Mathai 26 - Asang Khongso New Testament

Jesuh Hum Han Angcaenghaih

¹ Jesuh mah to loknawk boih to patuk pacoeng na-ah a hnukbangnawk khaeah,

² “Na panoek o batiah hi pacoeng hoiloa ani pahnit ah Takantak Poi to om ueloa Kami Capa loa kraws nuiah takhing hanah minawk ban ah paek ah om tih,” tiah a naa.

³ Topacoengah loa qaihma kacoetanawk hoi kalah kacoetanawk to Qaihma Kalen Kaiafas im longhma ah to amkhueng o cu moa,

⁴ Jesuh to tamqu lamah naeh moa hum hanah aram o.

⁵ Anihcae mah, “Poi oh thung loa sak han om ai, mipui mah lokpunghaih om tih,” tiah a thuih o.

Bethani Ah Jesuh To Situi A Bawh

⁶ Jesuh loa Bethani vang ih ngansae kaman Simon im ah a oh.

⁷ Buh a cak li nathuemah nongpui longto angzoh moa avang paroeai kating hmuihoihtui, alabaster tabu pongah ka koiah a sinh moa Jesuh ih lu ah a bawh.

⁸ Ato to hnukbangnawk mah a hnuk o na-ah palungphui o moa, “Tipongmaw hitiah a soekzak king halat?

⁹ Hi hmuihoihtui hae tangka zetpui ah zawh moa kamtang kamlainawk to paek thaih han tomah!” a naa o.

¹⁰ Totiah a thuih o ih to Jesuh mah a thaih na-ah anihcae khaeah, “Tipongmaw hi nongpui hae khrukhrahaih na paek o mut loa? Kai hanah a sak ih hae hmuen kahoih hoi khet kahoih ni.

¹¹ Mithoe naqah loa nangcae khaeah om toemoe tih, to-e kai loa nangcae khaeah om poe mak ai.

¹² Kai nuiah hmuihoihtui a bawh ih hae ka qok aphum hanah aroephaih ih ni.

¹³ Vaihi loktang ta-ah kang thuih o: Longprae boih ah Tamthang Kahoih thuih ih hmuenh kruekah hi nongpui mah a sak ih hae angmah pahnet thaih han aiah thuih poe ah om tih,” tiah a naa.

Judas Mah Paipi Alae Hanah Naakrak

¹⁴ Topacoengah hnukbangnawk thungih longto Judas Iskariot naa pae o ih loa qaihma kacoetanawk khaeah a caeh moa,

¹⁵ “Jesuh nuiah paipi alae nahaeloa nangcae mah timaw nang paek o han?” tiah a duengh. Anihcae mah maku tangka quithumto a kroek o moa a paek pae o.

¹⁶ Tona kazit hoiloa Judas mah Jesuh to anihcae ban ah paek hanah atue kahoih to angang.

Takantak Poi Duembuh Cakhaih

¹⁷ Tae thuh ai takaw Poi ani hmaloe koek ah a hnukbangnawk loa Jesuh khaeah angzoh o moa, “Naamaw Takantak duembuh cakhaih to kang sak pae o coek han na koeh?” tiah a duengh pae o.

¹⁸ Anih mah, “Vangpui thungah kami longto ih im ah caeh oloa ‘Kaicae ih Patukkung mah atue loa a phak boah, ka hnukbangnawk hoi nang im ah Takantak Duembuh cak han ka koeh o,’ a ti tiah thui pae oah,” tiah a naa pae.

¹⁹ A hnukbangnawk mah Jesuh mah a thuih pae batiah Takantak Duembuh to aroep o.

²⁰ Duembang phak na-ah Jesuh hoi a hnukbangnawk loa buh angvai hanah anghnut o.

²¹ Buh a cak o nathuemah Jesuh mah, “Kang thuih o: Nangcae thungih longto mah kai nuiah paipi alae tih,” tiah a naa.

²² A hnukbangnawk loa paroeai palungset o moa longto pacoeng longto mah, “Angraeng, kai hae maw?” tiah a duengh o.

²³ Jesuh mah, “Kai hoiah nawnto sabae thungah takaw ka nup mah kai nuiah paipi alae tih.

²⁴ Cabu Kacai mah a thuih ih batiah Kami Capa loa dueh tih, to-e Kami Capa nuiah paipi alae kami hanih loa khosak a bingh! To kami loa zah aiah om ngala nahaeloa anih hanih loa hoih kue han tomah,” tiah a naa.

²⁵ Paipi alaekung Judas mah, “Patukkung, kai na thuihkoehhaih ih maw?” tiah a duengh. Tona-ah Jesuh mah, “Nangmah na thuih boah to loa,” tiah a pathim.

Angraeng Duembuh

²⁶ Buh a cak o li na-ah Jesuh mah takaw to a lak, kawn kho a phoeh pacoengah a aeh moa a hnukbangnawk khaeah a paek. “Hi loa kai ih takbum ni, la oloa caa oah,” a naa.

²⁷ Topacoengah boengloeng to doeh a lak, Sithaw khaeah kawn lok a thuih pacoengah anihcae khaeah a paek moa, “Nangcae boih mah nae oah,” tiah a naa.

²⁸ “Hi loa ka thii ni. Sithaw ih loktaphaih angcaksak han hoi zae tahmenhaih hanah kami paroeai han-iah ka thii ka long ni.

²⁹ Loktang kang thuih o: Pa ih Prae ah nangcae hoiah misurtui kangtha ka naek airoek hi misurtui hae ka nae let mak ai boah,” tiah a naa.

³⁰ Topacoengah laa quito a sak o moa Oliv mae bangah a caeh o.

Piter Angphattakhaih A Thuihcoek

³¹ Topacoengah Jesuh mah anihcae khaeah, “Vaiduem roeroe ah nangcae boih mah na cawn o tak king ueloa kaimah khueh ah amcin sut tih, kawmawtiah Cabu Kacai mah, ‘Sithaw mah tuukroekung to hum ueloa tuuhu thungih tuu to ampraek dung tih,’ tiah a thuih.

³² To-e duekhaih thung hoitoah angthawksak let ah ka oh na-ah Galili ah nangcae hma-ah ka caeh han,” tiah a naa.

³³ Piter mah Jesuh khaeah, “Mi kalah mah na cawntak king langla cadoeh kai loa kang cawnhtak mak ai,” tiah a naa pae.

³⁴ Jesuh mah Piter khaeah, “Loktang ta-ah kang thuih: Vaiduem aa khong ai nahlanah, ‘Angmah to ka panoek ai tiah vai thumto na thuii tih,” tiah a naa pae.

³⁵ Piter mah, “Nang hoiah duek nawn han om langla doehsoe natuek doeh kangphat tak mak ai,” tiah a naa pae. A hnukbang kalahnawk boih mah doeh totiah a thuih o toengh.

Gethsemani Ah Jesuh Khophoeh

³⁶ Topacoengah Jesuh loa a hnukbangnawk hoiah Gethsemani naa pae o ih hmuenh ah a caeh moa anihcae khaeah, “Hoah ka caeh moa khophoeh nahlanah hiah hae anghnu oah,” tiah a naa pae.

³⁷ Piter hoi Zebedi capa longhnetto a caeh haih. Palung a set parai moa omtui ai.

³⁸ Topacoengah anihcae khaeah, “Palungdawn angpho loiah tapok han thuih. Hiah om oloa iip aiah kai hae na toep o haih bo ah,” tiah a naa pae.

³⁹ Jesuh loa kahla kue ah a caeh, long ah to tabok moa, “Pa, angcoeng thaih nahaeloa hi patang khanghaih boengloeng hae na takhoe pae ving ah, to-e kai koehhaih ih batiah oh na hmah soeloa na koehhaih ih batiah oh na soe,” tiah kho a phoeh.

⁴⁰ Topacoengah a hnukbang longthumto khaeah amlaem let moa ka iip boih to a hnuk, Piter khaeah, “Tipongmaw nitue maeto thung boe doeh iip aiah nang zing o thaih ai?

⁴¹ Zaepacunghaih thungah namtimh o han aiah hak oloa khophoeh oah. Pakhra mah loa a koeh, to-e takngan loa tha a hnaem,” a naa pae.

⁴² Jesuh loa vaito a caeh let, kho a phoeh bae moa, “Pa, hi patang khanghaih boengloeng hae ka nae aiah takhoe thaih ai nahaeloa, na koehhaih batiah oh na soe,” tiah khophoeh.

⁴³ A hnukbang long thumtonawk khaeah vaito amlaem let bae moa ka iip toengtoeng to a hnuk bae; mik doeh padai o thaih ai roeroe.

⁴⁴ Jesuh mah a caehtak let bae moa apathumhaih iah khophoeh kok ih batiah kho a phoeh bae.

⁴⁵ Topacoengah a hnukbang longthumto khaeah to amlaem let moa anihcae khaeah, “Vaihi setto na iih o moa nang hak o vop maw? Khen oah! Kami Capa loa kami kazaenawk ih hmuen sakthaihaih ih akaa thungah paek hanah atue loa a phak boah.

⁴⁶ Angthawk oah, caeh o sih boah. Khen oah! Kai nuiah paipi alae kami to ang phak boah hae,” tiah a naa.

Jesuh Naehhaih

⁴⁷ Jesuh lok a thuih li na-ah hnukbang hlaihnetto thungih longto Judas to ang phak. Qaihma angraengnawk hoi kacoetanawk mah patoeh ih mipui, songsen hoi thingboeng ka sinnawk to angzoh haih.

⁴⁸ Paipi alaekung mah mipui to amathaih to a thuih pae coek boah moa, “Kaimah ka mok ih kami to na naeh koeh o ih kami to ni,” tiah a naa pae.

⁴⁹ Judas mah Jesuh to a caehthuih moa, “Patukkung, na nuiah monghaih oh na soe,” tiah thuih moa a mok roep.

⁵⁰ Jesuh mah, “Kampui, namsakhaih ih to karang ah sah lai ah,” tiah a naa. Topacoengah mipui to ang phak, Jesuh to a naeh o moa kacak ta-ah pahlet o.

⁵¹ Jesuh hoiah ka om nawn longto mah songsen to a phong moa Qaihma Kalen misong ih a naa to tuk pae pat.

⁵² Tona-ah Jesuh mah, “Na songsen loa tabu thungah khrum let ah. Songsen ka patoh loa songsen hoiah dueh toeng tih.

⁵³ Pa khaeah abomhaih ka hnik thaih moa karang ah vanmi risa bu to hahlaihnetto ponghdoeh kamhlai ang patoeh thaih tito na panoek o ai maw?

⁵⁴ To-e totiah om soehaeloa Cabu Kacai mah hitiah om roe tih, tiah a thuih ih to kawbangmaw akoep thaih tih loa?” tiah a naa.

⁵⁵ Topacoengah Jesuh mah mipui khaeah to, “Kai hae kamqu kamca batih toengah nang dawn o moa, songsen hoi thingboeng hoi kai naeh hanah nangzoh o thuih hut? Ni kruekto Tempal thungah kanghnut moa kang patuk o na-ah mimah doeh na naeh o ai bae loa?

⁵⁶ To-e tahmanawk mah Cabu Kacai thungah tarik ih acunghaih hanah ni hibatih hae a oh,” tiah a naa. Tona-ah a hnukbangnawk boih mah Jesuh to a caeh o tak moa a cawnh o tak phang.

Kawngsi Hma-ah Jesuh Lokcaekhaih

⁵⁷ Jesuh to ka naeh kungnawk mah Qaihma Kalen Kaiafas im ah a caeh o haih moa toah to Tawklok patukkungnawk hoi Judah kacoetanawk to amkhueng o cu.

⁵⁸ Piter loa kahla parai hoitoah Qaihma Kalen ih salong khoekto a baang. Salong ah akun moa kawbangah maw om tih tito khet han koeh ah misa ka toepkungnawk hoiah anghnut o nawn.

⁵⁹ Qaihma kacoetanawk hoi lokcaek kungnawk boih mah Jesuh to a hum o thaih hanah a pazaehaih ih to pakrong pae o.

⁶⁰ Kami zetpui tacawt o moa a pazaehaih to amsawn amlai ah thuih o eloa zaehaih tita doeh hnuh o ai. Hnukkhuem ah loa kami longhnetto angzoh moa,

⁶¹ “Hi kami mah, ‘Sithaw ih Tempal to ka phraek boih moa ni thumto pacoengah ka sak let han,’ a tih,” tiah a thuih hoi.

⁶² Tona-ah Qaihma Kalen loa angdoet moa Jesuh khaeah, “Hitiah zae angnet o hae na pathim thaih ai maw?” tiah a duengh.

⁶³ To-e Jesuh loa tidoeh thui ai. Topongah Qaihma Kalen loa a thuih let bae moa, “Kahing Sithaw hmin palawk hoiah kang thuih: Nang hae Sithaw Capa Messiah tangtang maw tangtang ai, thui ah,” tiah a naa.

⁶⁴ Jesuh mah, “Nangmah na thuih boah to loa! To-e loktang ta-ah kang thuih: Vaihi kazit hoiloa Kami Capa hae Cungri sahthai Sithaw ih bantang bangah kanghnu moa van tamai nuiah kangzo to na hnuh tih,” tiah a naa pae.

⁶⁵ Tona-ah Qaihma Kalen loa angmah ih kahni to asih moa, “Hi kami loa Sithaw a thuihsae! Saksi kalah aloe ai boah. Sithaw thuihsaehaih ih loa vaihi na thaih o boih boah!

⁶⁶ Kawbangmaw na dawn o?” tiah a duengh. Anihcae mah, “A zae roeroe, duek han a krak,” tiah pathim o.

⁶⁷ Topacoengah mikhmai ah tamtui pathoih o thuih moa a boh o. Ka tabaengnawk mah,

⁶⁸ “Messiah, tahma batiah na thui khae! Mimah maw nang to tabaeng?” tiah a naa o.

Piter Mah Jesuh Angphattak

⁶⁹ Piter loa tasabang, im salong thungah anghnut na-ah Qaihma Kalen ih tamtoeh nongpui longto angzoh moa, “Nang doeh Galili prae ih Jesuh hoiah ka om nawn toeng ni,” tiah a naa.

⁷⁰ To-e Piter mah anihcae boih hma-ah angphat moa, “Timaw na thuih ka panoek ai,” tiah a naa.

⁷¹ Tona-ah Piter loa imhma khongkha bangah to caeh ving. Tamtoeh kalah nongpui mah a hnuk bae moa, “Hi kami loa Nazareth Jesuh hoiah ka om nawn ni,” tiah toah kaom kaminawk boih khaeah a naa pae.

⁷² Piter loa angphat let bae moa, “To kami loa ka panoek ai tiah saephoehhaih hoiah ka thuih,” tiah pathim.

⁷³ Oh hroem pacoengah to hmuenh ah kangdoenawk to angzoh o moa Piter khaeah, “Angphat mut hmah, nang doeh anihcae thungih kami longto toeng ni. Na loklaang apaeh ih pongah amtueng,” tiah a naa o.

⁷⁴ Topongah Piter mah, “Saephoeh hoiah loktang ka thuih. Kamlai nahaeloa Sithaw mah danpaek na soe! Hi kami hae ka panoek ai roeroe,” tiah a naa. Topacoeng hoiloa aa khong roep moa,

⁷⁵ Piter loa Jesuh mah thuih coek ih, “Aa khong ai nahlanah ka panoek ai tiah vai thumto nangphat tak tih,” tiah a naa ih lok to a dawn hlet let. Tasabang ah tacawt moa palung kasae ah a qah homhom.