Luka 19 - Asang Khongso New Testament

Jesuh hoi Zakiah

¹ Jesuh loa Jeriko vang ah akun moa vang thung hoitoah a caeh poe.

² Toah to tamut congkung kacoeta longto ahmin Zakiah to a oh moa anih loa angraeng parai.

³ Jesuh loa mimaw tito hnuk hanah a koeh parai e angmah to kami ka hnaem daek ta-ah a oh moa mipui mah ving khoep pongah hnuh thaih ai.

⁴ Topongah mipui hma-ah to a cawnh moa ato lam bangah ka caeh Jesuh to hnuk koeh ah thaiduet kung maeto nuiah to a dawh.

⁵ Jesuh loa ato hmuenh to a phak na-ah a doeng tahang moa Zakiah khaeah, “Zakiah, karang ah ahum tathuk ah, vaihni ah na im ah kang toemh han,” tiah a naa pae.

⁶ Zakiah loa karang ah ahum moa palung anghoe parai hoiah a toemhsak.

⁷ Ato ka hnuh kaminawk boiboih mah a prong o moa, “Hi kami loa kami kazae im ah a toemh hanah a caeh,” a ti o.

⁸ Zakiah loa angdoet moa Angraeng khaeah, “Tahngai ah, Angraeng! Ka tawnh ih hmuenmae ahap loa kamtang kamlai kaminawk ka paek han, kami longlongto kaling moa hmuenmae to ka lak pae ving nahaeloa alet palito ah ka pathok let han,” tiah a naa.

⁹ Jesuh mah, “Vaihni ah hi im ah pahlonghaih to a phak boah, kawmawtiah ahi kami doeh Abraham ih cadii ah a oh toengh.

¹⁰ Kami Capa loa kami kanghma pakrong han hoi pahlong hanah ni angzoh,” tiah a naa.

Sui Phoisa Patahhaih

¹¹ Hi lok hae mipui mah tahngai o li na-ah Jesuh mah patahhaih maeto to a thuih pae. Anih loa Jerusalem a phak tom boah pongah Sithaw Poenghaih to amtueng roep tih boah tiah a dawn o.

¹² Topongah anih mah, “Vaito loa angraeng longto a oh moa anih loa prae kahla paraiah a caeh moa sangpahrang ah a coengh pacoengah im ah amlaem let.

¹³ A caehtak ai na-ah angmah ih tamtoeh long hato a kawk moa sui phoisa maeto a paek poeng moa, ‘Ka caeh nathung ahi tangka hoiah kapaii to sah o haih ah,’ tiah a naa.

¹⁴ Vaihi angmah kaminawk mah anih to a hnukmaa o, topongah, ‘Hi kami loa sangpahrang hanah ka koeh o ai,’ tiah ka thui hanah a hnukah laicaenawk to patoeh o.

¹⁵ “Ato angraeng loa sangpahrang ah coengh pacoengah anghloih let. Anih mah kapaii sakhaih hanah phoisa a paek pae ih to kamrai nazetto maw a hak o tito panoek hanah a tamtoehnawk to a hma-ah amtueng hanah lok a paek.

¹⁶ Hmaloe koek tamtoeh to angzoh moa, ‘Angraeng, nang paek ih phoisa maeto hoiah kamrai sui phoisa hato ka hak,’ tiah a naa.

¹⁷ Angraeng mah, ‘A hoih, nang loa tamtoeh kahoih ni. Hmuen tetta nuiah oep-om ah na oh pongah vangpui hato ukkung ah kang suek han,’ tiah a naa.

¹⁸ Apahnithaih tamtoeh to angzoh moa, ‘Angraeng, nang paek ih sui phoisa maeto hoiah kamrai pangato ka hak,’ tiah a naa.

¹⁹ Anih khaeah, ‘Nang doeh vangpui pangato ukkung ah kang suek han,’ tiah a naa.

²⁰ “Tamtoeh kalah longto angzoh moa, ‘Angraeng, nang ih sui phoisa loa hiah a oh. Angsatui hukhaih ih pavawh hoiah tapawk moa ka hawk hmoek.

²¹ Nang loa khruengmueng kami ah na oh pongah kang zit. Nangmah ih ai to doeh na lak moa cangti na tuh ai doeh na aah halat,’ tiah a naa.

²² Anih mah, ‘Nang tamtoeh kahoih ai! Nang to zawnsak hanah nangmah ih lok hnawt hnawt to kang patoh han. Khruengmueng kami tito na panoek, kaimah ih ai to doeh ka lak moa cangti ka tuh ai to doeh ka aah tito na panoek.

²³ Totibaloa tipongmaw kai ih tangka to tangka suekhaih ih zung ah na suem ai? Na suek nahaeloa, kanghloi let na-ah tangka to acarang hoiah ka hak han to,’ tiah a naa.

²⁴ “Topacoengah to ih kangdoe kaminawk khaeah, ‘Anih khaeih sui phoisa to la pae o aloa sui phoisa hato ka tawn khaeah paek oah,’ tiah a naa.

²⁵ To-e anihcae mah, ‘Angraeng, anih loa phoisa hato a tawnh boah,’ tiah a naa o.

²⁶ Anih mah, ‘Loktang ta-ah kang thuih o: Ka tawn kaminawk boih khaeah ka pop aep ah thapthuih bae ah om tih; to-e tidoeh ka tawn ai kaminawk to loa a tawnh ih ta mataeng doeh lak pae kik ah om tih.

²⁷ Vaihi ah, angmah ih sangpahrang hanah ka koeh ai ka misanawk to loa hiah angzoh haih oloa ka mikhnuk ah hae paduek oah,’ a naa,” tiah Jesuh mah a thuih.

Pazawkhaih Hoiah Jerusalem Ah Akun

²⁸ Jesuh mah hi lok hae a thuih pacoengah anihcae hma-ah Jerusalem ah to a caeh.

²⁹ Oliv Mae ih Bethfeih hoi Bethani vang to a phak tom na-ah a hnukbang longhnetto to a hma-ah to a patoeh moa,

³⁰ hitiah lok taquk: “Na hma-ih vang ah to caeh hoi ah, na kun hoi na-ah amimah doeh angthueng vaih ai ih laa hrang cata kangpaeh sut to na hnuh hoi tih. Aqui to khramh hoi aloa hiah angzoh hoi haih ah.

³¹ Kami longlongto mah, ‘Tipongmaw na khramh?’ tiah na dueng nahaeloa, ‘Angraeng mah angtoeng,’ tiah naa pae hoi ah,” tiah a thuih pae.

³² A caeh hoi na-ah Jesuh mah a thuih batih toengah tiboih to a hnuk hoi.

³³ Laa hrang cata to aqui khramh hoi nathuemah ka tawnkungnawk mah, “Tipongmaw na khramh hoi?” tiah a naa.

³⁴ Anih hnit mah, “Angraeng mah angtoeng,” tiah pathim pae hoi.

³⁵ Topacoeng loa laa hrang ca to Jesuh khaeah ahoih pae hoi. Moa laa hrang nuiah kahni to baih o moa Jesuh to angthuengsak o.

³⁶ A caehhaih lam ah mipui mah kahninawk to a baih pae o poe.

³⁷ Jerusalem to a phak tom na-ah Oliv Mae ih tangthuk ah lam ahum tathukhaih ih ahmuenh hoiloa a hnukbang mipuinawk mah Sithaw khaeah kawn lok a thuih o moa hmuen kalensawk zetpui a hnuk o ih pongah khoeh puiah hangh hoiah saphaw o.

³⁸ “Angraeng hmin hoiah kangzo sangpahrang loa Sithaw mah mangtuihoihhaih paek na soe. Van ah angdaehhaih om soeloa Sithaw loa lensawkhaih oh na soe,” tiah a hangh o.

³⁹ Tona-ah mipui salak thung hoitoah Farasi kami thoemto mah, “Patukkung, na hnukbang kaminawk hae oh duem hanah lokpaek ah,” tiah a naa pae o.

⁴⁰ Jesuh mah, “Kang thuih o: Anihcae to om duem nahaeloa hlungnawk roeroe mah doeh hang o tih,” tiah a pathim.

Jesuh Mah Jerusalem A Qahthuih

⁴¹ Vangpui to a hnaih hruet hruet boah moa a hnuk na-ah a qah thuih:

⁴² “Angdaehhaih hanih ah timaw angtoeng, tito mah vaihni ah na panoek nahaeloa aw! To-e toto vaihi na hnuh thaih ai.

⁴³ Na misanawk mah angdunghaih sipae hoiah padum hmoek ueloa hnukhma bangbang hoitoah khah thuih khoep ih atue to na pha tih.

⁴⁴ Nangmah hoi sipae thungup ih kaom kaminawk boih to paduek o hmen tih. Hlung maeto boe doeh ato hmuenh ah to na caeh o tak mak ai, kawmawtiah nang to pahlong hanah Sithaw angzohhaih tue na mat ai pongah ni,” tiah a naa.

Jesuh Tempal Ah Caeh

⁴⁵ Topacoengah Jesuh loa Tempal thungah akun moa vawnsai kapaii ka sahnawk to pakak king.

⁴⁶ “Cabu Kacai thungah Sithaw mah, ‘Ka Tempal loa khophoehhaih im tiah kawk ah om tih,’ a tih. To-e nangcae mah loa kamqunawk anghawkhaih ahmuenh ah na paqoi o lat,” tiah a zoeh.

⁴⁷ Nithokkruek Jesuh loa Tempal thungah a patuk pae. Qaihma kacoetanawk, Tawklok patukkungnawk hoi pahoikungnawk mah Jesuh to hum han a koeh o.

⁴⁸ To-e hum thaih hanah loklam to pakrong hnuh o ai, kawmawtiah mi boiboih mah a lokthuih ih to tahngai boep o ai moa a lokmu maeto boe doeh moeh ving han koeh o ai pongah ni.