Luka 5 - Asang Khongso New Testament

Hnukbang Hmaloe Koeknawk A Kawk

¹ Nito loa Jesuh to Gennesaret Tuili tuitaeng ah angdoet na-ah Sithaw lok tahngai hanah mipui mah anih khae ka hnai koeh ah angnuih anget o.

² Tona-ah tuicing ah palong hnetto paeh o sut ih to a hnuk; tangaa naehkungnawk loa palong to caeh o tak moa proek palok to pasop o.

³ Jesuh loa Simon ih palong thungah akun moa tuitaeng hoitoah tuili bangah setta ah angthuii hruet hanah a thuih pae. Jesuh loa palong thungah anghnut moa mipuinawk to a patuk.

⁴ Lok a thuih boih pacoeng na-ah Simon khaeah, “Tui kathuk bangah palong to pathuii aloa nampuinawk hoi palok to haeng oah,” tiah a naa pae.

⁵ Simon mah, “Angraeng, panki hoiah qum puek ka haengh o e tidoeh a man ai. To-e haeng ah na tih nahaeloa ka haengh han vop,” tiah a pathim.

⁶ Palok loa a haengh o moa tangaa paroeai a man moa paloknawk doeh angsih dui boah.

⁷ Topongah palong kalah pongih kaom ampuinawk to, angzo oloa na bom oah, tiah ban taloihhaih hoiah a kawk o. Angzoh o moa palong hnetto ka koiah tangaa to pacaengh o moa palong loa a tup dui.

⁸ Simon Piter mah ato to a hnuk na-ah Jesuh ih hma-ah khok samkrawn hoiah tabok moa, “Angraeng, kai hae na caehtak ah, kami kazae ni,” tiah a naa.

⁹ Angmah hoi angmah taengah ka om kaminawk mah a naeh o ih tangaa to a pop parai pongah a dawnrai o boih.

¹⁰ Tobatih toengah Simon ih ampui, Zebedi capa Jakob hoi Johan hnit mah doehsoe a dawnrai hoi toeng. Jesuh mah Simon khaeah, “Zi hmah, vaihi hoiloa kami ka naehkung ah na om tih,” tiah a naa pae.

¹¹ Palong to tuicing bangah a yaeh o, tiboih to a caehtak o moa Jesuh hnukah baang o.

Ngansae Kaman A Hoihsak

¹² Vaito loa ngansae nathaih hoiah patang ka khang nongpa longto a ohhaih ih vang ah to Jesuh a oh. Anih mah Jesuh to a hnuk na-ah a hma-ah tabok moa, “Angraeng, na koeh nahaeloa nang thoengsak thai,” tiah tahmenhaih a hnik.

¹³ Jesuh loa a ban pazang moa a sui. “Thoengsak ka koeh, thoeng lai ah,” tiah a naa. Vaipang ta-ah ngansae nathaih ih to hoih roep.

¹⁴ Jesuh mah anih khaeah, “Mita khaeah doeh thui hmah, to-e qaihma khaeah caeh poe aloa anih mah khen na soe; topacoengah na hoih boah tito mi boih hma-ah amtuengsak hanah Mosi mah lokpaek ih batiah angbawnhaih to sah ah,” tiah a naa pae.

¹⁵ To-e Jesuh ih tamthang loa hmuenh kruekah amthang aep aep, mipuinawk mah a lok tahngai hanah angzoh o moa a nathaih ihnawk to doeh a hoihsak.

¹⁶ To-e anih loa kami amdinghaih hmuenh ah to a caeh moa kho a phoeh toemtoem.

Kamkhawn Kami A Hoihsak

¹⁷ Nito loa Jesuh mah patuk na-ah Farasi thoemto hoi Tawklok patukkungnawk loa toah anghnut o toengh. Anihcae loa Jerusalem vang hoi Galili prae hoi Judea prae vang kruek hoitoah kangzonawk ni. Ngoina kaminawk hoihsak hanah Angraeng hmuensak thaihaih ih loa Jesuh khaeah a oh.

¹⁸ Kami thoemto mah kamkhawn nongpa longto hnibaih maekah sakrang hoiah angzawn o, im thungah akunhaih moa Jesuh ih a hma-ah suek han thuih o.

¹⁹ To-e kami pop hmoek pongah akunhaih thaih ih a lam om ai. Topongah imphu ah dawh o haih moa im padih ih hlungphaek to takhoe o moa mipui umli, Jesuh ih a hma-ah hnibaih hoi qoekah pakhrak o tathuk.

²⁰ Anihcae taanghaih natanmaw a tawnh o tito Jesuh mah a hnuk na-ah kamkhawn kami khaeah, “Kampui, na zaehaih boih to tahmen ah oh boah,” tiah a naa.

²¹ Tawklok patukkungnawk hoi Farasinawk loa angmahcae hoi angmahcae to, “Sithaw thuihsaehaih hibatih lok ka pae kami hae amimaw? Sithaw maeto khueh mah ni loa zaehaih boih tahmen thaih,” tiah a ti o.

²² Jesuh mah anihcae dawnhaih ih to panoek pae moa anihcae khaeah, “Tipongmaw hibatih hmuen to na dawn o?

²³ ‘Na zaehaih boih tahmen ah oh boah’ tihae maw ka zoi kue, tiaibaloa ‘Angthawk aloa taka ah,’ tihae maw ka zoi kue?

²⁴ Topongah Kami Capa mah hae longnui ah zaehaih tahmen hanah akaa a tawnh tito nangcae khaeah ka patueng han,” tiah a naa pae. Topongtoah kamkhawn kami khaeah, “Kang thuih: Angthawk ah, hnibaih to la aloa im ah caeh ah,” tiah a naa.

²⁵ Vaipang ta-ah kamkhawn kami loa mi boih hma-ah to angthawk, hnibaih to a lak moa Sithaw pakoeh lamhoi im ah amlaem.

²⁶ Mipui loa katingai a dawnrai o. Zit hoiah koi o, Sithaw to pakoeh o moa, “Vaihni ah a hnuk o ih hmuen loa dawnrai han oh hae!” tiah a ti o.

Jesuh Mah Levi A Kawk

²⁷ Topacoengah Jesuh loa a caeh moa tamut congkung ahmin Levi, angmah ih zung ah kanghnu to a hnuk. Jesuh mah, “Kai hnukah baang ah,” tiah a naa pae.

²⁸ Levi loa angthawk, cungriboih to a caehtak moa a baang.

²⁹ Topacoengah Levi loa angmah im ah Jesuh hanah buh pacahhaih poipui to a sak pae moa a pacae ih kaminawk thungah paroeai koek loa tamut congkungnawk hoi kami kalahnawk ni.

³⁰ Farasi thoemto hoi Tawklok patukkung thoemto angmahcae ih a bu thungah ka omnawk loa Jesuh hnukbangnawk to laisaep o thuih. “Tipongmaw tamut congkungnawk hoi kalah kami kazaenawk hoiah nawnto na cak na naek o?” tiah a duengh pae o.

³¹ Jesuh mah anihcae khaeah, “Ngantui kaminawk han loa dawkta angtoeng ai, nganna kaminawk khueh mah ni angtoeng o.

³² Kami katoengnawk to a zae o haih ih dawn pakhuemsak hanah kangzo ai, kami kazaenawk to a zaehaih ih dawn pakhuemsak hanah ni kangzoh,” tiah a naa.

Buhzahhaih Kawng Lokduenghhaih

³³ Kami thoemto mah Jesuh khaeah, “Johan ih hnukbangnawk loa buh a zah o toepsoep moa kho doeh a phoeh o moa Farasinawk ih hnukbangnawk doeh totiah a sak o toengh; to-e nang ih hnukbangnawk loa a cak a naek o,” tiah a naa pae o.

³⁴ Jesuh mah, “Zupaluen poi ah pacae ih kaminawk hae zulakung to anihcae khaeah a oh nathungah buh hoiaiah na caehsak thaih tih, tiah na dawn o maw? Na dawn o mak ai roeroe.

³⁵ To-e Zulakung hae anihcae khae hoitoah lak ving ih ani to na pha ueloa tona-ah loa buhza o tih,” tiah a pathim.

³⁶ Jesuh mah hi patahhaih lok to a thuih pae bae: “Mimah doeh laihaw kangquem to abuhaih hanah laihaw kangtha to asik vaih ai. Asih nahaeloa laihaw kangtha to loa asih pawh ah om ueloa laihaw kangquem to abu haih na-ah akaih akik mak ai.

³⁷ Mimah doeh misurtui kangtha to moihin tabu kangquem thungah lawn vaih ai, kawmawtiah misurtui kangtha mah moihin tabu kangquem to tapoksak phawt tih, misurtui to amsah king ueloa moihin tabu doeh amro boih tih.

³⁸ Topongah loa misurtui kangtha loa moihin tabu kangtha thungah lawn han angaih.

³⁹ Moa mimah doeh misurtui kangquem a naek pacoengah loa kangtha to loa koeh ai. ‘Kangquem to loa a khraem kue,’ a ti o,” tiah a naa.