Mathai 20 - Asang Khongso New Testament

Misur Takhaa Thungih Toksahkungnawk

¹ Jesuh mah, “Van Poenghaih loa hitiah ni a oh. Takhaa tawnkung longto loa misur takhaa thungah tok kasah hanih kami pakrong hanah khawnbang khawnthaw ah tacawt.

² Nito tok thamhtho paek noek batiah maku tangka krapto paek hanah naa a krak o moa anihcae to takhaa ah patoeh.

³ Anih loa akhawnbang nitue takawtto na-ah vawnsai zawhhaih hmuenh ah to a caeh moa kami thoemto tidoeh ka tok ai, to hmuenh ah kangdoe sut romramnawk to a hnuk.

⁴ Tona-ah anihcae khaeah, ‘Nangcae doeh caeh o toeng loa takhaa thungah tok oah, toktho loa kating katawk ah kang paek o han,’ tiah a naa pae.

⁵ Topongah a caeh o. Tobatih toengah nitue hlaihnetto hoi duembang nitue thumto na-ah kami kalah to patoeh bae.

⁶ Duembang nitue pangato phak tom na-ah vawnsai zawhhaih hmuenh ah a caeh bae moa kami kalah thoemto to hmuenh ah kangdoe nganglang to a hnuk. ‘Tipongmaw tidoeh sah aiah thunqui nangdoet tuek moa atue na boengsak o?’ tiah a duengh.

⁷ Anihcae mah, “Mimah doeh toksak han nahloeh ai pongah ni,” tiah pathim pae o. Anih mah, “Totibaloa nangcae doeh takhaa ah caeh oloa tok o toeng ah,” tiah a naa pae.

⁸ “Duembang phak na-ah loa takhaa tawnkung mah takhaa ukkung khaeah, ‘Toksahkungnawk to kawk aloa toktho paek pae ah, hnukkhuem koek ah ka toknawk hoitoah amtong loa hmaloe koek ah ka toknawk khoekto paek ah,’ tiah a thuih pae.

⁹ Topongah nitue pangato na-ah ka toknawk to maku phoisa maeto a paek rip.

¹⁰ Topongah hmaloe koek ah ahloeh ihnawk to toktho lak hanah angzoh o toeng na-ah ka pop kue ah hnuh o tih tiah a dawn o; to-e anihcae to doeh maku phoisa maeto toengh ni loa a paek pae o rip.

¹¹ Tangka to a lak o moa takhaa tawnkung nuiah laisaep o.

¹² Anihcae mah, ‘Hnukkhuem koek ah ahloeh ih kaminawk loa nitue maeto khueh ni a tok o; kaicae loa nithun niduem ping ah nikhra kana thungah ka tok o, to-e kaicae na paek zetto anihcae doeh na paek toengh,’ tiah a naa o.

¹³ “ Tona-ah takhaa tawnkung mah longto khaeah, ‘Ampui, tahngai ah!’ Nang to kangling ai. Nito tok saktho to maku phoisa maeto hak hanah lok na thuih o na ai maw?

¹⁴ Toktho to vaihi la oloa im ah caeh o lai ah. Hnukkhuem koek ah kahloeh ih kami hae nangcae kang paek zetto paek toengh hanah ka koeh.

¹⁵ “Kaimah ih tangka loa ka koehkoeh batiah ka patoh a thoeng na ai maw? Tiaibaloa kuu kahoih pongah nang ut o maw?” tiah a naa.

¹⁶ Topacoengah Jesuh mah, “Tobatiah hnukkhuem koek loa hmaloe koek ah om o ueloa hmaloe koek loa hnukkhuem koek ah om o tih,” tiah a naa.

A Duekhaih Kawng A Thuih Pathumhaih

¹⁷ Jesuh loa Jerusalem bangah a caeh li nathuemah a hnukbang hlaihnetto to kalah bangah ahoih moa angmahcae khueh ah caeh lamah lok aram haih.

¹⁸ Anih mah anihcae khaeah, “Tahngai oah! Jerusalem ah ka caeh moa toah to Kami Capa hae qaihma Kacoetanawk hoi Tawklok patukkungnawk ban thungah paek ah om ueloa hum hanah zaenet o tih.

¹⁹ Topacoengah Gentelnawk ban ah na paek o ueloa anihcae mah tamhnuih lok na sah o haih tih, na bop o ueloa kraws nuiah takhing o tih. To-e ni pathum ni ah angthawksak let ah ka om tih,” tiah a naa pae.

Amno Mah A Hnik Pae

²⁰ Topacoengah Zebedi ih a zu loa a caa hnit hoiah Jesuh khaeah angzoh. A hma-ah tabok moa a koeh ih maeto saksak hanah tahmenhaih a hnik.

²¹ Jesuh mah anih khaeah, “Timaw na koeh,” tiah a duengh. Anih mah, “Sangpahrang ah na oh na-ah ka caa hnit hae na bantang hoi banqoi bangah anghnut hanah lok amaih,” tiah a naa pae.

²² Jesuh mah a caa hnit khaeah, “Na hnik hoi ih to na panoek hoi ai. Ka naek hanih patang khanghaih boengloeng hae na naek hoi thaih han maw?” tiah a duengh. Anih hnit mah, “Ka naek hoi thaih han,” tiah a pathim pae hoi.

²³ Jesuh mah anih hnit khaeah, “Nang hnit mah kai ih boengloeng hae na nae hoi thaih tangtang doeh om tih. To-e ka bantang hoi banqoi bangah mimaw anghnu tih tito ka qoii thaih ai. Hi hmuenh loa kam Pa mah paroep pae coek ih kaminawk hanih ni,” a naa pae.

²⁴ To lok to a hnukbang kalah mi hato mah a thaih o na-ah naukamza hnit nuiah palung a phui thuih o.

²⁵ Topongah Jesuh mah tonawk boih to a kawk cu moa, “Sithaw ka panoek ai ukkungnawk loa a uk o ih kaminawk nuiah sakthaihaih ih akaa tawnh o moa pahoi kungnawk mah doeh paroeai akaa to a tawnh o, tito na panoek o.

²⁶ To-e nangcae thungah loa tobatih to oh na hmah soe. Nangcae thungih longlongto mah kalen ah oh han koeh nahaeloa kalahnawk ih tamtoeh ah oh han oh;

²⁷ nangcae thungih longlongto mah hmaloe ah oh han koeh nahaeloa nangcae ih misong ah oh han oh.

²⁸ Tobatih toengah Kami Capa loa toksak pae o hanah angzo ai, toksak han hoi a hinghaih to paek moa kami zetpui pahlong hanah ni angzoh,” tiah a naa pae.

Mikmaeng Longhnetto A Hoihsak

²⁹ Jesuh hoi a hnukbangnawk loa Jeriko to tacawt o tak na-ah kami paroeai mah a baang o.

³⁰ Mikmaeng longhnetto lamtaeng ah kanghnu mah Jesuh to anih hnit taeng ta-ah a caeh tuen to a thaih hoi na-ah, “David Capa! Kai hnit hae palungnathaih tawn rae ah, Angraeng,” tiah hangh amtong hoi.

³¹ Mipui mah a zoeh o moa oh duem hanah thuih pae o. To-e anih hnit mah, “David Capa! Kai hnit tahmen ah, Angraeng,” tiah kamsawk aep aep ah a hangh hoi.

³² Jesuh loa angdoet moa a kawk hoi maek. Anih mah, “Timaw kang sak pae han na koeh hoi,” tiah a duengh.

³³ Anih hnit mah, “Angraeng, mik aangsak han ka koeh hoi,” a naa pae.

³⁴ Jesuh mah tahmen moa mik to a sui pae hoi. Nawnetta ah mik amtueng hoi roep moa anih hnukah to a baang hoi.