Mathai 15 - Asang Khongso New Testament

Saeza Kacoetanawk Ih Patukhaih

¹ Topacoengah Farasi thoemto hoi Tawklok patukkungnawk loa Jerusalem hoitoah Jesuh khaeah angzoh o moa,

² “Tipongmaw nang ih hnukbangnawk loa saeza kacoetanawk ih patukhaih lok to a aek oloa? Anihcae mah buh caa ai nahlanah ban amsae o ai,” tiah a duengh o.

³ Jesuh mah, “Tipongmaw Sithaw ih Lokpaek to na aek o moa nangmahcae ih patukhaih khueh to na pazui oloa?

⁴ Kawmawtiah Sithaw mah, ‘Nam no hoi nam pa to khangza oh! Ami doeh amno doehsoe, ampa doehsoe ka tangoeng loa dueksak han oh,’ tiah a thuih.

⁵ To-e nangcae na patukhaih ih loa kami longlongto mah amno maw, ampa maw abomhaih hanah hmuen maemaeto a tawnh ih to, ‘Hi loa Sithaw ih ni,’ a naa nahaeloa,

⁶ amno doehsoe, ampa doehsoe, khangza aloe ai boah, na ti o. Hititoah nangmahcae ih patukhaih khueh to pazui o moa Sithaw ih lokpaek to loa tidoeh tamu na suem o ai.

⁷ Nangcae laiha kaminawk! Isaiah mah nangcae kawng a thuih ih to ahmaan tangtang! Isaiah mah,

⁸ “Hi kaminawk mah pakhaa khueh hoiah kai hae khangza o, to-e palungthin loa kai hoitoah a hla o parai.

⁹ Anihcae mah kai bokhaih ih hae azompui ni, kawmawtiah kami mah sakhmang ih tawk to Sithaw mah paek ih tawk batih toengah a patuk pae o, tiah Sithaw mah thuih,” tiah a naa.

Kami kamhnongsak kung Hmuennawk

¹⁰ Topacoengah Jesuh mah mipui to angmah khaeah a kawk moa anihcae khaeah, “Tahngai oh loa thaihkop oah!

¹¹ Kami hae pakhaa thungah ka kun mah amhnongsak ai, pakhaa thung hoi-ih ka tacawt mah ni loa kami to amhnongsak,” tiah a naa.

¹² Topacoengah a hnukbangnawk to anih khaeah angzoh o moa, “Na thuih ih lok mah Farasinawk katingai palung a phuisak to na panoek maw?” tiah a naa pae o.

¹³ Jesuh mah, “Van ih kaom Pa mah hlingh ai ih thingkung boih loa a phong ah om tih,” tiah a naa.

¹⁴ Anihcae ih kawng pongah palungbaesak o hmah! Anihcae loa mikmaeng zaehoikung kaminawk ni; mikmaeng mah kalah mikmaeng to zaehoi nahaeloa tangqom thungah krah hoi maek tih.

¹⁵ Piter mah, “To lokthuih ih to kaicae khaeah kacai ta-ah na thui rae ah,” tiah a naa.

¹⁶ Jesuh mah anihcae khaeah, “Nangcae loa mi kalahnawk pongdoeh na cing o hlawt ai hae loa!

¹⁷ Na thaihkop o ai maw? Tita doeh kami ih pakhaa thungah ka kun hmuen boih loa zok thungah phak moa to hoitoah paelaep ah tacawt.

¹⁸ To-e pakhaa thung hoi-ih ka tacawt hmuen loa palung thung hoiah ka tacawt ah oh moa tonawk mah kami to anuenhsak.

¹⁹ Kawmawtiah mi humhaih, pazang sakhaih, nongpui nongpa zaehaih, kahoih ai hmuen sakhaih, amqukhaih, amlaihaih, mi kasae thuihhaih, dawnhaih kahoih kapaih ainawk boih hae palung thung hoi-ih ka tacawt ni.

²⁰ Hinawk mah kami hae amhnongsak. To-e anihcae mah a thuih batiah ban amsaeh aiah buh cakhaih ih mah kami hae amhnongsak ai,” tiah a naa pae.

Nongpui Longto Ih Taanghaih

²¹ Jesuh loa to hmuenh to angthawk tak moa Taiar hoi Sidon prae ah caeh.

²² To prae ah ka om Kanaan nongpui longto anih khaeah angzoh. “David Capa! Angraeng, kai hae tahmen ah, ka canu loa taqawk mah a naeh moa nung parai,” tiah khoeh puiah a hangh.

²³ To-e Jesuh mah lok cungto doeh thui ai. A hnukbangnawk to anih khaeah angzoh o moa, “Hi nongpui hae patoeh ving ah, aicae hnukah baang tongkrok moa, ka hraw ka ang ah a hangh tuek,” tiah a naa pae o.

²⁴ Tona-ah Jesuh mah, “Israel kami tuu kanghmanawk khaeah khueh ni loa patoeh ah ka oh,” tiah pathim.

²⁵ Tona-ah nongpui loa angzoh moa a khokkung ah tabok. “Angraeng, na bom ah” tiah a naa.

²⁶ Jesuh mah, “Naukta ih buh to lomh pae moa ui paek ving loa amsoem ai,” tiah pathim let bae.

²⁷ Nongpui mah, “Angraeng, na thuih ih to ahlong parai, to-e uinawk mah doeh angmahcae angraengnawk ih caboi nui hoiah ka krah buhmaenawk to ui mah doeh a cak o toengh bae,” a naa pae.

²⁸ Topongah Jesuh mah, “Nang loa taanghaih katingai ka tawn nongpui ni. Na koeh ih to sak pae ah om tih,” a naa pae. To tue nathuem roeroe ah a canu to a hoih pae roep.

Jesuh Mah Kami Paroeai A Hoihsak

²⁹ Jesuh loa to hmuenh to tacawt tak moa Galili tuilitaeng ah takat. Mae ah to a dawh tahang moa toah anghnut.

³⁰ Mipui paroeai mah angmah to a pangh o. Khokbai, mikmaeng, zapasaenawk, lok-aa hoi nganna kalah paroeai angzoh o haih moa Jesuh ih khokkung ah suek o. Jesuh mah atonawk boih to a hoihsak.

³¹ Lok-aanawk mah lok apaeh thaih, zapasaenawk mah a hoih o, khokbainawk mah caeh o thai, mikmaengnawk mah mik ka aang let to mipuinawk mah a hnuk o na-ah a dawnrai o moa Israel Sithaw to pakoeh o.

Kami Sangpalito Buh Kokhaih

³² Jesuh mah a hnukbangnawk to angmah khaeah a kawk moa, “Mipui hae kai hoiah ni thumto ka oh o nawn boah moa vaihi buh cak han tidoeh tawn o ai boah pongah ka tahmen parai, lamsui sabong ah angpho o moeng tih ka tih pongah buh pacah aiah im ah patoeh han ka koeh ai,” tiah a naa.

³³ A hnukbangnawk mah anih khaeah, “Mipui hae hi zetto pacah han ka khawt ah hi praetanghaeng ah naabang ih buh to maw kaicae mah ka hnuk o han?” a naa pae o.

³⁴ Jesuh mah, “Takaw nazetto maw na tawnh o?” a naa pae. Anihcae mah, “Takaw kae sarihto hoi tangaa zetta khueh a oh,” a naa pae o.

³⁵ Jesuh mah mipui to long pongah anghnutsak o.

³⁶ Topacoengah takaw kae sarihto hoi tangaa zetta to a lak moa Sithaw khaeah kawn lok a thuih pacoengah a aeh moa a hnukbangnawk to a paek. A hnukbangnawk mah mipui to pazet o.

³⁷ Anihcae boih mah cak o moa zok amhah o. Topacoengah cak kamhlai to a hnukbangnawk mah pakuem o moa phawh sarihto koi.

³⁸ Ka caanawk boih loa nongpuinawk hoi nauktanawk kroek aiah nongpa kacing ngaiah sangpalito a oh.

³⁹ Topacoengah Jesuh loa mipui to amlaemsak moa angmah to palong thungah akun moa Magadan prae bangah to a caeh.