Luka 2 - Asang Khongso New Testament

Jesuh Zahhaih

¹ Tona tue ah prae ukkung Sangpahrang Augastas mah a uk ih Rom prae thung boiboih ah milu kroek moa ahmin lak king hanah lok a paek.

² Hi milu kroekhaih hmaloe koek ah hae Kuirinias loa Siria ukkung ah a oh.

³ Topongah mi boih mah angmahcae khaekhaeh mah ahmin to khrumh hanah angmahcae vang ah to caeh o rip.

⁴ Joseph loa Galili prae Nazareth vang hoitoah Sangpahrang David tacawthaih ih hmuenh, Judea prae Bethlehem vang ah to a caeh. Joseph toah a caehhaih ih loa David ih cadii ah a oh pongah ni.

⁵ Milu kroek na-ah ahmin khrumh hanah to angohhaih hanah lok kamaih tangcae ah kaom Meri hoiah to a caeh hoi. Meri loa zokbum ah oh moa,

⁶ Bethlehem vang ah a oh hoi nathuemah nauk zahhaih ani khrah to a phak boah.

⁷ A calu ah nongpa to a zah moa kahni hoiah abam pacoengah maitaw okduk thungah pasong; kawmawtiah angvin toemhhaih im ah to anih hnit hanah ahmuenh om ai.

Tuukroekungnawk hoi Vanminawk

⁸ To prae thungah to angmahcae ih tuu huto ka khenzawn moa tawtaqak ah ka iip tuukroekung thoemto a oh.

⁹ Angraeng ih vanmi longto loa anihcae khaeah amtueng moa Angraeng lensawkhaih to anihcae nuiah aang pae. Anihcae loa paroeai a zit o;

¹⁰ to-e vanmi mah anihcae khaeah, “Zi o hmah! Nangcae hanah tamthang kahoih kang sinh; ato tamthang kahoih mah mi boiboih hanah anghoehaih kalen parai to na sin tih.

¹¹ Vaihni roeroe ah David vangpui ah nangcae ih pahlongkung Khrih Angraeng loa zah boah.

¹² Moa hi hae nangcae hanah amathaih iah om tih: Naukta to kahni hoiah abam moa maitaw okduk thungah pasong ih to na hnuh o tih,” tiah a naa.

¹³ Nawnetta ah vanmi hoiah nawnto ah van ih vanmi risa bupui to amtueng moa Sithaw to saphawhaih laa a sak o:

¹⁴ “Van kasang koek ah Sithaw lensawkhaih oh na soe, Palung a daeh ih kaminawk khaeah hi long ah monghaih oh na soe!” tiah a thuih o.

¹⁵ Vanminawk loa anihcae khae hoitoah van ah amlaem o let na-ah tuukroekungnawk loa longto hoi longto, “Bethlehem vang ah caeh o siloa Angraeng mah aicae khaeah a thuih ih hmuen ka thok to khen o si,” a ti o.

¹⁶ Topongah karang ah caeh o moa Meri hoi Joseph to angqum o moa maitaw okduk thungah pasong ih naukta to a hnuk o.

¹⁷ Tuukroekungnawk mah naukta to a hnuk o na-ah vanmi mah naukta kawng a thuih ih to anihcae khaeah a thuih pae o.

¹⁸ Tuukroekungnawk mah a thuih o ih ka thaih kaminawk boiboih mah a dawnrai phi.

¹⁹ Meri loa hi hmuennawk boih hae palung thungah aken moa kathuk paraiah a dawn.

²⁰ Tuukroekungnawk loa amlaem o moa a thaih hoi a hnuk o ihnawk boih pongah Sithaw saphawhaih laa a sak o. Vanmi mah anihcae khaeah a thuih ih batih toah a oh tangtang.

Jesuh Ahmin Phuiihaih

²¹ Tabaihto pacoengah naukta loa tangzat hin aah tue akoep na-ah Jesuh tiah ahmin phuii o. To ahmin loa amno mah a naengh ai nahlanah vanmi mah a thuih pae roeh ih ahmin ni.

Tempal Ah Jesuh Tahlanghaih

²² Mosi ih Tawklok mah lokpaek ih batiah thoengcaisakhaih ih to sak hanah Joseph hoi Meri hnit han atue mah a phak. Topongah naukta to Angraeng khaeah tahlang hanah Jerusalem ah a caeh haih hoi.

²³ Angraeng ih Tawklok cabu thungah loa, “Calu nongpa boih loa Angraeng khaeah tahlang hanah a oh,” tiah tarik.

²⁴ Tokhueh aiah Angraeng ih Tawklok mah a kuek ih batih toengah pahuu hnetto, tiaibaloa aapahu cata hnetto hoiah lucik sak hanah a caeh hoi.

²⁵ Tona tue ah Simeon naa pae o ih longto Jerusalem vang ah a oh. Anih loa kami kahoih hoi Sithaw ka zi kami ah oh moa Israel kami pahlong ah oh hanah ka zing toemoe kami ah a oh. Cai Pakhra mah a oh haih moa,

²⁶ “Angraeng mah lok amaih ih Messiah to na hnuh airoek loa na dueh mak ai,” tiah kacai ah taphong.

²⁷ Tona-ah Cai Pakhra zaehoihhaih hoiah Simeon loa Tempal thungah a caeh na-ah Tawklok mah a kuek ih batih toengah anih hanah sak pae hanah amno ampa hnit mah naukta Jesuh to Tempal thungah angzoh haih.

²⁸ Simeon mah naukta to ban hoiah tapom moa Sithaw to pakoeh:

²⁹ “Angraeng, vaihiah na lok amaihhaih ih to na cungsak boah moa, na tamtoeh kai hae kamong katae ta-ah nang caehsak thai boah.

³⁰ Na pahlonghaih loa ka mik hoiah ka hnuk khaekhaeh boah,

³¹ mi boiboih mikhnuk ah na paroep ih pahlonghaih to:

³² “Ato pahlonghaih loa Gentelnawk khaeah na koehhaih loklam patuekkung aanghaih iah oh moa, nangmah ih kami Israel kaminawk khaeah lensawkhaih ka phasakkung ah oh,” tiah a thuih.

³³ Simeon mah naukta ih kawng a thuih to amno hoi ampa mah thaih na-ah a dawnrai hoi.

³⁴ Simeon mah anih hnit hanah tahamhoihhaih to a paek moa amno Meri khaeah, “Hi naukta loa Israel kaminawk thungah kami zetpui amrohaih han hoi pahlonghaih hanah Sithaw mah a qoih ih ni. Angmah hae Sithaw khae hoi-ih kangzo amathaih iah om tih; kami paroeai mah angaekhaih iah om ueloa,

³⁵ totiah kasae ah thuih o haih ih ranghoiah palung thungah tamqu lamah dawnhaih ihnawk boih to amtueng pae o lat tih. Moa palungsethaih ih mah songsen batiah na palungthin to na thun tih,” a naa pae.

³⁶ Tahma kacoeh phi lumhmai longto ahmin Anna naa pae o ih to a oh moa anih loa Asher caeng thungih Fanuel canu ni. A sava hoiah saning sarihto khueh angoh hoi moa,

³⁷ vaihi loa saning quitazetto pacoeng palito a oh boah. Tempal to caehtak vaih ai moa qum thun Sithaw a bok moa buhzah hoi khophoehhaih a tawnh toemoe.

³⁸ Tona tue thuemah to angzoh toeng moa Sithaw khaeah kawn lok a thuih. Topacoengah Sithaw mah Jerusalem loihsak let tih tiah ka zing kaminawk boiboih khaeah naukta ta kawng to a thuih pae.

Nazareth ah Jesuh Amlaem Haih Let

³⁹ Joseph hoi Meri loa Angraeng ih tawklok mah a nguek ih boih to a sak hoi king pacoeng na-ah Galili prae Nazareth vang angmah hnit im ah amlaem hoi let.

⁴⁰ Naukta loa a qoengh tahang moa a tha a oh; ciinghaih hoiah a koi moa Sithaw ih mangtuihoihhaih to a nuiah a oh.

Naukta Jesuh Tempal Thungah

⁴¹ Jesuh amno hnit ampa loa saning kruekto Takantak Poi patoh hanah Jerusalem ah a caeh hoi toemoe.

⁴² Jesuh loa saning hlaihnetto akoep na-ah a caeh noek batiah poi kungah to a caeh.

⁴³ Poi to aboeng pacoeng na-ah im ah amlaem han amsak o, to-e naukta Jesuh loa Jerusalem ah oh. Ato to amno hnit ampa mah panoek hoi ai;

⁴⁴ ampuinawk khaeah a oh mue tiah a dawn hoi, topongah thunqui a caeh hoi moa a sanauknawk hoi ampuinawk salak thungah pakrong hoi khing.

⁴⁵ To-e hnuh hoi ai, topongah Jerusalem ah pakrong hanah amlaem hoi let.

⁴⁶ Ani pathum ah Tempal thungah to a hnuk hoi, patukkung Judah kaminawk khaeah anghnut, anihcae ih lok to tahngai moa lok doehsoe a duengh toeng.

⁴⁷ Anih ih lok ka thaihnawk boiboih mah palunghahaih hoiah lok pathim ih to a dawnrai o sut.

⁴⁸ A hnuk hoi na-ah amno hnit ampa mah doeh a dawnrai hoi moa amno mah, “Ka capa, tipongmaw hitiah hae nang sak? Nam pa hoi mawnhaih hoiah kang pakrong hoi khing,” tiah a naa.

⁴⁹ Jesuh mah, “Tipongmaw nang pakrong hoi loa? Pa im ah ka oh han a oh tito na panoek hoi ai maw?” tiah a naa.

⁵⁰ To-e a thuihkoehhaih ih to panoek pae hoi ai.

⁵¹ Topacoengah Jesuh loa amno hnit ampa hoiah Nazareth ah amlaem moa a lok tahngai ah oh. Amno mah hi hmuennawk boiboih hae palung thungah pakuem cet.

⁵² Jesuh loa takbum bangah doehsoe, palunghahaih bangah doehsoe a qoengh tahang moa Sithaw hma hoi kami hma-ah mikhmai kahoih to a hnuk.