Mathai 24 - Asang Khongso New Testament

Tempal Amro Han Kawng A Thuih

¹ Jesuh loa angthawk moa Tempal hoitoah a caeh na-ah a hnukbangnawk to anih khaeah angzoh o moa Tempal ih imnawk to a patuek pae o.

² Jesuh mah, “Hinawk boih hae hoihdak ta-ah na khet o. Loktang ta-ah kang thuih o: Hi hlung hae maeto boe doeh a ohhaih ih ahmuenh ah om mak ai, tonawk boih to vah king ah om tih,” tiah a naa.

Raihaih hoi Pacaekhlaekhaih

³ Jesuh loa Oliv maenui ah anghnut na-ah a hnukbangnawk loa anih khaeah angmahcae khueh tamqu lamah angzoh o. Anihcae mah, “Hi hmuen hae natuekah maw om tih? Moa nangzoh lethaih tue hoi dungh aboenghaih tue amathaih han-iah ti hmuen to maw ka om han?” tiah a duengh pae o.

⁴ Jesuh mah, “Acoe oh, mimah na lingma o hmah na soe.

⁵ Kami paroeai mah ka hmin hoiah angzo o ueloa, ‘Kai hae Messiah ni,’ tiah thui o ueloa kami paroeai to aling o tih.

⁶ Loklam kahnai ah doehsoe, lam kahla ah doehsoe, misa angtukhaih tamthang tamli to na thaih o tih, to-e mawn o hmah. Tobatih hmuen to loa om roe tih, to-e aboenghaih a phak boah tihaih ih na ai vop ni.

⁷ Prae maeto hoi maeto angkat tih, caeng maeto hoi maeto angtuh tih. Longprae ahmuenh kruekah takangthohhaih hoi talihnawhhaih to om tih.

⁸ Hi hmuennawk boih hae naukzah tom na-ih zok kana amtonghaih tangsuek batih ni a oh.

⁹ “Topacoengah na naeh o ueloa raekrai han hoi hum hanah minawk ban ah na paek o tih. Kai hanih pongah caeng kaminawk boih mah na hnumaa o tih.

¹⁰ Tona-ah kami paroeai mah taanghaih to prawt o sut tih. Longto hoi longto nuiah paipi alae o ueloa longto hoi longto anghnuma o tih.

¹¹ Topacoengah tahma kaling paroeai tacawt o ueloa kami paroeai aling o tih.

¹² Zaehaih pung tahang ueloa kami paroeai ih amlunghaih to loa amding tih boah.

¹³ To-e ami doeh aboeng khoekto kacak ah kangdoe loa pahlong ah om tih.

¹⁴ Topacoengah caeng kaminawk boih khaeah saksi ah oh hanah Van Poenghaih kawng Tamthang Kahoih to longprae bum boih ah thuih taphong ah om tih. Topacoengah ni loa aboenghaih to pha tih.

Panuetsoeh Hmuen Zitman Kathok

¹⁵ “Tahma Daniel mah a thuih coek ih, ‘Zitman kathok panuetsoeh hmuen,’ to na hnuh o tih. Ato panuetsoeh hmuen to loa ahmuenh kacai ah angdoe tih. (Hi ca ka kroekkung: A thuihkoehhaih ih hae thaihkop oah.)

¹⁶ Topacoengah Judea prae ih kaom kaminawk to maenui ah cawn o na soe.

¹⁷ A imphu nuiah kaom kami longlongto mah imthung ih hmuenmae to la na hmah soe.

¹⁸ Lawk ah kaom kami longlongto mah kahni lak hanah im ah amlaem hmah laih soe.

¹⁹ To tue to ni ah loa zokbum ah kaom nongpuinawk hoi naukta kanauk kakaem amnonawk hanih loa natanto maw khosak bing o tih.

²⁰ Sik tue thuemah maw tiaibaloa Sabbath ni ah maw puencawnhaih tue ah oh moeng han aiah Sithaw khaeah khophoeh oah.

²¹ Kawmawtiah long thaep tangsuek hoikamtong vaihni khoekto kaom vaih raihaih pongdoeh zitman ka om koek raihaih to om tih. Tobatih raihaih to tita doeh om let mak ai boah.

²² To tue to Sithaw mah duemhsak ai nahaeloa kahing mita doeh om mak ai. To-e Sithaw mah qoih ih kaminawk hanih loa atue to duemsak tih.

²³ “Tona-ah kami longlongto mah, ‘Khen ah, hiah Messiah a oh,’ tiaibaloa ‘Hoah a oh,’ tiah na thui o nahaeloa taang o hmah.

²⁴ Kawmawtiah Messiah kamlai hoi tahma kalingnawk to tacawt o tih, angcoeng thaih nahaeloa Sithaw mah qoih ih kaminawk mataeng doeh aling hanah dawnraihaih hoi amathaih ih kalen puipuinawk to sah o tih.

²⁵ Tahngai oah! Atue ani mah phak ai nahlanah hi hae kang thuih o coek boah.

²⁶ “Mimah, ‘Khen ah, anih loa praetanghaeng ah a oh,’ tiah na naa nahaeloa caeh o hmah. ‘Hiah anghawk hae,’ tiah na thui nahaeloa taang o hmah.

²⁷ Kawmawtiah niangzae bang hoitoah niduem khoekto nilavan bum boih ah mikkhrip toklaek ah tangphra ka puek batiah Kami Capa loa angzo tih.

²⁸ “Kadueh qok ohhaih ahmuenh kruekah langta angpop o tih.

Kami Capa Angzohhaih Kawng

²⁹ “Ato raihaih tue to aboeng pacoeng rumhoi loa khoving khoep tih, khra mah amdueng mak ai tih, van ih sakaenawk to krah ueloa van ih kaom thaohhaih ihnawk boih to a caehhaih ih lam hoitoah angkhraeng o dung tih.

³⁰ Tona-ah Kami Capa angzohhaih ih amathaih to nilavan ah amtueng tih; Kami Capa to van ih tamai nuiah hmuensak thaihaih hoi, a lensawkhaih hoiah kangzo to a hnuk o na-ah long kaminawk boih mah qah o tih.

³¹ Mongka katuen parai to ueng o ueloa long takii palito ah angmah ih vanminawk to patoeh tih; long aboenghaih hapbang hoitoah hapbang roekto ah ka om qoih kok ih kaminawk to angqum o cu tih.

Thaiduet Kung Hoitoah Amtukhaih

³² “Thaiduet kung mah palunghahaih ih hmuen maeto patuk o na soe. Thaiduet tanghang loa ka hingsuer ah tadok moa aqam kanauk tacawt na-ah nipui tue a hnaih boah, tito na panoek o.

³³ Tobatih toengah hi hmuennawk boih na hnuk o na-ah atue loa hnaih boah, amtong duih boah, tito na panoek o tih.

³⁴ Hi hae pahnet o hmah: Vaihi dung ih kahing kaminawk dueh boih ai na-ah hi hmuennawk boih hae na thok tih.

³⁵ Van hoi long loa anghma boih tih, to-e ka lok loa natuek doeh anghma mak ai.

Mimah Doeh Ani hoi Atue Panoek Ai

³⁶ “To ni hoi tue loa van ih kaom vanminawk mah doehsoe, Capa mah doehsoe, mimah doeh panoek ai; Pa khueh mah ni panoek.

³⁷ Kami Capa angzohhaih loa Noah dung ih hmuen kaom batih toengah ni om tih.

³⁸ Tuisakring thoh ai nahlanah, Noah palong thungah akun ni khoekto kaminawk loa a cak a naek o, zu a lak o moa sava doeh a sak o.

³⁹ To-e tuisakring thoh moa pazawk o bat airoek loa kawbangmaw om tih tito panoek o ai. Kami Capa angzoh na-ah loa tobatih toengah ni loa om tih.

⁴⁰ Tona tue ah lawk ah tok ka sah kami longhnetto thungah longto loa lak ving ah om ueloa longto loa tang sut tih.

⁴¹ Nongpui longhnetto sum ka daeng thungah longto loa lak ving ah om ueloa longto loa a suek sut ah om tih.

⁴² “Topongah acoe hoiah om oah; kawmawtiah Angraeng angzohhaih atue hoi ani to na panoek o ai.

⁴³ Im tawnkung mah kamqu angzoh hanih atue to panoek nahaeloa iip aiah hak ueloa kamqu to im thungah akunsak mak ai.

⁴⁴ Topongah coengcoe ta-ah om oah, kawmawtiah Kami Capa loa na poeklak o ai ih atue ah angzo tih.

Oepthok hoi Oepthok Ai Tamtoeh

⁴⁵ “Totibaloa mimaw oeptaang ka om hoi tamtoeh kacing ah om tih? Oeptaang ka om hoi kacing tamtoeh naa pae ih loa angmah ih angraeng mah tamtoeh kalahnawk khenzawnkung ah suek ah ka om moa atue na-ah anihcae hanah caknaek ka paek kami to ni.

⁴⁶ A tok ka sah li to angmah ih angraeng angzoh na-ah hnuh nahaeloa natanmaw ato tamtoeh loa palung anghoe tih?

⁴⁷ Loktang kang thuih o: To tamtoeh loa angmah ih angraeng mah a vawnsai boiboih khenzawnkung ah suem tih.

⁴⁸ To-e tamtoeh to kahoih ai nahaeloa ka angraeng loa angzo mak ai vop, akraa parai vop tih ti ueloa

⁴⁹ angmah ampui tamtoehnawk to bop ueloa mu paquinawk hoiah nawnto caa nae ah om o tih.

⁵⁰ Topacoengah angmah ih angraeng loa poeklak ai ih ani, panoek ai ih atue ah angzo let tih.

⁵¹ Ato angraeng mah anih to a boengh a tumh ah takroek ueloa laiha kaminawk ohhaih ahmuenh ah to ohsak tih. Toah to qah hoi haa ta-aihhaih to om tih.