Mathai 4 - Asang Khongso New Testament

Jesuh Zaepacunghaih

¹ Topacoengah Pakhra mah Jesuh to Diabol mah zae pacung ah oh hanah praetanghaeng ah a caeh haih.

² Ni quipalito thung qum thun buh hoiaiah a oh pongah Jesuh loa zok amhlam boah.

³ Topacoengah Diabol loa anih khaeah angzoh moa, “Nang hae Sithaw Capa tangtang ah na oh nahaeloa hlungnawk hae takaw ah coengsak ah,” tiah a naa pae.

⁴ To-e Jesuh mah, “Cabu Kacai mah, ‘Kami hae takaw khueh hoiah hing thai ai, to-e, Sithaw pakhaa thung hoitoah ka tacawt lok hoi khueh ni loa a hingh,’ a ti,” tiah a naa pae.

⁵ Topongah Diabol mah Jesuh to kacai Jerusalem vangpui ih Tempal imphu ah caeh haih moa,

⁶ Anih khaeah, “Nang loa Sithaw Capa tangtang ah na oh nahaeloa longpung tathuk ah, kawmawtiah Cabu Kacai mah, ‘Sithaw mah angmah ih vanminawk to nang hanah lokpaek tih, anihcae mah a ban hoiah tapom tahang ueloa; na khok to hlung pongah na daeng mak ai,’ tiah a oh,” a naa pae.

⁷ Jesuh mah loa, “Cabu Kacai mah ‘Angraeng na Sithaw to tanoek tacak hmah,’ a tih to loa,” tiah pathim.

⁸ Topacoengah Diabol mah Jesuh to mae kasang parai maeto khaeah a dawh haih moa longprae boih hoi a lensawkhaih boih to a hnuksak moa,

⁹ Diabol mah, “Khokkhu samkrawn moa kai na bok nahaeloa hi boiboih hae kang paek han,” tiah a naa pae.

¹⁰ Tona-ah Jesuh mah pathim moa, “Setan, caeh ving ah! Cabu Kacai mah, ‘Angraeng na Sithaw to bok aloa angmah ih tok khueh to sah ah,’ a tih bae,” tiah a naa pae.

¹¹ Topacoengah Diabol mah Jesuh to a caehtak, vanminawk to angzoh moa abom ahlom o.

Jesuh Galili Ah Toksak Amtong

¹² Jesuh mah Johan to thongim ah pakhrak o tito a thaih na-ah Galili prae ah a caeh.

¹³ Anih loa Nazareth vang ah om aiah Kapernaum vang ah oh hanah a caeh. Kapernaum vang loa Zebulun hoi Naftali caengnawk ih prae thung Galili Tuili taeng ih kaom vang ni.

¹⁴ Hitiah ohhaih ih loa tahma Isaiah mah a thuih sut ih to acunghaih hanih ni. Isaiah mah,

¹⁵ “Zebulun hoi Naftali prae, tuiculi bang caehhaih loklam, Jordan tuiva yaeh ah ka om, Gentelnawk ih prae Galili!

¹⁶ Vinghaih thungah kaom kaminawk mah aanghaih kalen parai hnuh o tih. Duekhaih kaving prae thungah ka omnawk nuiah aanghaih to tacawt tih,” tiah a thuih.

¹⁷ To tue kazit hoiloa Jesuh mah, “Van Poenghaih loa a hnaih boah pongah na zaehaih to caehtak oah,” tiah tamthang lok to thuih amtong.

Tangaa Tamaa Longpalito A Kawk

¹⁸ Jesuh loa Galili tuilitaeng ah linglong thuk tahang nathuemah tangaa ka naehkung naukamza Simon (Piter naa pae ih) hoi amnauk Andru hnit, tuili ah palok hoiah tangaa ka haeng to a hnuk.

¹⁹ Jesuh mah to hnit khaeah, “Kai hnukah bang hoi ah, kami naehkung ah coengh hanah kang patuk han,” a naa pae.

²⁰ Anih hnit loa paloknawk to caeh hoi tak sut moa a hnukah bang hoi roep.

²¹ To hoitoah a caeh moa kalah naukamza hnit, Zebedi capa Johan hoi Jakob to a hnuk. Anih hnit loa ampa Zebedi hoiah nawnto palong thungah oh o moa palok to pading o. Jesuh mah to hnit to a kawk.

²² Anih hnit loa ampa hoi palong to caehtak moa a hnukah baang hoi roep.

Jesuh Mah Patuk, A Thuih, A Hoihsak

²³ Jesuh loa Galili prae bum boih ah caeh moa sinakok kruekah a patuk pae moa Van Poenghaih Tamthang Kahoih to a thuih moa ngoinathaih hoi nathaih congca ka pauepnawk to a hoihsak.

²⁴ Anih ih tamthang loa Siria prae bum boih ah amthang moa ngannanawk, ngoinathaih hoi raihaih congca ka pauepnawk, taqawk mah naeh ihnawk, a tuetue na-ah kadueh sutsutnawk, khokban kamprawk kaminawk boih to angzoh o haih moa a hoihsak boih.

²⁵ Galili prae hoi Vang Hato naa pae o ih prae, Jerusalem hoi Judea prae hoi Jordan tuiva yaeh bang hoitoah kami katingai angzoh o moa anih hnukah baang o.