Pawlae ma Rom märü üng kangkawng tähang tärü saite cae 10 - Asang Khongso New Testament

¹ Naukamzanawk, palungthin boih hoiah ka koeh koek ih loa kaimah ih caeng kaminawk mah pahlonghaih ih hak o na soe tihae ni. Anihcae hanah kawkruk maw kho ka phoeh pae!

² Anihcae loa Sithaw khaeah kathuk ah angpaek o tito ka thuih thaih king, to-e anihcae ih palungthin angpaekhaih ih loa panoekhaih kahmaan pongah takung angsut ai.

³ Anihcae loa Sithaw mah kami katoeng ah a suek ih loklam to panoek o ai, angmahcae hmawk ah loklam sak hanah azom o lat; topongah anihcae loa Sithaw mah kami to katoeng ah a suek ih loklam thungah to akun han koeh o ai.

⁴ Kawmawtiah Khrih mah Tawklok to a taemhsak boah pongah ami kawbatih doeh ka taang loa Sithaw mah kami katoeng ah a suek boah.

Mi Boih Hanah Pahlonghaih

⁵ Tawklok pazuihaih ranghoiah Sithaw mah kami katoeng ah a suekhaih ih kawng to Mosi mah, “Ami doeh Tawklok ih lokpaek ka pazui loa hing tih,” tiah tarik.

⁶ To-e taanghaih ranghoiah Sithaw mah kami katoeng ah a suekhaih ih kawng to Cabu Kacai mah a thuih ih loa: “Mimaw van bangah daw tahang tih? tiah aimah hoi aimah duengh han om ai.” (Ato loa Khrih to van bang hoitoah anghum haih tih, tihaih ih ni).

⁷ Mimaw long hlimah ahum tathuk tih? tiah doeh dueng han om ai (Ato loa Khrih to duekhaih thung hoitoah tacawt haih tih, tihaih ih ni).

⁸ A thuihkoehhaih ih tangtang loa, “Sithaw mah taphong ih lok loa nang khaeah oh, na pahnii pongah oh moa na palungthin thungah doeh a oh,” tiah a oh; ato loa aicae mah thuih taphong o ih taanghaih lok to ni.

⁹ Jesuh loa Angraeng ni tiah na taphong moa Sithaw mah duekhaih thung hoitoah angthawksak let, tiah na taang nahaeloa pahlong ah om tih.

¹⁰ Kawmawtiah Sithaw mah kami katoeng ah ang suek o hae taanghaih ranghoiah ni; aicae ih thuih taphonghaih ranghoiah pahlong ah oh o.

¹¹ Cabu Kacai mah, “Ami doeh angmah ka taang loa azat phawhhaih om mak ai,” tiah a thuih.

¹² Ka taang kami boih loa ami doeh apa king, kawmawtiah Judah kami hoi Gentel kami salakah pazit pakrawnhaih ih om ai boah; Sithaw loa mi boiboih ih Angraeng ah oh moa angmah hmin ka kawk kami boih loa tahamhoihhaih katingai paek tih.

¹³ Cabu Kacai mah, “Ami doeh abomhaih koeh pongah Angraeng hmin ka kawk boih loa pahlong ah om tih,” tiah thuih batiah oh.

¹⁴ To-e anihcae mah taang o ai nahaeloa kawbangmaw ahmin to palawk o thaih tih? Tamthang lok thaih o ai nahaeloa kawbangmaw taang o thaih tih? Tamthang lok to thuih taphong ai nahaeloa kawbangmaw thaih o thai tih?

¹⁵ Ka thuikung patoeh ai nahaeloa kawbangmaw tamthang lok to taphong thai tih? Cabu Kacai mah, “Tamthang kahoih ka sinkungnawk ih khok loa natanmaw a hoih!” tiah a thuih ih batiah a oh tangtang.

¹⁶ To-e mi boiboih mah Tamthang Kahoih loa talawk o boih ai. Isaiah mah, “Angraeng, mimaw aicae ih tamthang lok to ka taang?” tiah a thuih.

¹⁷ Topongah taanghaih loa tamthang lok thaihhaih hoitoah angzoh moa tamthang lok loa Khrih kawng thuih taphonghaih ranghoiah angzoh.

¹⁸ To-e lok duengh han ka koeh ih loa: Tamthang lok loa thaih o ai tangtang maw? tihae ni. A thaih o; kawmawtiah Cabu Kacai mah: “Anihcae ih lok tuen loa longnui bum boih ah amsongh; Anihcae ih lok loa long taemh khoekto a phak,” tiah a thuih ih to ahlong.

¹⁹ Lok duengh bae ka koeh ih loa: Israel kaminawk mah thaihkop o ai maw? Hmaloe koek ah lok ka pathim loa Mosi to ni. Anih mah, “Caeng kami tangtang ah ka krah ai to ka khitsak hanah ka patoh han; kamthu caeng kaminawk patohhaih hoiah kai ih kaminawk to palung ka phuisak han,” tiah a thuih.

²⁰ Isaiah mah misa ka hoih aep aep ah, “Kai pakrong ai kaminawk mah kai hae ang hnuk o boah; lok na dueng ai kaminawk khaeah kamtueng pae,” tiah a thuih.

²¹ To-e Israel kaminawk kawng hoiah kangpaeh ah anih mah, “Lok tahngai ai hoi misa kangthawk kaminawk to dawt hanah thunqui ban ka pazangthuih,” tiah a thuih.