Lokphong 5 - Asang Khongso New Testament

Catangzawh hoi Tuuca

¹ Angraeng tangkhang nuiah kanghnu kami ih bantang bangah catangzawh maeto ka hnuk; ato catangzawh loa athungbang hoi anuibang ah tarik maek moa tacik sarihto hoiah daengh ih ni.

² Topacoengah tha kaom vanmi longto ka hnuk moa khoeh puiah ah, “Hi tacik daengh ih phraek moa catangzawh to paong hanah ka krah mimaw ka om?” tiah a hangh.

³ To-e ato catangzawh ka paong moa a thungah ka khen thai kami to vannui ah doehsoe, longnui ah doehsoe, longhlim ah doehsoe, ami doeh om ai.

⁴ Ato catangzawh to paong moa athung to khen han ka krah mita doeh ka hnuh ai pongah katingai ka qah.

⁵ Tona-ah kacoeta longto mah kai khaeah, “Qah hmah. Khenah! Judah caeng thung hoi-ih Sandeih, David ih catawn kalen mah pazawkhaih to a hnuk boah; anih mah tacik sarihto to a phraek thaih moa catangzawh to paong thaih,” tiah ang naa.

⁶ Topacoengah tuuca maeto, angraeng tangkhang ih aum ah kangdoe moa hmuensak kahing hoi kacoetanawk mah ka ven to ka hnuk o. Ato tuuca loa hum pacoeng ih batiah amtueng. Takii sarihto hoi mik sarihto a tawnh moa ato mik sarihto loa longnui bum ah patoeh ih Sithaw pakhra sarihto ni.

⁷ Tuuca loa a caeh moa angraeng tangkhang nuiah bantang ban bangah kanghnu khaeih catangzawh to a lak.

⁸ Totiah a lak boih pacoengah hmuensak kahing palito hoi kacoeta pumphae palito loa tuuca hma-ah samkrawn moa a bok. Longto mah katoeng maeto rip hoi hmuihoih hoiah kakoi sui boengloeng maeto rip to sinh o moa ato hmuihoih loa Sithaw kaminawk ih khophoehhaih ih ni.

⁹ Laa kangtha to a sak o moa: “Nang loa catangzawh to lak han hoi tacik to paong hanah na krak. Kawmawtiah nang loa hum ah na oh boah moa na duekhaih ranghoiah caeng kami congca, lok congca, caeng congca boih khae hoitoah kaminawk to Sithaw hanah qanh pae boah.

¹⁰ Nang loa aicae Sithaw ih toksak hanah qaihma caeng ah anihcae to na sak boah moa anihcae mah longnui hae uk tih,” tiah thuih o.

¹¹ Topacoengah ka khet let bae moa vanmi kroek laeklak ainawk ih lok to ka thaih. Anihcae loa angraeng tangkhang hoi hmuensak kahing palito hoi kacoetanawk taengah angdoet o moa,

¹² khoeh puiah laa a sak o moa: “Hum ih Tuuca loa tharahhaih, tawnhnang angraenghaih, ciinghaih, thaohhaih, khangzahaih, lensawkhaih, hoi saphawhaih hak hanah a krak,” tiah thuih o.

¹³ Topacoengah vannui ih kaom doehsoe, longnui ih kaom doehsoe, longhlim ih kaom doehsoe, tuiculi thungih kaom doehsoe, long hoi van ih hmuensak kahingnawk boiboih mah, “Angraeng tangkhang nuiah kanghnu hoi Tuuca khaeah saphawhaih hoi khangzahaih, lensawkhaih hoi tharahhaih loa, dungzan hoi dungzan khoekto oh poe na soe,” tiah laa a thuih o to ka thaih.

¹⁴ Hmuensak kahing palitonawk mah, “Amen!” tiah pathim o moa kacoetanawk mah samkrawn moa a bok o.