Lokphong 8 - Asang Khongso New Testament

Sarihhaih Tacik

¹ Tuuca mah sarihhaih tacik to paong na-ah vannui ah nazi a hapto thung tidoeh tuentaek aiah oh.

² Topacoengah Sithaw hma-ah kangdoe vanmi longsarihto ka hnuk moa mongka sarihto a paek o.

³ Kalah vanmi longto, hmuihoih hlaekhaih ih sui sabae ka sin to angzoh moa bokting haek ah angdoet. Sithaw kaminawk boih ih khophoehhaih hoiah thapthuih han hoi angraeng tangkhang hma-ah sui bokting nuiah kangdoe khaeah tahlang hanah hmuihoih zetpui a paek o.

⁴ Sithaw hma-ah kangdoe vanmi ih ban khae hoitoah hmuihoih hlaek ih hmaikhue to Sithaw kaminawk ih khoephoehhaih hoiah dawh tahang maek.

⁵ Topacoengah vanmi mah hmuihoih hlaekhaih sabae to a lak moa bokting ih hmai kamngaeh to a thungah khrumh moa longnui ah to a vah. Tona-ah kho pazih moa tangphra a puek, parae saka a krak moa tali a hnawh.

Mongka Uenghhaih

⁶ Topacoengah vanmi sarihto loa mongka sarihto uengh hanah amsak o.

⁷ Hmaloe koek vanmi mah angmah ih mongka to a uengh. Athii hoiah abaeh puk ih yae hoi hmai to longnui ah kho batiah a krak. Longnui hmuenh thumto ah hmuenh maeto loa a kangh king, thingkung hmuenh thumto ah hmuenh maeto a kangh moa phroh qam kahing boiboih to a kangh king.

⁸ Topacoengah vanmi pahnithaih mah angmah ih mongka to a uengh. Mae kalenpui hmai kangqong hoiah kahmong hmuen maemaeto tuiculi thungah a vah o. Tuiculi hmuenh thumto ah hmuenh maeto loa athii ah angcoeng king.

⁹ Tuiculi thungih hmuensak kahing hmuenh thumto ah hmuenh maeto a duek o moa tuisamphaw hmuenh thumto ah hmuenh maeto amro king.

¹⁰ Topacoengah pathumhaih vanmi mah angmah ih mongka to a uengh. Sakae kalenpui maeto, hmai kangqong hmaithaw batih to van bang hoitoah tuivapuinawk hoi tuipueknawk ih hmuenh thumto ah hmuenh maeto nuiah a krak.

¹¹ Sakae ih ahmin loa “Ka khaa” ni. Tui hmuenhthumto ah hmuenh maeto tuikhaa ah coengh moa totiah akhaa pongah kanae kaminawk paroeai duek o.

¹² Topacoengah palihaih vanmi mah angmah ih mongka to a uengh. Ni hmuenh thumto ah hmuenh maeto, khra hmuenh thumto ah hmuenh maeto hoi sakae hmuenh thumto ah hmuenh maeto loa amro king. Topongah a aanghaih o ih to hmuenh thumto ah hmuenh maeto amro moa athun hmuenh thumto ah hmuenh maeto hoi aqum hmuenh thumto ah hmuenh maeto thung aanghaih to om ai.

¹³ Topacoengah ka khet moa nilavan kasang paraiah ka zawk tahmupui maeto mah khoeh puiah, “Zitman thoh! Zitman thok! Vanmi kalah longthumto mah mongka uengh o na-ah longnui ih kaom kami boiboih han-iah natanto zitman ka thok han maw vai!” tiah thuih ih lok to ka thaih.