Mathai 23 - Asang Khongso New Testament

Jesuh Mah Acoehaih A Paek

¹ Moa Jesuh loa mipuinawk hoi a hnukbangnawk khaeah lok a thuih.

² “Tawklok patukkungnawk hoi Farasinawk loa Mosi ih Tawklok thuihpacaih kungnawk ni.

³ Topongah a thuih o ihnawk boih to na tahngaih moa na pazui o han angaih. To-e hmuen a sak o ihnawk to loa amtuk o hmah, kawmawtiah a thuih ih to sah o ai.

⁴ Minawk ih naam nuiah hmuenzit puipui komh pae o sut moa phaw o thaih ai, to-e angmahcae mah loa ato hmuenzit to phawh haih bom hanah banpazung hoi boe doeh sui han koeh o ai.

⁵ Minawk mah a hnuk o hanih khueh to ni tiboih to a sak o. Anihcae ih lutae hoi bantampawk ah a zaeng o ih nuiah Cabu Kacai tarik ih lukom hoi bankomnawk loa natanmaw a lenh, khen o e! Anihcae ih kahnitomnawk doeh natanto maw a sawk, khen oah!

⁶ Anihcae loa poi kungah anghnuthaih ih ahmuenh kahoih koek to a koeh o moa sinakok ah anghnuthaih suek pae roeh to a koeh o.

⁷ Vawnsai zawhhaih hmuenh ah mimah khangzahaih paek to a koeh o moa, ‘Patukkung’ tiah kawk to a koeh o.

⁸ To-e nangcae to, ‘Patukkung,’ tiah kawk han om ai. Kawmawtiah nangcae loa imthungtako maeto thungih naukamzanawk boih ah na oh o moa Patukkung longto khueh ni na tawnh o.

⁹ Topacoengah longnui ah hae ami doeh, ‘Pa,’ tiah kawk han om ai. Kawmawtiah nangcae loa van ih kaom nam Pa maeto khueh to ni na tawnh o.

¹⁰ Tokhueh aiah ami doeh, ‘Pahoikung,’ tiah kawk han om ai. Kawmawtiah nangcae loa pahoikung longto khueh na tawnh o moa anih loa Messiah ni.

¹¹ Nangcae thungih kalen koek kami loa nangcae ih tamtoeh ah oh han a oh.

¹² Ami doeh angmah hoi angmah to kamsang loa ahlim ah krah ueloa ami doeh mi hlimah kangbaih loa kalen ah pasanghaih om tih.

Anihcae Ih Laihahaih A Thuihsae

¹³ “Tawklok patukkungnawk hoi Farasinawk, nangcae han khosak a bingh! Nangcae laiha kaminawk! Van Poenghaih thok to minawk akun thaih han aiah na khah pae o khoep moa nangmahcae to doeh akun han na koeh o ai bae; akun ka koeh kaminawk han to doeh paongh han na koeh o ai.

¹⁴ (“Tawklok patukkungnawk hoi Farasinawk, nangcae han khosak a bingh! Nangcae laiha kaminawk! Lumhmainawk to na lingma o moa anihcae ih imnawk to na lomh pae o; topacoengah minawk mah hnuk na-ah ka sawk paraiah kho na phoeh o. Hitiah na oh o pongah raekhaih kana aep to na tongh o tih.”)

¹⁵ “Tawklok patukkungnawk hoi Farasinawk, nangcae han khosak a bingh! Nangcae laiha kaminawk! Kami longto palungthin alaihsak hanah tuiculi ah palong hoi na caeh o moa prae bum boih namkaeh o. Palungthin kalaih longto na hak o na-ah ato kami to hell ah krak hanah nangmahcae pongdoeh a let hnetto patang khang hanah na sak o.

¹⁶ “Nangcae pahoikung mikmaengnawk, nangcae han khosak a bingh! Nangcae mah, ‘Kami longlongto mah Tempal hmin palawkhaih hoiah lok a taap baloa ato loktaaphaih ih to cak ai, to-e Tempal thungih kaom sui hmin to palawkhaih hoiah lok a taap baloa ato loktaaphaih ih to cak,’ tiah na patuk o.

¹⁷ Mikmaeng hoi kamthunawk! Natomaw a lokpui koek? Sui maw, tiaibaloa sui ka thoengcai sakkung Tempal maw?

¹⁸ Tokhueh aiah, ‘Kami longlongto mah bokting hmin to palawk hoiah lok a taap baloa ato loktaaphaih ih to cak ai; to-e bokting nuiah kaom hmuenpaek ih palawk hoiah lok a taap baloa ato loktaaphaih ih to cak,’ tiah na thuih o.

¹⁹ Natanto maw mik na maengh o! Natomaw lokpui koek? Hmuenpaek ih to maw, hmuenpaek ih ka thoengcaisakkung bokting to maw?

²⁰ Topongah mimah bokting palawk hoiah lok a taap na-ah bokting hoi bokting nui-ih kaom hmuenpaek ih boiboih to doeh a palawk maek boah.

²¹ Tempal palawkhaih hoiah lok a taap na-ah Tempal hoi ato thungih kaom Sithaw to doeh palawk maek boah.

²² Topacoengah kami longlongto mah van palawkhaih hoiah lok a taap na-ah Sithaw ih tangkhang hoi a nui-ih kanghnu to doeh palawk maek ah oh boah.

²³ “Tawklok patukkungnawk hoi Farasinawk, nangcae han khosak a bingh! Nangcae laiha kaminawk! Nangcae mah sungpram, sungsin hoi sungkengnawk to Sithaw khaeah hato maeto na paek o; to-e Tawklok thungih lokpui tangtang ah ka om tara thuemhaih, mi palungnathaih hoi oepohhaih ihnawk to na pazui o ai moa na dawncang o ai. Hinawk hae na sak o han oh roeroe, kalahnawk to doeh pahnawt hloe aiah.

²⁴ Pahoikung mik kamaengnawk! Taksae to ka nae o haih moeng tih na ti o moa na huih o, to-e kala-uk to na palawi o!

²⁵ “Tawklok patukkungnawk hoi Farasinawk, nangcae han khosak a bingh! Nangcae laican kaminawk! Na boengloeng hoi sabae to anuibang khueh to kacaipin ah na pasaeh o moa athungbang loa mi ih hmuen lomhhaih hoi kaoeloe koehhaih ih palungthin hoiah a koi.

²⁶ Farasi mikmaengnawk! Na boengloeng athungbang to pasae o hmaloe ah, totibaloa anuibang to doeh cai toengh tih.

²⁷ “Tawklok patukkungnawk hoi Farasinawk, nangcae han khosak a bingh! Nangcae laiha kaminawk! Nangcae loa rong kanglung nok ih taprong hoiah ni nahmong o; tasabang loa khet hoih parai e a athungbang aloa kami huh hoi ka qongh ka prawn to ni a koi.

²⁸ Tobatih toengah tasabang khet na-ah loa mi boih hanah kami kahoih ah namtueng o, to-e athungbang aloa laihahaih hoi zaehaih hoiah na koi o.

Anihcae Raekhaih Han To A Thuih

²⁹ “Tawklok patukkungnawk hoi Farasinawk, nangcae han khosak a bingh! Nangcae Laiha kaminawk! Tahmanawk aphumhaih taprong to kahoih ah na sak pae o moa kami kacainawk ih taprong to na pathoep pae o.

³⁰ Nangcae mah, ‘Zanghnii saezanawk dung thuemah ka hingh o nahaeloa anihcae mah a sak o ih to ka sah o mak ai ueloa tahmanawk doeh ka hum o mak ai han tomah,’ na ti o.

³¹ Totiah na thuih o na-ah hae nangmahcae roeroe to tahmanawk ka humkungnawk ih catawn ah na oh o tito namtuengsak o.

³² Topongah nangcae ih saezanawk mah patong o tangcae ih hmuen to nangcae mah pacoeng o ngala ah.

³³ Nangcae pahuinawk, pahui cadiinawk! Hell ah krakhaih thung hoitoah loih hanah kawbangmaw na oepdoeng o thaih loa?

³⁴ Topongah kang thuih o: Nangcae khaeah tahmanawk hoi kacing kaminawk hoi patukkungnawk to kang patoeh han; thoemto loa na hum o tih, thoemto loa kraws ah takhing o tih, thoemto loa sinakok thungah bop o ueloa vang maeto hoi vang maeto ah na pakak o tih.

³⁵ Topongah zae tawn ai kaminawk boih to hum pongah raekhaih nangcae nuiah krah tih. Zae tawn ai Abel hoikamtong Tempal hoi bokting salak ah na hum o ih Berekhiah capa Zekhariah karoekto, anihcae ih athii longh tho loa nangcae nuiah krah tih.

³⁶ Loktang ta-ah kang thuih o: Hi kaminawk na hum pongah raekhaih loa vai tahang dung kaminawk nuiah krah boih tih,” tiah a naa.

Jesuh Mah Jerusalem Palunghaih

³⁷ Jesuh mah, “Jerusalem, Jerusalem! Nang khaeah patoeh ih tahmanawk to na hum moa nang khaeah Sithaw mah patoeh ih laicaenawk to hlung hoiah na vah. Aapui mah a caanawk to a pakhrae hlimah a kuuhoihhaih batiah nang ih kaminawk boih to ka ban hoiah takaem hanah avaih paroeai kangcaeng boah e na koeh o ai.

³⁸ Topongah na Tempal loa pahnawt sut ah om ueloa a kokkak ah om tih boah.

³⁹ Kang thuih o, ‘Angraeng hmin hoiah kangzo loa tahamhoihhaih paek na soe,’ na ti o airoek loa vaihi hoikamtong nang hnuh o mak ai boah,” tiah a naa.