Mathai 14 - Asang Khongso New Testament

Baptisma Paekkung Johan Duekhaih

¹ To tue nathuemah Galili prae ukkung Herod mah Jesuh ih akawng to a thaih.

² Herod mah angmah hlim ih angraengnawk khaeah, “Anih loa baptisma paekkung kahing let Johan khaekhaeh ni; topongah ni dawnraihaih sak hanah hmuensak thaihaih ih to a tawnh,” tiah a thuih pae.

³ To ai nahlanah Herod mah Johan to a naehsak moa thongim ah pakhrah. Anih mah totiah a sakhaih ih loa amnauk Filip ih zu Herodias ih kawng pongah ni.

⁴ Kawmawtiah Baptisma paekkung Johan mah Herod khaeah, “Herodias nang ohhaih hae amsoem ai,” tiah a naa pae toepsoep.

⁵ Herod mah anih to hum han a koeh, to-e Judah kaminawk to a zit, kawmawtiah Johan loa tahma longto ni tiah a dawn o ih ni.

⁶ Herod ih zahhaih ni ah Herodias canu loa mipuinawk hma-ah to a hnawh amlamh. Herod loa anghoe phi pongah,

⁷ nongpui khaeah, “Na hnik ih tita doeh kang paek han,” tiah saephoeh moa lok amaih.

⁸ Amno ih lok pacuekhaih batiah Herod khaeah, “Hiah Baptisma paekkung Johan ih lu to sabae pongah vaihi roeroe ah na paek ah,” tiah a hnik.

⁹ Tona-ah Sangpahrang loa palungset parai. To-e pacae ih kaminawk hma-ah lok amaihhaih ih a sak ving boah pongah a hnik ih batiah sak hanah lok a paek.

¹⁰ Topongah Johan loa thongim thungah to a lu a boengsak.

¹¹ A lu to sabae pongah a sinh o moa nongpui to a paek o, anih mah amno khaeah a caeh haih.

¹² Johan hnukbangnawk loa angzoh o, a qok to angzawn o moa aphum o; topacoengah anihcae loa a caeh o moa Jesuh khaeah to a thuih o.

Kami Sangpangato Buh Kokhaih

¹³ Jesuh mah Johan ih tamthang to a thaih na-ah to hmuenh to tacawt tak, palong to angthueng moa kami amdinghaih hmuenh ah to angmah khueh ah caeh. To tamthang to mipui mah a thaih o moa vang kruek hoitoah tacawt o moa oenglam bang hoiah anih to patom o.

¹⁴ Jesuh loa palong thung hoi-ih tacawt moa mipui katingai to a hnuk na-ah palung thungah tahmenhaih hoiah koi moa nganna kaminawk to ngantuisak.

¹⁵ Ato duembang ah a hnukbangnawk angzoh o moa anih khaeah, “Niduem ngawt boah, hi hmuenh hae tawtaqak ni. Mipuinawk to patoeh laih, taenghaek ih vang thungah caehsak aloa angmahcae hanah caknaek qan o na soe,” tiah a naa pae o.

¹⁶ Jesuh mah anihcae khaeah, “Anihcae caeh han angaih ai, nangcae mah caknaek to paek oah,” tiah pathim pae.

¹⁷ A hnukbangnawk mah, “Takaw kae pangato hoi tangaa hnetto khueh ni ka tawnh o,” a naa pae o.

¹⁸ Tona-ah Jesuh mah, “Kai khaeah na sin oah,” a naa pae.

¹⁹ Mipuinawk to phroh nuiah anghnut han lok a paek; topacoengah takaw kae pangato hoi tangaa hnetto to a lak, van bangah doeng moa Sithaw khaeah kawn lok a thuih. Takaw to a aeh moa a hnukbangnawk to a paek, a hnukbangnawk mah mipuinawk to pazet o.

²⁰ Mi boih mah a cak o moa amhah o. Topacoengah cak kamhlai to hnukbangnawk mah pakuem o moa daengkraem hlaihnetto a koi.

²¹ Buh ka caanawk boih loa nongpui hoi naukta thuih aiah nongpa kacoeh ngaiah sangpangato thuemtham a oh.

Jesuh Tui Nuiah Takat

²² Topacoengah Jesuh mah mipuinawk to amlaemsak nathuemah a hnukbangnawk to palong thungah angthuengsak moa tuili hapbang yaeh ah a caehsak hmaloe.

²³ Mipuinawk to patoeh pacoengah Jesuh loa khophoeh hanah angmah khueh ah maenui ah a dawh tahang. A duembang phak na-ah Jesuh loa toah angmah khueh ah a oh.

²⁴ To tue nathuemah palong loa tuili nuiah hla paraiah a phak boah moa takhi mah palong to a daengh pongah tuiphu mah palong to ahnuk ahma a nok.

²⁵ Akhawnbang nazi thumto hoi tarukto salak ah Jesuh loa tui nuiah takat moa a hnukbangnawk khaeah angzoh.

²⁶ Tui nuiah taka to anihcae mah a hnuk o na-ah angpae o moa, “Kamlaa ni” ti o moa zit hoiah a hangh o.

²⁷ Jesuh mah anihcae to apring phrat moa, “Tasoeh o hmah! Kai ni; zi o hmah,” tiah a naa pae.

²⁸ Topacoengah Piter mah, “Angraeng, nang tangtang nahaeloa nang khaeah tui nuiah angzoh hanah lokpaek ah,” a naa pae.

²⁹ Jesuh mah, “Angzo ah,” a naa pae. Topongah Piter loa palong thung hoitoah tacawt moa Jesuh khaeah tui nuiah a caeh.

³⁰ To-e Piter mah takhi kaham parai to a hnuk na-ah a zit moa tui thungah a tup zup. Tona-ah, “Angraeng, na pahlong ah!” tiah a hangh.

³¹ Jesuh loa a ban pazang phrat moa anih to talawk pacoengah, “Na taanghaih tamsi lawnlai! Tipongmaw oepvawthaih na tawnh loa?” tiah a naa pae.

³² Anih hnit to palong thungah akun hoi maek pacoengah loa takhi to doeh dit roep.

³³ Topacoengah a hnukbangnawk mah palong thungah Jesuh to a bok o. Anihcae mah, “Nang loa Sithaw Capa tangtang ni,” a naa pae o.

Gennesaret Ah Ngoinanawk A Hoihsak

³⁴ Anihcae mah tuili to angkat o moa Gennesaret prae to a phak o.

³⁵ To ih kaminawk mah Jesuh to panoek o. Topongah taenghaek ih kaom ngoinanawk to kawk o moa Jesuh khaeah angzoh o haih.

³⁶ Ngan kananawk mah anih ih kahnitom to sui han a hnik o moa ka suinawk boih loa ngantui o.