Lokphong 3 - Asang Khongso New Testament

Sardis Khrihca Khaeah Loktaqukhaih

¹ “Sardis vang Khrihca kangkom ih vanmi khaeah hitiah tarik ah: “Hi lok loa Sithaw ih pakhra sarihto hoi sakae sarihto ka tawnkung khae hoi-ih lok ni. Na sak ih to ka panoek; nang loa kahing ni tiah na hmin amthang e, na duek tito kang panoek.

² Topongah anglawt ah, na tawnh vop ih to dueh king ai nahlanah tha kangtha to la let ah. Kawmawtiah na sak ih hae Sithaw mikhnuk ah acung ai vop tito ka hnuk.

³ Topongah namtuk tangcae ih hoi na thaih ih to pahnet hmah; ato to pazui aloa na zaehaih to angqoi tak ah. Nanglawt ai nahaeloa kamqu batiah kangzoh han; kangzoh hanih atue mataeng doeh na panoek mak ai.

⁴ To-e Sardis vang ih kaom kami tamsi mah angmahcae ih hniikhuknawk to thoengpin ta-ah a suek o. Kahni kanglung to angkhuk ueloa kai hoiah caeh tih, kawmawtiah totiah caeh hanah akrak.

⁵ Pazawkkungnawk loa kahni kanglung hoiah hitiah khuk ah om tih; anihcae ih ahmin to hinghaih cabu thung hoitoah ka phrae mak ai. Kam Pa hoi angmah ih vanminawk hma-ah ‘Anihcae loa kai ih ni,’ tiah kamtueng ah ka naa han.

⁶ “Thaihhaih naa na tawnh nahaeloa Khrihca kangkomnawk khaeah Pakhra mah thuih ih hae tahngai oah,” tiah a naa.

Filadelfia Khrihca Khaeah Loktaqukhaih

⁷ “Filadelfia vang Khrihca kangkom ih vanmi khaeah hitiah tarik ah: “Hi lok loa kacai hoi oepthok kami khae hoi-ih lok ni. Anih loa David ih sawr to a tawnh moa thok to a paongh na-ah mita mah doeh kha thaih mak ai ueloa a khah ih to loa mita mah doeh paong thai mak ai.

⁸ Na sak ih to ka panoek; na thaohhaih to tamsi tiah ka panoek; kang patuk ih to na pazui moa kai hanah oepom ta-ah na oh. Na hma-ah thok kang paong pae boah moa mita mah doeh kha thaih mak ai boah.

⁹ Tahngai ah! Judah kaminawk na ai to mah, Judah kaminawk ni tiah kamlai kaminawk, Setan ih kaminawk to nangcae khaeah kangzohsak moa nangcae ih khokkung ah samkrawnsak han. Kaimah ka palung tito anihcae boih mah panoek o tih.

¹⁰ Kawmawtiah ka lokpaek hae nangcae mah palungsawkhaih hoiah na pazui o; topongah long kaminawk boih tanoek tacak hanah longnui ah kangzoh na-ah raihaih tue thung hoitoah kang loihsak han.

¹¹ Kangzoh palang han. Pazawkhaih tho to mita mah na lomh pae o han aiah na tawnh ih to hoihdak ta-ah pakuem ah.

¹² Pazawkkung loa ka Sithaw ih Tempal thungih hompui ah ka suek moa natuek doeh ka caehtak mak ai. Ka Sithaw ih ahmin hoi ka Sithaw ih vangpui Jerusalem kangtha ahmin to anih nuiah ka tarik han; ato Jerusalem kangtha loa van bang hoitoah ka Sithaw khae hoi-ih angzo tih. Ka hmin kangtha doeh anih nuiah ka tarik han.

¹³ “Topongah thaihhaih naa ka tawn mah loa Khrihca kangkom khaeah Cai Pakhra mah a thuih ih to tahngai oah!

Laodisia Khrihca Khaeah Loktaqukhaih

¹⁴ “Laodisia vang Khrihca kangkom ih vanmi khaeah hitiah tarik ah: “Hi lok loa Sithaw mah sak ih tiboih boih ih amtonghaih takung, oepom hoi kahmaan saksi ah kaom Amen khae hoi-ih lok ni.

¹⁵ Na sak ih to kang panoek; angqai doeh angqai ai, bae doeh bae ai ah na oh to kang panoek. Angqai baloa angqai ngala, bet baloa bae ngala ah oh hanah kang koeh.

¹⁶ To-e angqai doeh angqai ai, bae doeh bae aiah laklokang ah na oh pongah ka pakhaa thung hoitoah kang pathak ving han.

¹⁷ Nang mah, ‘Kai loa kangraeng moa ka tawnh ka nang; kangtoeng ih boih ka tawnh king,’ tiah na thuih. To-e kawkruk maw namtang moa tahmen thoh tito na panoek ai! Namtang, buenhkrai ah na oh moa mik na maengh.

¹⁸ Topongah angraeng sarai ah oh hanah kai khaeih sui tangtang to qanh hanah poekhaih kahoih to kang paek. Nangmah nang buenh hanah kahni kanglung to doeh qan aloa azat kaom buenhkrai ah na ohhaih ih to khuk ah. Mikhnuk thaih hanah mik pongah nok ih tuisi to doeh kai khaeah qan ah.

¹⁹ Ka palung ih kaminawk loa ka thuihtaek moa ka raek. Topongah palungthin hoiah panki aloa na zaehaih to angqoi tak ving ah.

²⁰ Tahngai ah! Thokkhang khaw ah kangdoet moa ka takhuek; ami doeh ka lok to thaih moa thok to ka paong nahaeloa im thungah ka kun moa anih hoiah buh to kacak han; anih doeh kai hoiah nawnto caa toengh tih.

²¹ Kai loa pazawkkung ah ka oh boah moa kam Pa ih tangkhang nuiah kam Pa taengah kanghnut batih toengah pazawkkungnawk loa kaimah ih angraeng tangkhang nuiah ka taengah anghnut thaih hanah akaa ka paek han.

²² “Thaihhaih naa na tawnh o nahaeloa Khrihca kangkom khaeah Pakhra mah a thuih ih to tahngai oah!” tiah a naa.