Mathai 6 - Asang Khongso New Testament

Minawk Abomhaih Kawng

¹ “Bokhaih bangah hmuen kahoih na sak ihnawk hae minawk mah hnuh na soe tiah mi mikhnuk ah na sak o han aiah acoe oah. Totiah na sak o nahaeloa van ih kaom nam Pa khaeih kawnvang tidoeh na hnuh o mak ai.

² “Topongah kavawt kaminawk khaeah hmuen maemaeto na paek na-ah laiha kaminawk mah sinakok hoi lam sungqum ah a sak o batih toengah na sak ih to amtuengsak o hmah. Anihcae loa minawk mah pakoeh na soe tito koeh pongah a sak o. Loktang ta-ah kang thuih o: A hak hankoi to kacung ta-ah a hak o boah.

³ To-e nangcae mah kavawt kami to na bom o na-ah nampui kahoih koek mataeng mah doeh panoek han aiah sah oah.

⁴ Nangmahcae khueh mah panoek oah. Tamqu tamqai ah na sak o ih ka hnuhkung nam Pa mah kawnvang to na paek o tih.

Khophoehhaih Kawng Patukhaih

⁵ “Nangcae mah kho na phoeh o na-ah laiha kaminawk batiah khophoe o hmah. Anihcae loa mi boih mah hnuh na soe tiah sinakok hoi lam sungqum ah angdoet moa khophoeh to a koeh o. Kamnoek ta-ah kang thuih o: A saktho hnuk hanih to kacung ta-ah hnuk o boih boah.

⁶ To-e nangcae mah khophoeh o na-ah imlaek thungah akun oh, thok kha oloa mik hoi hnuh ai ih nam Pa khaeah khophoe oah. Tamqu lamah na sak ih boih ka hnuhkung nam Pa mah kawnvang to na paek o tih.

⁷ “Khophoeh o na-ah Sithaw panoek ainawk batiah ahlongrui ka om ai ih lok to ka pop ah thuih o hmah, anihcae loa ka sawk paraiah khophoeh na-ah Sithaw mah na thaih pae tih, tiah dawn o.

⁸ Anihcae batih toengah om o hmah. Nangcae angtoeng ih to na hnik o ai nahlanah nam Pa mah panoek boih boah.

⁹ Topongah kho na phoeh o na-ah: ‘Van ih kaom kaicae Ampa, Na hmin kacai khangzahaih oh na soe;

¹⁰ Na Poenghaih pha na soe, Van ah na koehhaih sak batiah, longnui ah doeh sah na soe.

¹¹ Nithokkruek kangtoeng o ih caknaek vaihni na paek ah.

¹² Mi kalah mah kaicae nuiah sakzaehaih ihnawk to ka tahmen o batiah, kaicae sakzaehaih ihnawk to doeh tahmen toeng ah.

¹³ Tanoekcakhaih karai parai to kaicae nuiah na phasak hmah, Kahoih-ai Kami ban thung hoitoah maka ah. Poenghaih hoi, hmuensak thaihaih hoi, lensawkhaih loa dungzan ah nang ih ni. Amen.’ tiah khophoe oah.

¹⁴ “Mi kalahnawk mah nangcae nuiah a sak ih kahoih ai to tahmen o nahaeloa van ih kaom nam Pa mah doeh tahmen o toeng tih.

¹⁵ To-e mi kalahnawk sakzaehaih to na tahmen ai nahaeloa van ih kaom nam Pa mah doeh na zaehaih tahmen toeng mak ai.

Buhzahhaih Kawng Patukhaih

¹⁶ “Buh na zah o na-ah laiha kaminawk batiah mikhmai saerom ah om o hmah. Anihcae loa buhzah o na-ah mi boih mah hnuh soe tiah koeh pongah mikhmai kasae amtuengsak o. Kamnoek ta-ah kang thuih o: Anihcae loa kawnvang to kacung ta-ah a hnuk o boah.

¹⁷ Buh na zah o na-ah mikhmai doeh pahlak oloa sam doeh sok oah.

¹⁸ Totiah buh na zah ih to mimah doeh panoek ai ueloa mik hoi hnuh ai nam Pa khueh mah panoek tih. Tamqu lamah na sak ih panoekkung nam Pa mah kawnvang to na paek o tih.

Van Ah Qawk Patunghaih

¹⁹ “Karaa hoi sum-aek mah ka caa thaih, kamqu mah muk moa paquk thaih ih tacong to hae long ah patung o hmah.

²⁰ Karaa hoi sum-aek mah caa thaih ai ih, kamqu kamca mah doeh paquk thaih ai ih tacong to van ah patung oah.

²¹ Kawmawtiah tacong ohhaih khaeah palungthin doeh na om o toengh tih.

Takbum Aanghaih

²² “Mik hae takbum hanah hmai-im batih ni a oh. Mik hoih nahaeloa na takbum boih aanghaih hoiah koi tih.

²³ To-e mik hoih ai nahaeloa na takbum boih to vinghaih thungah om tih. Topongah nangcae thungih aanghaih to ving khoep moeng nahaeloa, natanmaw zit kaom vinghaih iah om tih!

Sithaw hoi Longnui Vawnsai

²⁴ “Mimah doeh angraeng longhnetto ih misong ah om maek thai mak ai. Longto palung ueloa longto loa hnumaa tih. Longto khaeah oep-om ah om ueloa, longto loa khensae tih. Sithaw hoi tangka tok to hnetto ah na paraep maek thai mak ai.

²⁵ “Topongah kang thuih o: Na hinghaih hanah nangtoeng o ih tui buh hoi na takbum hanah khukbuenh kawng poekdawn pongah palung angphosak o hmah. Loktang ah thuih nahaeloa, hinghaih hae buh pongdoeh lokpui na ai maw? Khukbuenh pongdoeh takbum hae lokpui na ai maw?

²⁶ Van ah ka zawk tavanawk ho khen o noek e! Atimu doeh pati o ai; cang doeh aat o ai moa sapai thungah doeh patung o ai. To-e van ih kaom nangcae Ampa mah atonawk to a kok king. Nangcae loa tavanawk pongdoeh tamu na oh o pahlai na ai maw?

²⁷ Nangcae na mawnhhaih ranghoiah na hinghaih setta doeh na pacong o thaih kue maw?

²⁸ “Tipongmaw khukbuenh kawng pongah na mawnh o? Taw ih apawknawk ho kawbangmaw a qoengh o tahang tito khen o noek e; tok doeh sah o ai, khukbuenh hanah pahlah doeh phae o ai.

²⁹ To-e kang thuih o: Angraeng kanang kalen kasawk Solomon Sangpahrang mataeng doeh ato apawk maeto kahoih batiah amthoep thaih ai.

³⁰ Vaihni ah kamprawk moa khawnbang ah ka zaem roep, hmai ah thumh hankoi, tawtaqak thungih kamprawk phroh mataeng doeh khenzawnkung loa Sithaw ni. Anih mah nangcae to atonawk boih pongdoeh na khenzawn o aep mak ai maw? Na taanghaih ih na tamsi o hae!

³¹ “Topongah timaw kacak ka naek moa ka khuk ka buenh han, tiah mawn o hmah.

³² Hinawk loa Sithaw panoek ai kaminawk mah dawn angpho o haih raengraeng ih ni. Van ih kaom nam Pa mah hi hmuennawk hae angtoeng tito panoek boih.

³³ Topongah kalahnawk boih pongdoeh Sithaw Poenghaih hoi Sithaw mah ang saksak hanah koeh ih to lokpui koek ah suem oah, angtoeng ih hmuen kalah boih to doeh na thap pae tih.

³⁴ Topongah khawnbang han mawn o hmah; khawnbang mah angmah han ka khawt ah mawn toeng tih. Nito ih mah tacawthaih ih raihaih nuiah kalah thapthuih bae han angaih ai.