Marka 16 - Asang Khongso New Testament

Jesuh Angthawklethaih

¹ Sabbath ni to aboeng na-ah Meri Magdalin hoi Jaem amno Meri hoi Salome mah Jesuh qok to nok hanah hmuihoihtui to a qanh o.

² Yahni akhawnbang khawnthaw ni tacawt na-ah taprong ah caeh o.

³ Loklam ah to longto hoi longto, “Taprong khahhaih ih hlungtampae loa mimah maw na takhoe pae han?” tiah longto hoi longto angduengh o.

⁴ (To hlung loa hlung kalen parai ni). Topacoengah a khet o na-ah hlungpui to loa takhoe tangcae ah ka om to a hnuk o.

⁵ Topongah taprong thungah to akun o, thendoeng longto kahni kanglung kang khuk bantang bangah kanghnu to a hnuk o moa angpae o.

⁶ Anih mah, “Angpae o hmah! Kraws ah hum o ih Nazareth Jesuh to na pakrong o tito ka panoek. Hiah om ai boah, angthawklet boah! A suek o haih ih ahmuenh hae khen oah.

⁷ Vaihi caeh o aloa Piter hoi hnukbang kalahnawk khaeah to, ‘Nangcae hma-ah Galili ah ka caeh han. Toah to ka thuih ih batiah na hnuh o tih,’ tiah lok to thui pae oah,” tiah a naa.

⁸ Topongah tacawt o moa tasoeh hoi mawnh hoiah a cawnh o. A zit o phi pongtoah mi khaeah tidoeh thui o ai. [

Marka Aboenghaih Kasawk 16:9-20 Meri Magdalin Khaeah Amtueng Pae

⁹ Yahni ah duekhaih thung hoitoah Jesuh angthawklet pacoengah hmaloe koek ah Meri Magdalin khaeah amtueng pae. Ato nongpui loa a thung hoi-ih taqawk sarihto pathok pae ih kami ni. Nongpuinawk to Piter hoi angmah ampuinawk khaeah a caeh o moa vanmi mah a thuih pae o ih boih to kaduem ah a thuih pae o.

¹⁰ Meri Magdalin loa a caeh moa angmah ih ampuinawk to a thuih pae. Anihcae loa palungset moa a qah o. Hi pacoengah, Jesuh angmah a hnukbangnawk to niangzae bang hoitoah niduem bang khoekto a patoeh ranghoiah dungzan pahlonghaih ka hing toemoe hoi kacai tamthang lok to a thuih.]

¹¹ Jesuh loa a hing let boah, anih to ka hnuk, tiah a thuih ih to a thaih o na-ah taang pae o ai.

Hnukbang Longhnetto Khaeah Amtueng

¹² Topacoengah a hnukbang longhnetto vangca bangah lam a caeh hoi li nathuemah kalah kaang ah anih hnit khaeah Jesuh amtueng pae.

¹³ Amlaem hoi moa kami kalahnawk to a thuih pae hoi, to-e taang o ai.

Hnukbang Hahlaito Khaeah Amtueng

¹⁴ Hnukkhuem koek ah a hnukbang hahlaito buh a cak o li na-ah Jesuh amtueng pae. Taanghaih tawn o ai pong hoi kahing ah ka hnuhnawk mah thuih ih to taang aiah palungthah o parai pongah a zoeh pae.

¹⁵ Anihcae khaeah, “Longnui prae boih ah caeh oloa caeng kami boiboih khaeah Tamthang kahoih to thui oah.

¹⁶ Ami doeh ka taang moa baptisma ka hak to loa pahlong ah om tih. Ami doeh ka taang ai loa zaenethaih to hnuh o tih.

¹⁷ Ka taangnawk loa dawnraihaih hmuen sak hanah hmuensak thaihaih ih to paek ah om tih: Ka hmin hoiah taqawk to pathok o thaih tih, panoek ai lok apae o thaih tih,

¹⁸ pahui to naeh o langla doehsoe, duekhaih kasoe nae o langla doehsoe, kawbang doeh na om o mak ai; ngan kananawk nuiah a ban to koeng o ueloa ngantui o tih,” tiah a naa.

Jesuh Van Ah Dawh

¹⁹ Angraeng Jesuh loa anihcae hoiah lok apaeh boih pacoengah van ah lak tahang ah a oh moa Sithaw ih bantang bangah to anghnut.

²⁰ Hnukbangnawk loa a caeh o moa vang kruekah tamthang lok to a thuih o; Angraeng loa anihcae khaeah tok a sak moa a thuih o ih amsoem tito dawnrai hmuen a sak o ih hoiah amtuengsak.] [