Mathai 28 - Asang Khongso New Testament

Jesuh Angthawklethaih

¹ Sabbath ni aboeng boah moa Yahni akhawnbang khawnthaw ah Meri Magdalin hoi kalah Meri loa taprong khet hanah caeh hoi.

² Tona-ah mawnhoe aiah tali kana parai a hnawh. Angraeng ih vanmi longto to van bang hoitoah anghum moa taprong khahhaih ih hlungpui to takhoe ving moa ato nuiah anghnut.

³ A tungkraang loa tangphra ka puek batiah a oh moa khukbuenh loa dantui batiah anglung.

⁴ Taprong toepkungnawk loa a zit o loiah anghuen o moa kadueh batiah a oh o.

⁵ Vanmi mah nongpui cae khaeah, “Zi hoi hmah, kraws ah takhing ih Jesuh to na pakrong hoi tito kang panoek.

⁶ Hiah om ai boah, a thuih ih batiah angthawk zawh boah. Angzo hoi aloa pasonghaih ih ahmuenh hae khen hoi ah.

⁷ Vaihi karang ah caeh hoi aloa a hnukbangnawk khaeah, ‘Duekhaih thung hoitoah angthawksak let boah; nangcae hma-ah Galili ah caeh ueloa toah anih to na hnuh o tih,’ tiah thui pae oh. Kang thuih o ih hae pahnet o hmah,” tiah a naa pae.

⁸ Topongah taprong hoitoah karang ah amlaem hoi, a zit hoi, to-e anghoehaih hoiah koi hoi moa hnukbangnawk khaeah thuih hanah a cawnh hoi.

⁹ Poeklak ai puiah Jesuh loa anih hnit khaeah a phak moa, “Nang hnit khaeah monghaih oh na soe,” tiah a naa pae. Anih khaeah a caeh hoi thuih, a khok patawn pae hoi moa a bok hoi.

¹⁰ Jesuh mah anih hnit khaeah, “Zi hoi hmah, caeh hoi aloa kam nauk kamzanawk to Galili ah caeh hanah thuii pae hoi ah; toah to kai hae na hnuh o tih,” tiah a naa pae hoi.

Taprong Toepkungnawk Ih Lokthuih

¹¹ Nongpuinawk loa amlaem o nathuemah taprong toepkung risa thoemto loa vangpui thungah a caeh o moa a hnuk o ih hmuen boih to qaihmanawk khaeah a thuih pae o.

¹² Qaihma kacoetanawk loa kacoetanawk hoiah angqum o moa lok aram o; risanawk to tangka zetpui a paek o moa,

¹³ “‘Qum ka iih o nahlanah a hnukbangnawk angzoh o moa a qok to paquk o ving,’ tiah naa pae oah.

¹⁴ Ato kawng to prae ukkung mah thaih moeng nahaeloa, nangcae loa zaehaih tawn ai tiah kang thuih pae o han, mawnhaih hanah tidoeh om ai,” tiah a naa pae.

¹⁵ Taprong toepkungnawk loa tangka to talawk o moa a thuih pae o ih batiah to a sak o. Topongah ato kawng to Judah kaminawk mah vaihni ni khoekto a thuih o toemoe.

A Hnukbangnawk Khaeah Amtuenghaih

¹⁶ A Hnukbang hahlaitonawk loa Galili prae ah caeh o moa Jesuh mah a thuih pae o ih maenui ah to a dawh o.

¹⁷ Angmah to a hnuk o na-ah a bok o, thoemto mah loa oepvawthaih to a tawnh o.

¹⁸ Jesuh loa a hnaihthuih moa anihcae khaeah, “Long hoi van ih akaatawnhhaih boiboih loa kai khaeah ang paek boih boah.

¹⁹ Topongah caeng kami boiboih khaeah caeh oloa kai ih hnukbang ah coengsak oah. Ampa, Capa hoi Cai Pakhra hmin hoiah baptisma paek oah.

²⁰ Topacoengah ka lokpaek ih boih to pazui hanah patuk oah. Moa dung aboeng khoekto nangcae khaeah kang ohhaih poe han,” tiah a naa.