maw? Anghma angtaa ai! A zae o pongah pahlonghaih to Gentel kaminawk khaeah a phak, Judah kaminawk to khitsak hanah.

¹² Judah kaminawk ih zaehaih mah longnui ah tahamhoihhaih katingai a phaksak moa anihcae ih pakhra bang amtanghaih mah Gentel kaminawk khaeah tahamhoihhaih katingai a phaksak. Topacoengah Judah kaminawk kacung ta-ah apa o toeng na-ah tahamhoihhaih ih natanto maw len aep tih!

Gentel Kaminawk Pahlonghaih

¹³ Vaihi nangcae Gentel kaminawk khaeah kang thuih o: Gentel kaminawk khaeah kawkpatoeh ah ka oh nathung loa ka toksakhaih ih pongah kamkoeh han.

¹⁴ Kaimah ih caeng kaminawk to uthaih ih tawnhsak ranghoiah anihcae thungih thoemto mah pahlonghaih ih to hak o thaih tih.

¹⁵ Kawmawtiah anihcae to pahnawt sut ah oh na-ah longnui kaminawk loa Sithaw ih misa hoitoah angmah ih ampui ah coengh o. Anihcae to talawk ah oh na-ah kawbangmaw om o tih? Kadueh kaminawk hanah hinghaih iah om tih!

¹⁶ Takaw kae maeto pongih ahap ta hmaloe koek to Sithaw khaeah paek nahaeloa takaw boih to doeh angmah ih ni; thingkung maeto pongih tangzun to Sithaw khaeah tahlang nahaeloa tanghangnawk boih doeh angmah ih ni.

¹⁷ Hling ih oliv kung tanghang thoemto loa tuk pat moa taw thungih oliv tanghang hoiah patom ah oh. Nangcae Gentel kaminawk loa taw thungih oliv kung batiah ni na oh o moa vaihi loa Judah kaminawk ih pakhra bang tha ka rah hinghaih to na bo o.

¹⁸ Topongah tanghang batiah tuk ih kaminawk to khetsae han om ai. Kawbangmaw nam-oek o thaih loa? Nangcae loa tanghang batih ni na oh o moa tangzun to na patuih na pacah o ai, tangzun mah ni nangcae to patuih pacah ai.

¹⁹ To-e nangcae mah, “Kai to ahmuenh paek hanah tanghangnawk to tuk ah oh,” tiah na thui o tih.

²⁰ Ato to ahlong. Anihcae loa taang o ai pongah tuk pat ah oh moa nangcae loa na taang o pongah na ohhaih ih ahmuenh ah to na oh o poe. To-e ato kawng pongah amoek o haih hmah aloa zit ah zi o lat ah.

²¹ Tanghang romram batiah ka om Judah kaminawk to Sithaw mah pahlung ai nahaeloa nangcae to doeh pahlung o tih tiah na dawn o maw?

²² Hiah hae Sithaw loa natanto maw kami hae a tahmen moa natanto maw kamtim kaminawk nuiah zitman oh tito aicae mah hnuk o. Sithaw loa kamtim kaminawk hanah zitman oh parai, to-e nangcae nuiah loa tahmenhaih to a tawnh. A tahmenhaih thungah na oh o poe nahaeloa na tahmen o tih. To-e nangcae doeh na om o ai nahaeloa khaeh ah na om o toengh tih.

²³ Judah kaminawk mah angmahcae taanghaih ai ih to caeh o tak nahaeloa a ohhaih o ih ahmuenh ah to suek let ah om tih; kawmawtiah Sithaw loa ato to a sak thai.

²⁴ Nangcae Gentel kaminawk loa taw thungih oliv thing tanghang to tuk ih batiah na oh o moa longnui ih tawk batih ai eloa hlingh ih oliv thing tang hoiah pacong ih batiah ni na oh o. Judah kaminawk loa hlingh ih oliv thing tang batiah oh o pongah tuk tangcae ih tanghang ah oh langla doehsoe a kungpui tangtang khaeah pacong let hae Sithaw han-iah loa zoi aep tih.

Mi Boih Nuiah Sithaw Palungnathaih

²⁵ Naukamzanawk, panoek han ka koeh ih loktamqu maeto a oh, kawmawtiah ato mah loa palungha parai boah tiah dawnhaih ih to na tawnhsak o mak ai. Israel kaminawk ih palungnathaih ih loa dungzan ah om poe mak ai, kawmawtiah Gentel kaminawk boiboih Sithaw khaeah angzoh tue karoekto khueh ni om tih.

²⁶ Topacoengah Israel kaminawk pahlong ah oh hanih hae hitiah om tih. Cabu Kacai mah, “Zion hoitoah Pahlongkung to angzo ueloa Jakob ih catawnnawk thung hoitoah hoihhaih ai ihnawk boiboih to anghmasak tih.

²⁷ Anihcae ih zaehaihnawk to ka lak pae ving na-ah anihcae hoiah hi paipi hae ka sak han,” tiah thuih batiah om tih.

²⁸ Anihcae mah Tamthang Kahoih to takhoe o ving pongah Judah kaminawk loa Sithaw ih misa ah coengh o boah, ato loa nangcae Gentel kaminawk han ih ni. To-e angmahcae ih saezanawk ranghoiah anihcae loa Sithaw mah qoih ih ampui ah oh o.

²⁹ Kawmawtiah Sithaw loa angmah a qoih moa tahamhoihhaih a paek ih kawng pongah loa palungthin amkhraih vaih ai.

³⁰ Nangcae Gentel kaminawk zanghnii ah loa Sithaw lok to tahngai o ai; to-e vaihi aloa Judah kaminawk mah Sithaw lok to tahngai o ai pongah nangcae mah Sithaw ih tahmenhaih to na hak o.

³¹ Tobatih toengah nangcae mah na hnuk o ih tahmenhaih to anihcae mah doeh a hnuk o thai hanah vaihi aloa Judah kaminawk to Sithaw lok tahngai aiah oh o.

³² Mi boiboih khaeah tahmenhaih to amtuengsak hanah Sithaw mah mi boih to lok tahngaihhaih ai ih thungah thongkrah batiah a ohsak.

Sithaw Saphaw Oah

³³ Sithaw angraenghaih loa natanto maw a lenh! Ciinghaih hoi panoekhaih ih loa natanto maw a thuk! A lok takroekhaih ihnawk hae mimah maw thuihpacaih thai tih? A caehhaih ih loklam hae mimah maw panoek kop tih?

³⁴ Cabu Kacai mah, “Angraeng ih palungthin loa mimah maw panoek? Mimah maw poekhaih kahoih to ka paek thaih?

³⁵ Angmah to paek pathoksak let hanah mimah maw hmuen to ka paek vaih?” tiah thuih ih batiah oh.

³⁶ Kawmawtiah tiboih boih hae angmah sak ih ni, tiboih boih hae angmah ranghoi hoi angmah hanah a oh. Sithaw khaeah lensawkhaih dungzan ah oh na soe! Amen.