Marka 5 - Asang Khongso New Testament

Taqawk Mah Naeh Ih Kami A Hoihsak

¹ Jesuh hoi a hnukbangnawk loa Galili Tuili hapbang yaeh Gerasa prae ah to a phak o.

² Jesuh to palong thung hoitoah tacawt rumhoi, to ih taprong hlungkhaw thung hoi-ih ka tacawt kami longto mah a caehthuih. Hae kami loa a tako thungah taqawk to a tawnh moa

³ taprong ah kho a sak. Amimah doeh sumqui hoiah pahlet o thaih ai boah;

⁴ a khok hoi a ban to sumqui hoiah pahlet o tuektuek boah, to-e pahlet kruekto sumqui to taprawt patpat moa khok ah pahlet ih sumqui to doeh a thuek dokdok. Tha oh lawnlai pongah mita mah doeh pazawk thaih ai boah.

⁵ Khoving khodai taprong hoi maenui thuemtham ah linglong tuektuek, a hangh doeh a hangh moa angmah hoi angmah to hlung kanoe kamsum hoiah ang-aah raksi rakso.

⁶ Kahla kue hoitoah Jesuh to a hnuk na-ah a cawnh moa a hma-ah a khokkung ah tabok pae,

⁷ khoeh puiah a hangh, “Jesuh, Kasang koek Sithaw ih Capa! Kai na koehhaih ih timaw ka om? Sithaw hmin hoiah kang pacae, na raek hmah.

⁸ (Hitiah a hanghhaih ih loa Jesuh mah, “Pakhra kasae, hi kami ih tako thung hoitoah tacawt ah!” tiah a naa pae pongah ni.)

⁹ Topongah Jesuh mah, “Na hmin loa mimaw?” tiah a duengh. Ato kami mah, “Ka noih o phi pongah ka hmin loa ‘Bupui’ ni,” tiah pathim pae.

¹⁰ To kami mah taqawk kasaenawk to ato ih prae thung hoitoah patoeh ving han aiah Jesuh khaeah tahmenhaih a hnik.

¹¹ To ih taenghaek maezoeng ah ok huto pacah ih to a oh.

¹² Topongah taqawk kasaenawk mah Jesuh khaeah, “Oknawk khaeah to matoeh oloa a thungah to na kunsak oah,” tiah a hnik pae o.

¹³ A hnik batiah a caehsak moa to kami ih tako thung hoi-ih tacawt o moa oknawk thungah akun o. Ok loa sungqum boih ah sanghnetto a phak, hlung tangang bangah amlet o tathuk bawn moa tuili ah duek o king.

¹⁴ Ok khenzawn kaminawk loa a cawnh o moa ato kawng to vangpui thung hoi lawk tawnkungnawk khaeah to a thuih pae o. Kaminawk loa hmuen kathok to khet hanah a caeh o.

¹⁵ Jesuh khaeah a phak o na-ah taqawk kasae ‘Bupui’ ah kaom kami to a hnuk o. Toah to anghnut, khukbuenh to doeh angbuenh moa palung kacaipin ah ka om to a hnuk o. Topongah anihcae boih mah mawnh tasoeh o.

¹⁶ Ato hmuen to ka hnuhnawk mah taqawk kasae mah naeh ih kami to kawbangmaw a hoih let moa oknawk nuiah timaw ka thok tito mi boih khaeah a thuih o.

¹⁷ Topongah anihcae ih prae to tacawt tak ving hanah Jesuh to a thuih pae o.

¹⁸ Jesuh loa palong thungah akun na-ah taqawk kasae ka tawnh vaih kami mah, “Nang khaeah kangzoh toeng han,” tiah a naa.

¹⁹ To-e Jesuh mah koeh pae ai. “Na im ah amlaem aloa na sanauknawk khaeah Angraeng mah ang sak pae ih hoi a tahmenhaih kawngnawk to thui pae baa,” tiah a naa lat.

²⁰ Topongah ato kami to loa Vang Hato naa pae ih prae thung boih ah to caeh moa Jesuh mah a sak pae ih kawng to a thuih taphong. Ato lok ka thaih kami boiboih mah a dawnrai o king.

Jairas Canu hoi Kahnitom Kasui Nongpui

²¹ Jesuh loa tuili hapbang yaeh ah to a caeh let bae. Ato tuili yaeh ah to kami paroeai Jesuh taenghaek ah acu o.

²² Sinakok ukkung Jairas loa angzoh moa Jesuh to a hnuk na-ah a khokkung ah tabok moa tahmenhaih a hnik.

²³ “Ka canu loa a nat nung parai. Angzo ngaepacae rae aloa a nuiah ban koeng pae rae ah, totibaloa ngantui ueloa hing let tih,” tiah a naa.

²⁴ Topacoengah Jesuh loa anih khaeah caeh hanah amsak. Jesuh hoiah nawnto ka caeh kami paroeai pop pongah bangbang hoitoah anih to a et o.

²⁵ Toah to saning hlaihnetto thung thipahawt tuektuek hoitoah katingai patang palai ka pacap nongpui longto a oh.

²⁶ Dawkta paroeainawk mah tuisi tuibo hoiah a sak pae o boah. A tawnh ih tangka doeh aboeng hmen boah, to-e hoihkhang kue aiah a nung aep aep.

²⁷ Ato kami mah Jesuh kawng to a thaih moa mipui salak thungah Jesuh ih ahnuk bangah angzoh.

²⁸ “Anih ih kahni khueh mah sui nahaeloa ka nathaih hoih khaeh tih,” tiah a dawn.

²⁹ Tomoa Jesuh ih kahni to a sui, a thipahawt to vaipang ta-ah a khap pae roep moa a nathaih ih to a hoih boah tito a panoek.

³⁰ Jesuh loa angmah thung hoi-ih hmuensak thaihaih ih tacawt tito a panoek phrat moa mipui bangah to angqoi moa, “Amimaw kai ih kahni ka sui?” tiah anihcae to a duengh.

³¹ A hnukbangnawk mah, “Mipui hi zetto kangkoek kang-ae mah tanawt o to na panoek to loa, tipongmaw mimah maw na sui, na tih?” tiah a naa pae o.

³² To-e Jesuh loa amimah maw na sui tito panoek hanah hnukhma a khet toengtoeng bae.

³³ Nongpui mah a nuiah hmuen kathok to a panoek na-ah tasoeh takuenhaih hoiah angzoh, Jesuh ih khokkung ah tabok moa loktang lok to a thuih pae.

³⁴ Jesuh mah anih khaeah, “Ka canu, na taanghaih ih mah hoihsak boah. Kamong ta-ah caeh aloa na nathaih to hoih na soe,” tiah a naa.

³⁵ Jesuh loa totiah a thuih li na-ah Jairas im hoitoah patoeh ih qok thangkawk to angzoh o moa anih khaeah, “Na canu duek boah. Tipongmaw Patukkung to palung baecat ah na sak mut?” tiah a naa pae o.

³⁶ Jesuh loa anihcae ih lokthuih to tiadoeh sah pae ai moa anih khaeah, “Mawn hmah, taang khueh mah taang ah,” tiah a naa.

³⁷ Topacoengah Jesuh mah Piter hoi Jaem hoi amnauk Johan tiaialoa amita doeh ahnuk ah baangsak han koeh ai.

³⁸ Jairas im ah to a phak o moa Jesuh mah kongcang aiah tuen carawtui ah ka omnawk hoi longlai taphruem hoi palungsae ka qah kaminawk to a hnuk.

³⁹ Im thungah akun moa anihcae khaeah, “Tikhoemaw hitiah tuen carawtui ah na oh o? Tipongmaw na qah o mut? Hi naukta nongpui hae dueh ai, ka iip tok ni,” tiah a naa pae.

⁴⁰ Anihcae mah pahnuihthuih o, topongah kaminawk to tacawtsak king moa naukta ih ampa hoi amno hoi a hnukbang longthumto to a caeh haih moa naukta nongpui pasonghaih ih akhaan thungah to akun o.

⁴¹ Naukta nongpui to a ban ah patawn moa, “Talitha, Koum,” tiah a naa. “Talitha, koum,” ahlong arui loa, “Naukta nongpui, angthawk ah kang naa,” tihaih ih ni.

⁴² Vaipang ta-ah naukta nongpui loa angthawk moa takat roep. (Anih loa saning hlaihnetto kami ni). Ato hmuen kathok to a hnuk o na-ah katingai a dawnrai o.

⁴³ To-e Jesuh mah mita khaeah doeh thuih han aiah lok a paek moa, “Cak han maemaeto paek oah,” tiah a naa pae.