Luka 24 - Asang Khongso New Testament

Jesuh Angthawklethaih

¹ Yahni khawnbang khawnthaw huek ah nongpuinawk loa aroep coek ih hmuihoihnawk to a sinh o moa taprong ah to a caeh o.

² Taprong khaw khah ih hlung tampaepui kam-ong to a hnuk o;

³ topongah anihcae loa akun o; to-e Angraeng Jesuh ih qok to hnuh o ai.

⁴ Hi kawng pongah a dawnrai o moa angdoet o sut na-ah nawnetta ah nongpa longhnetto kahni kanglung kang khuk to anihcae taengah angdoet pae.

⁵ Nongpuinawk loa zithaih hoiah a koi o moa long ah to tabok o; tona-ah anih hnit mah, “Tipongmaw kadueh kaminawk salak thungah kahing kami to na pakrong o?

⁶ Anih loa hiah om ai boah, angthawk zawh boah. Galili ah a oh nathuemah nangcae khaeah a thuih ih to pahnet o hmah:

⁷ ‘Kami Capa loa kami kazaenawk ban thungah paek o ueloa kraws ah takhing o tih, moa ni thumto pacoengah angthawklet tih,’ a tih to loa,” tiah a naa pae hoi.

⁸ Tona-ah nongpuinawk loa a lokthuih ih to a dawn o hlet let moa,

⁹ taprong hoitoah amlaem o na-ah hi hmuen kawng boiboih to hnukbang hahlaito hoi mi kalahnawk khaeah to a thuih pae o.

¹⁰ Nongpuinawk to loa Meri Magdalin, Joanna hoi Jaem amno Meri cae ni; anihcae hoi anihcae hoiah ka caeh nawn nongpui kalahnawk mah doeh hi kawng to kawkpatoehnawk khaeah a thuih pae o.

¹¹ To-e kawkpatoehnawk loa nongpuinawk mah thuih ih to lokpui lokca ah dawn pae o ai moa tang pae o ai.

¹² To-e Piter loa angthawk moa taprong bangah to a cawnh; tongkhum tathuk moa qok abamhaih ih kahni khueh to a hnuk, kalah tidoeh hnuh ai. Topacoengah totiah hmuen ka om to a dawnrai phi hoiah im ah amlaem.

Emmaus Vang Bangah Caehhaih

¹³ Tona ni toengah Jesuh ih hnukbang longhnetto loa Jerusalem hoitoah meng sarihto roekrak kahla Emmaus naa pae ih vang ah a caeh hoi moa,

¹⁴ hmuen kaom tangcaenawk kawng boih to longto hoi longto a thuih hoi.

¹⁵ Totiah a thuih hoi moa aram hoi li nathuemah Jesuh angmah to a hnaih thuih moa a caeh haih hoi nawn.

¹⁶ Angmah to a hnuk hoi e mat hoi ai.

¹⁷ Jesuh mah anih hnit khaeah, “Na caeh hoi na-ah lam ah longto hoi longto ti loknawk maw na thuih hoi tuek,” tiah a duengh pae. Anih hnit loa mikhmai kasae rom hoiah angdoet hoi sut.

¹⁸ Kleopas naa pae ih longto mah, “Jerusalem vang ah ka paqai kaminawk thungah nang khueh hae maw zangduem pangah toah hmuen kaom to panoek aiah ka om?” tiah a naa.

¹⁹ Anih mah, “Ti hmuen to maw?” tiah a duengh. Anih hnit mah, “Nazareth Jesuh nuiah hmuen ka thoknawk to,” tiah pathim pae hoi. Hi kami loa Sithaw hoi kaminawk boih mikhnuk ah tahma longto ah a oh moa a thuih hoi a sak ih boih pongah hmuensak thaihaih ih ka tawn ni, tiah a dawn o.

²⁰ Aicae ih qaihma kacoetanawk hoi ukkungnawk hum hanah a tahlang o moa kraws pongah takhing o.

²¹ Anih loa Israel kaminawk ka loihsakkung ah om tih tito ah aicae mah oephaih to tawnh o boah. Tokhueh aiah totiah hmuen kaom to vaihi hae ni thumto a oh boah.

²² Kaicae thungih nongpui thoemto mah kaicae hae dawn ang raisak o; anihcae loa khawnthaw ah taprong ah to a caeh o,

²³ to-e a qok to hnuh o ai. Amlaem o moa, “Anih loa a hing let boah tiah ka thuii vanmi hnit ih hnuksakhaih to ka hnuk o tiah ang thuih o, tiah a naa.

²⁴ Kaicae thungih thoemto to taprong ah a caeh o moa nongpuinawk mah a thuih o ih batiah toengah a hnuk o toengh; to-e angmah to loa hnuh o ai toengtoeng,” tiah a thuih pae hoi.

²⁵ Tona-ah Jesuh mah anih hnit khaeah, “Namthu hoi phi hae loa! Tahmanawk mah thuih ih boiboih to taang hanah na rai hoi phi to loa!

²⁶ Messiah hanah hinawk boiboih to patang khang pacoengah a lensawkhaih thungah akun hanah aloe na ai maw?” a naa.

²⁷ Moa Jesuh mah Cabu Kacai thungah Mosi cabunawk hoikamtong tahmanawk ih tarik ih karoekto angmah ih kawng tarik ih boiboih to anih hnit khaeah a thuihpacaih pae.

²⁸ A caeh hoi hanih vang to phak tom na-ah Jesuh loa kahla ah ka caeh hanih batiah a oh;

²⁹ to-e patawn hoi cawt moa, “Kai hnit khaeah toem halat ah; niduem zawh boah moa kho doeh ving tom boah,” tiah a naa pae hoi. Topongah anih hnit khaeah toemh hanah a caeh.

³⁰ Anih hnit hoiah buh cak hanah anghnut, takaw to a lak moa kawn lok a thuih pacoengah takaw to a aeh moa a pazet pae hoi.

³¹ Tona-ah anih hnit ih mik to kacaipin ah amtueng moa Jesuh to a mat hoi, to-e anih hnit mikhnuk ah anghmat ving let.

³² Anih hnit loa longto hoi longto, “Loklam ah lok a thuih moa Cabu Kacainawk to a thuihpacaih na-ah aihnit ih a thungah hmai ka kang batiah a oh na ai maw to a?” tiah a tih hoi.

³³ Anih hnit loa angthawk hoi phrat moa Jerusalem ah amlaem hoi let; hnukbang hahlaito hoi kalahnawk kangqum o cu to a hnuk hoi moa,

³⁴ “Angraeng loa angthawklet tangtang boah. Simon khaeah amtueng boah,” tiah a thuih o ih lok to a thaih hoi.

³⁵ Anih hnit mah doeh loklam ah hmuen ka om hoi takaw a aeh na-ah Angraeng ni, tiah a mat hoi ih kawng to a thuih pae hoi toengh.

A Hnukbangnawk Khaeah Amtuenghaih

³⁶ Ato to a thuih pae hoi li na-ah nawnetta ah anihcae salak thungah Angraeng angmah to angdoet moa anihcae khaeah, “Nangcae khaeah monghaih oh na soe,” tiah a naa.

³⁷ Anihcae loa paroeai a zit o, kamlaa ka hnuk o tiah a dawn o.

³⁸ To-e anih mah, “Tipongmaw na mawnh o? Tipongmaw nangcae palung thungah oepvawthaih ih to a oh?

³⁹ Ka ban hoi ka khok hae na khen oah, Kaimah hae boah ni. Kai hae na pathoep oah, na panoek o tih; kawmawtiah kamlaa loa takngan hoi ahuh to om ai, kai loa ka tawnh tito na hnuk o,” tiah a naa.

⁴⁰ Totiah a thuih moa a ban hoi a khok to a patuek pae o.

⁴¹ Taang o thaih ai toengtoeng, palung anghoehaih hoiah a koi o moa dawn doeh a rai o; topongah anihcae khaeah, “Hiah timaw maemaeto cak hanah na tawnh o maw?” tiah a naa.

⁴² Tangaa thongh ih katae bum maeto a paek pae o,

⁴³ a lak moa anihcae hma-ah to a cak pae.

⁴⁴ Topacoengah anihcae khaeah, “Nangcae khaeah ka oh nathuemah kang thuih o ihnawk to loa hi hmuennawk hae ni: Mosi Tawklok cabu thung hoi tahmanawk mah tarik ih cabu thung hoi Sam cabu thungah kai ih kawng tarik ih boiboih to acung king han a oh,” tiah a naa.

⁴⁵ Moa Cabu Kacai mah a thuih ih to panoek thaih hanah anihcae ih palungthin mik to a aangsak.

⁴⁶ Anihcae khaeah, “Tarik ih loa hi ni: Messiah loa patang khang ueloa ni thumto pacoengah duekhaih thung hoitoah angthawklet tih,

⁴⁷ moa anih hmin hoiah zae dawn pakhuemhaih hoi zae tahmenhaih tamthang lok to Jerusalem hoitoah amtong moa caeng kaminawk boiboih khaeah thuih ah om tih.

⁴⁸ Nangcae loa hi hmuen ka omnawk panoekkung saksi ah na oh o.

⁴⁹ Kaimah khaekhaeh mah Pa mah lok amaih ih to nangcae nuiah kang patoeh han. To-e ranuibang hoitoah hmuensak thaihaih ih to nangcae nuiah phak airoek loa vangpui thungah na zing oah,” tiah a naa.

Jesuh Van Ah Dawhhaih

⁵⁰ Topacoengah vangpui thung hoitoah Bethani vang karoekto a caeh haih. Toah to a ban to pazang moa anihcae to mangtuihoihhaih a paek.

⁵¹ Mangtuihoihhaih a paek li na-ah anihcae khae hoitoah amhoe tak ving moa van ah to lak tahang ah oh.

⁵² Anih to a bok o, palung anghoehaih hoiah Jerusalem ah amlaem o let moa,

⁵³ anihcae loa atue boiboih to Tempal thungah Sithaw khaeah kawn lok thuih hanah a patoh o.