Marka 13 - Asang Khongso New Testament

Tempal Amrohaih Han Kawng A Thuih

¹ Jesuh loa Tempal hoitoah tacawt na-ah a hnukbang longto mah, “Patukkung, khen e! Hi hlung puipuinawk hoi im puipuinawk hae a dawnrai han oh!” tiah a naa.

² Jesuh mah, “Hi im kalen puipuinawk hae na hnuk takhae? Hi hlung puipuinawk hae maeto boe doeh a ohhaih ih ahmuenh ah ohhaih ai ih atue to pha tih, hinawk boih hae a nae king tih,” tiah a naa.

Raihaih hoi Pacaekhlaekhaih

³ Jesuh loa Tempal sadang ah kaom Oliv mae ah to anghnut na-ah Piter, Jaem, Johan, hoi Andru cae to tamqu lamah angzoh o.

⁴ Anihcae mah, “Ahi hae natuekah maw om tih? Na thui ah; Ato hmuennawk to na pha khaekhaeh tih, tito panoek thaih hanah ti amathaih ih to maw om tih?” tiah a duengh pae o.

⁵ Jesuh mah anihcae khaeah, “Acoe aha oah, mita mah doeh na ling o hmah na soe,” tiah a naa.

⁶ Kami paroeai kai hmin hoiah angzo o ueloa, ‘Anih loa kai hae boah ni,’ tiah thui o ueloa kami paroeai aling o tih.

⁷ Moa puengkhraep dongpak ih misa angtukhaih tuenpawk hoi ahmuenh kahla ih misa angtukhaih tamthang tamlinawk na thaih o na-ah mawn o hmah. Tobatih hmuen to loa ka om han roe ni, to-e aboenghaih a phak boah, tihaih ih na ai ni.

⁸ Prae maeto hoi maeto, caeng maeto hoi maeto misa angtuh o tih. Hmuenh kruekah talihnawh ih om ueloa takang thok tih. Hi hmuennawk hae loa naukta zah tom na-ih zokna hmaloe batih ni a oh.

⁹ “Nangmahcae hoi nangmahcae to acoe oah. Mimah na naeh o ueloa lokcaek zung ah na hoii o tih. Sinakok thungah na bop o tih; kai pongah ukkung hoi sangpahrangnawk ih hma-ah nangdoe o ueloa anihcae khaeah Tamthang Kahoih to na thui o tih.

¹⁰ To-e aboenghaih phak ai nahlanah Tamthang Kahoih to caeng boiboih khaeah thuih ah om tih.

¹¹ Nangcae to naeh o moa lokcaekhaih zung ah phak o haih na-ah timaw ka thuih han tiah tasoeh o mut hmah. Atue phak na-ah kawbatih doeh thuih hanah paek ih to thui ah. Kawmawtiah na thuih hanih lok loa nangmahcae ih lok ah om mak ai; Cai Pakhra mah thuih ih lok ah ni om tih.

¹² Nauk-amza tingtoi to dueksak hanah paek tih, tobatih toengah ampanawk mah a caanawk nuiah to sah tih; a caanawk mah doeh amno hoi ampanawk to misa ah suem ueloa padueksak o tih.

¹³ Mi boih mah kai ih kawng pongah na hnumaa o tih. To-e ami doeh aboenghaih khoekto kangcak loa pahlong ah om tih.

Panuetsoeh Hmuen Zitman Kaom

¹⁴ “Zitman koi panuetsoeh kaom hmuen loa angdoet hankoi ai ih hmuenh ah kangdoe to na hnuh o tih.” (Ka kroekkung: A thuihkoehhaih hae panoek kop ah.) “Topacoengah Judae ah kaom kaminawk mae bangah na cawnh o boih han oh.

¹⁵ A imphu ah kaom kami longlongto mah a sinh hanih hmuen lak hanah im thungah akun na hmah soe.

¹⁶ A lawk ah kaom kami longlongto mah kahni lak hanah im ah amlaem na hmah soe.

¹⁷ Ato tue ni ah nauk kanaeng nongpui hoi naukta kanauk ka tawn nongpuinawk hanih loa paroeai rai tih.

¹⁸ Hi hmuennawk hae sik angqai tue ah phak han aiah Sithaw khaeah khophoe oah.

¹⁹ Kawmawtiah hi raihaih kangzo han hae Sithaw mah long a sak amtong tangsuek nahoiah vaihi khoekto ka om vaih ai, zitman kaom koek raihaih iah om tih. Hmabang natuek doeh tobatih to om let mak ai boah.

²⁰ To-e Angraeng mah ato ni to a duemhsak boah; duemsak ai nahaeloa ami kawbatih doeh ka sueng om mak ai. To-e a qoih tangcae ih kaminawk hanah ato ni to a duemhsak boah.

²¹ “Tona-ah kami longlongto mah nangcae khaeah, ‘Khen o e, hiah Messiah a oh,’ ‘Khen o e, hoah Messiah a oh,’ tiah na naa nahaeloa taang o hmah.

²² Kawmawtiah Messiah kaling hoi tahma kaling paroeai tacawt tih. Sithaw mah a qoih ih kaminawk mataeng doeh, angcoeng thaih soehaeloa aling hanih ah amathaih hoi dawnraihaih ihnawk to sah o tih.

²³ Acoe oah! Atue ni phak ai nahlanah cungri kang thuih o coek boih boah.

Kami Capa Angzohhaih

²⁴ “Ato raihaih tue pacoengah loa ni mah ving ueloa khra mah doeh aang mak ai boah.

²⁵ Sakaenawk van hoitoah krah tathuk ueloa van ah ka omnawk ih thaohhaih ihnawk to a oh o haih ih hmuenh hoitoah lam angkhraeng o boih tih boah.

²⁶ Tona-ah Kami Capa loa amtueng ueloa tamai thungah hmuensak thaihaih hoi, phungaeng lensawkhaih hoiah angzo tih.

²⁷ Long takii pali ah to a vanminawk to patoeh ueloa long hapbang taemh nahoi hapbang taemh khoekto Sithaw mah qoih ih kaminawk to takok o tih.

Thaiduet Kung Hoitoah Amtukhaih

²⁸ “Thaiduet kung hoitoah amtukhaih ih to la oah. Tanghang to hingsuer ah tadok tacawt moa aqam kanauk tacawt tahang na-ah nipui tue a hnaih boah, tito na panoek o.

²⁹ Tobatih toengah hi hmuennawk kaom to na hnuk o na-ah atue loa hnaih boah, amtawn awt boah, tito na panoek o tih.

³⁰ Vaihi kahing kaminawk hae a duek o boih ai nahlanah hi hmuennawk boih hae na pha tih, tihae pahnet o hmah.

³¹ Van hoi long loa anghma tih, to-e ka lok loa natuek doeh anghma mak ai.

Mimah Doeh Ani hoi Atue Panoek Ai

³² “Tocadoeh natuekah maw to ni hoi tue to na pha tih, tihae mita mah doeh panoek thaih ai; van ih vanminawk mah panoek ai, Capa mah doeh panoek ai, Pa khueh mah ni panoek.

³³ Acoe oah, hruek oah, kawmawtiah natuekah maw atue to na pha tih, tito na panoek o ai.

³⁴ Tihoiah maw ahmong ti nahaeloa kami longto kholong ah caeh hanah amsak moa a tamtoehnawk khaeah a sak hanih tok to pazet rip moa, khongkha toepkung mah doeh hoihdak ta-ah toep hanah lok ka taquk ih im tawnkung batiah ni om tih.

³⁵ Im tawnkung angraeng loa natuekah maw na pha tih, tito na panoek o ai pongah acoehaih hoiah om oh. A duembang ah doeh oh thaih, qumning ah doeh oh thaih, khodai ai nahlanah doeh oh thaih, ni tacawt na-ah doeh oh thaih.

³⁶ Poeklak ai na-ah angzo moeng nahaeloa ka iip li to tongh o hmah na soe.

³⁷ Nangcae khaeah kang thuih o ih hae mi boiboih khaeah doeh ka thuih: Acoe hoi zing oah,” a naa pae.