Mathai 17 - Asang Khongso New Testament

Jesuh Ih Tungkraang Anglaihhaih

¹ Ni tarukto akraa pacoengah Jesuh mah Piter hoi anih ih amnauk hnit Jaem hoi Johan to ahoih, maenui ah a dawh haih moa toah angmahcae buengah oh o.

² Tona-ah anihcae mikhnuk ah Jesuh ih kraang loa anglaih ving; a mikhmai loa ni batiah aang moa khukbuenh loa anglung tamla ah sadae hlup.

³ Tona-ah hnukbang longthumto mah Mosi hoi Elijah hnit Jesuh hoiah lok ka ram to a hnuk.

⁴ Topongah Piter mah Jesuh khaeah, “Angraeng, Hiah oh hae zongoh parai; na koeh nahaeloa buk thumto ka sak han; nang hanah maeto, Mosi hanah maeto, Elijah hanah maeto,” tiah a naa pae.

⁵ Anih mah lok a thuih li na-ah tamai ka aang parai mah anihcae nuiah a khuk moa tamai thung hoitoah lok maeto mah, “Hi loa ka palung duek ih ka capa ni, anih nuiah palung kanghoe, a lok to tahngai pae oah,” tiah a thuih.

⁶ A hnukbangnawk mah lok to a thaih o na-ah paroeai tasoeh o moa long ah tabok o.

⁷ Jesuh loa angzoh moa a sui pae o, “Angthawk oh, zi o hmah!” tiah a naa pae o.

⁸ Topongah amdoengh o tahang moa Jesuh khueh tiaialoa mita doeh toah hnuh o ai.

⁹ Mae hoitoah ahum o tathuk na-ah Jesuh mah, “Hi hmuen na hnuk o ih hae Kami Capa duekhaih thung hoitoah angthawksak let ah oh airoek loa mita khaeah doeh na thui o mak ai,” tiah lok taquk.

¹⁰ Topacoengah a hnukbangnawk mah Jesuh khaeah, “Tipongmaw Tawklok patukkungnawk mah Elijah hae angzo hmaloe tih, a ti o?” tiah a duengh o.

¹¹ Jesuh mah, “Elijah angzo hmaloe tangtang tih moa tiboih boih to angmah paroep coek tih.

¹² To-e kang thuih o: Elijah loa angzoh pacoeng boah moa anih to mimah mat o ai pongah anih hanih koehkoeh batiah a sak o. Tobatih toengah Kami Capa doehsoe pacaekhlaek o tih,” tiah a naa pae.

¹³ Tona-ah a hnukbangnawk loa anih mah ang thuih ih hae Baptisma paekkung Johan kawng ni, tito thaihkop o.

Taqawk Mah Naeh Ih Naukta A Hoihsak

¹⁴ Anihcae loa mipui khaeah a amlaem o let na-ah nongpa longto Jesuh khaeah angzoh moa a hma-ah khokkhu samkrawn pae moa,

¹⁵ “Angraeng, ka capa hae na tahmen pae rae ah! Anih loa atue tue na-ah kamtim kawngkawng kami ah oh moa amtim na-ah loa hmai thungah doehsoe, tui thungah doehsoe, amtim toemtoem.

¹⁶ Nang ih hnukbangnawk khaeah kangzoh haih e anihcae mah hoihsak o thaih ai,” tiah a naa pae.

¹⁷ Jesuh mah a hnukbangnawk khaeah, “Nangcae loa ka taang thaih ai hoi ka pazae kaminawk roeroe ni. Nasetto ka kraa ah maw nangcae hoiah ka oh han vop? Nasetto ka kraa ah maw nangcae khaeah kang oh thuih han angaih tih? Naukta to hiah angzoh o haih ah,” tiah a naa pae.

¹⁸ Jesuh mah taqawk to tacawt hanah akaa a paek, naukta thung hoito tacawt moa anih loa a hoih roeprap.

¹⁹ Topacoengah a hnukbangnawk loa mi panoek aiah Jesuh khaeah angzoh o moa, “Tipongmaw taqawk hae ka pathok o thaih ai?” tiah a duengh o.

²⁰ Jesuh mah, “Nangcae mah taanghaih ka khawt na tawn o ai pongah ni. Loktang ta-ah kang thuih o: Antam mu tetto ta mah taanghaih na tawnh o nahaeloa hi mae hae, ‘Angthuii ah,’ na naa o nahaeloa angthuii halat tih. Tita doeh na sah o thaih tih.

²¹ (To-e khophoehhaih hoi buhzahhaih khueh mah ni hibatih taqawk hae pathok thaih; ti kalah hoiah doeh pathok thaih ai,” tiah a naa.)

A Duekhaih Han Kawng A Thuih Let Bae

²² A hnukbangnawk loa Galili ah nawnto angzoh o cu na-ah Jesuh mah anihcae khaeah, “Kami Capa loa minawk ban thungah paek han hnaih dui boah,

²³ to-e ni thumto pacoengah angthawksak let ah om tih,” tiah a naa pae. A hnukbangnawk loa paroeai palung a set o.

Tempal Tamut Paekhaih Kawng

²⁴ Jesuh hoi a hnukbangnawk to Kapernaum ah angzoh o na-ah Tempal tamut ka congkungnawk angzoh o moa Piter khaeah, “Nangcae ih patukkung mah tamut a paek maw?” tiah a duengh.

²⁵ Piter mah, “Ue, a paek” tiah a naa. Piter loa im thungah akun na-ah Jesuh mah lok apaeh haih hmaloe moa, “Simon, kawbangmaw na dawn? Hae longprae sangpahrangnawk khaeah mimah maw prae kalah ih hmuen akunhaih tho, tiaibaloa tamut to ka paek? Prae thungih kaminawk mah maw, tiaibaloa prae kalah kaminawk mah maw?” tiah a duengh.

²⁶ Piter mah, “Prae kalah kami mah,” tiah a naa pae. Jesuh mah, “A hoih, totibaloa prae thungih kami mah loa paek aloe ai.

²⁷ To-e hi kaminawk hae palungphuisak han ka koeh ai. Topongah tuili ah caeh aloa sakoi vah ah. Tathok hmaloe koek ih tangaa pakhaa thungah to nang hoi kai hanah tamut paek han ka khawt to na hnuh tih. Ato to la aloa aihnit taham ah anihcae to paek ah,” tiah a naa.