Marka 4 - Asang Khongso New Testament

Cangti Haehkung Patahhaih

¹ Jesuh mah Galili tuilitaeng ah to patuk pae bae. A taengah kangzo cunawk to pop o parai pongah palong thungah akun moa toah to anghnut. Palong loa tui nuiah kahla kue ah to a oh moa mipui loa tui taengah angdoet o.

² Patahhaih patoh hoiah hmuen zetpui patuk pae. Jesuh mah:

³ “Tahngai oah: Vaito na-ah kami longto a oh moa cangti haeh hanah a caeh.

⁴ Lawk thungah cangti a haeh na-ah thoemto loa loklam ah a krak moa tava mah akhuih poeng.

⁵ Thoemto loa long tampa ih ahmuenh hlungrong ah krak. Long thah ai pongah cangti loa amprawk roeprap.

⁶ To-e ni tacawt tahang na-ah cang kamprawk tanawk to ni kana mah a dawk; tangzun to thuk ai pongah cang kamprawk to angqo o king roep.

⁷ Thoemto loa khringzang thungah a krak; khringkung loa a qoengh moa cang kamprawk to tacetthuih kang pongah aquih athaih om thaih ai.

⁸ To-e thoemto cangti loa longtang kahoih pongah a krak, hoihdak ta-ah amprawk, a qoeng tahang moa aquih athaih doeh a oh. Thoemto loa alet quithumto, thoemto loa alet quitarukto, thoemto loa alet cumvai khoekto aquih athaih a thawn,” tiah a naa.

⁹ Hnukkhuem ah Jesuh mah, “Thaihhaih ih naa ka tawn loa thaih o na soe,” tiah a naa pae.

Patahhaihnawk Thuihkoehhaih

¹⁰ Jesuh loa angmah buengah oh na-ah a lokthuih ih ka thaih thoemto loa a hnukbangnawk hoiah angzoh o moa a patahhaih ih ahlongrui to kacai ta-ah thuih hanah pacae o.

¹¹ Jesuh mah, “Sithaw Poenghaih loktamqu to nangcae khaeah paek ah oh boah. To-e tasabang ah kaom kaminawk hanah loa patahhaih lok hoiah ni hmuen boiboih hae a thaih oh;

¹² topongah, ‘A khet loa khet o, to-e hnuh o ai; A tahngaih loa tahngaih o, to-e thaihkop o ai. Kawmawtiah a hnuk o moa thaihkop o nahaeloa, Sithaw khaeah amlaem o ueloa zaehaih to tahmen pae o moeng tih,’ tiah thuih batiah om tih,” tiah a naa.

Cangti Patahhaih Ih Thuihpacaihhaih

¹³ Topacoengah Jesuh mah, “Hi patahhaih lok hae na thaih o kop ai maw? Totibaloa kawbangmaw patahhaih kalah to loa na thaih o thaih tih?

¹⁴ Cangti ka haehkung mah Sithaw ih tamthang lok to a haeh.

¹⁵ Kami thoemto loa loklam ah cangti ka krah batiah ni a oh o. Tamthang lok to a thaih o pacoeng rumhoi Setan to angzoh moa a thungih tamthang lok to a lak pae ving.

¹⁶ Kami kalah thoemto loa hlungrong ah ka krah cangti batiah ni a oh o. Tamthang lok to a thaih o hoiloa kanghoe ta-ah talawk o phrat.

¹⁷ To-e a thungah kathuk ah akun ai pongah kraa paraiah om ai. Topongah tamthang lok pongah raihaih hoi pacaekhlaekhaih phak na-ah hnukbang ah amlaem roeprap.

¹⁸ Kami kalah thoemto loa khringzang thungah kakrah cangti batiah ni a oh o. Sithaw lok to a thaih loa a thaih o boah,

¹⁹ to-e longnui hing khosakhaih pongah palungdawn angphohaih, angraeng koehhaih hoi kalah kalah koehhaih ihnawk mah tamthang lok to a khuk kang pongah athaih to athaii thaih ai.

²⁰ To-e kami kalah thoemto loa longtang kahoih pongah ka krah cangti batiah ni a oh o. Tamthang lok to a thaih o, kacak ta-ah tapom moa aquih athaih to thawn. Thoemto loa alet quithumto, thoemto loa alet quitarukto, thoemto loa alet cumvaito khoekto thawn,” a naa pae.

Takho Hlim Ih Hmai-im

²¹ Jesuh mah, “Mimah doeh hmai-im to sinh moa takho hlimah maw, tiaibaloa iihkroeng hlimah maw suem vaih ai. Hmai-im pa-aanghaih ih hmaitoeng pongah ni loa a suek na ai maw?

²² Kawbatih doeh hawk hmoep ih boih to mi mikhnuk ah taphong ah om ueloa kawbatih doeh kraeng hmoek ih boih to amtuengsak boih tih.

²³ Thaihhaih ih naa ka tawn mah loa thaih na soe,” tiah a naa pae.

²⁴ Jesuh mah anihcae khaeah, “Na thaih o ih to hoihdak ta-ah dawn oah. Minawk lokcaekhaih hanah na patoh o ih taring batiah Sithaw mah doeh nangcae lokcaek hanah patoh let toeng ueloa ato pongdoeh kamhlai ah patoh tih.

²⁵ Ka tawn kami loa paek pacoih ah om ueloa tidoeh ka tawn ai kami to loa a tawn ih ta mataeng doeh la pae kik tih,” tiah a naa.

Kaqoeng Tahang Cangti Patahhaih

²⁶ Jesuh mah, “Sithaw Poenghaih loa hitiah a oh. Kami longto mah a lawk ah cangti to a haeh.

²⁷ Aqum ah a iih, khawnthaw ah angthawk moa athun ah tok a sak, tona-ah cangti loa amprawk moa a qoengh tahang. To-e kawbangmaw totitoah a oh tito panoek ai.

²⁸ Longlai mah cangti kamprawk to a qoenghsak moa athaih to a thaihsak, hmaloe koek ah aqam kanauk to tacawt, topacoengah aquih tacawt moa hnukkhuem ah loa athaih to a oh.

²⁹ Cang loa a hminh na-ah toksahkung mah cangaah tue a phak boah pongah cangaahhaih ih cakraa hoiah to a aah.

Antam Muu Patahhaih

³⁰ “Sithaw Poenghaih loa tihoiah maw ahmong tito aicae mah thuih o han? Thuihpacaihhaih hanah kawbatih Patahhaih ih to maw patoh o han?

³¹ Antam muu batiah ni a oh. Kami longto mah longnui ih atimu ka thoeng koek antam muu to a lak moa long ah to patit.

³² Nawnetta pacoengah amprawk moa akung kalahnawk boiboih pongdoeh kalen koek ah a coengh. Tanghangnawk kalen paraiah tacawt, tavanawk angzoh o moa akung tahlip takuih ah tabu boh o,” tiah a naa.

³³ Jesuh loa hibatih patahhaih kalah zetpui patohhaih hoiah mipui khaeah tamthang lok to a thuih; a thaih o thaih roekto ah a thuih pae.

³⁴ Patahhaih patoh aialoa anihcae khaeah lok thui vaih ai, to-e a hnukbangnawk hoiah angmahcae buengah oh o na-ah tiboih to kacai ta-ah a thuih pae.

Jesuh Mah Takhipui Ditsak

³⁵ Tona ni duembang ah Jesuh mah a hnukbangnawk khaeah, “Tuili hapbang yaeh ah to caeh o si,” tiah a naa.

³⁶ Topongah mipuinawk to a caeh o tak moa a hnukbangnawk loa palong thungah to akun o. To palong thungah Jesuh anghnut pacoeng boah moa Palong mah a caeh haih o. Toah to palong kalahnawk doeh a oh toengh.

³⁷ Poeklak ai puiah takhi kaham parai to songh moa tuiphu kangthawk to palong thungah akun moa palong loa tui a koi duih boah.

³⁸ Jesuh loa palong tamaii bangah a oh moa luhngoeng nuiah a iih. A hnukbangnawk mah palawt o moa, “Patukkung, duek hanah oh sut boah hae, tidoeh dawncang aiah maw na oh?” tiah a naa pae o.

³⁹ Jesuh loa angthawk moa takhi to, “Di ah!” tiah lok a paek moa tuiphu to, “Angnong ah!” tiah a naa. Tona-ah takhi to a dit moa tuiphu doeh angtawt angqoe ai boah.

⁴⁰ Topacoengah Jesuh mah a hnukbangnawk khaeah, “Tipongmaw hitih khoekto na mawnh o? Taanghaih na tawn o ai vop maw?” tiah a naa pae.

⁴¹ Tolangla cadoehsoe anihcae loa tasoeh o qawtqawt moa longto hoi longto to, “Hi kami loa ami kawbatih maw vai? Takhipui hoi tuiphu mataeng mah doeh a lok tahngaih pae hae!” tiah a thuih o.