Lokphong 21 - Asang Khongso New Testament

Van Kangtha hoi Long Kangtha

¹ Topacoengah van kangtha hoi long kangtha to ka hnuk. Van hmaloe hoi long hmaloe loa anghmat boih boah moa tuiculi to om ai boah.

² Vangpui Kacai Jerusalem kangtha loa a sava angqum hanah kamthoep moa coengcoe ah kaom, sava ka sah hankoi tangla batiah Sithaw khaeih van bang hoitoah kangzo tathuk to ka hnuk.

³ Angraeng tangkhang khae hoitoah lok katuen parai to ka thaih moa, “Sithaw ohhaih im loa kaminawk khaeah a oh boah! Sithaw loa anihcae khaeah om ueloa anihcae loa angmah ih kami ah om tih. Sithaw angmah khaekhaeh mah anihcae khaeah om ueloa angmah to anihcae ih Sithaw ah om tih.

⁴ Sithaw mah anihcae ih mikkhraetui boiboih to hu pae king tih. Duekhaih om mak ai boah; palungsethaih, khuihqahhaih hoi nathaih om mak ai boah. Hmuen kangquemnawk to anghmat boih boah,” tiah a thuih.

⁵ Topacoengah angraeng tangkhang nuiah kanghnu longto mah, “Vaihi loa hmuen boiboih to kangtha ah ka sak boih boah!” tiah a thuih. Kai khaeah, “Hi lok hae tarik ah, kawmawtiah kahmaan hoi oepthok kaom lok ni,” tiah ang naa.

⁶ Anih mah, “Tok ka pacoeng boih boah! Kai loa Alfa hoi Omega, amtonghaih hoi aboenghaih iah ka oh. Tui kanghae kami boih khaeah hinghaih tuipuek to naek hanah atho hoiaiah ka paek han.

⁷ Pazawkkung ah kaom kaminawk loa ahi hae kai khaeih hnuh o tih: Kai loa anihcae ih Sithaw ah ka om ueloa anihcae loa kai ih caanawk ah om o tih.

⁸ To-e misa kasae kami, paipi alae kami, panuet pasoeh kaom kami, kami ka hum, nongpui nongpa zaehaih kasah kami, ta-an kasah kami, kraangthoi ka bok kaminawk hoi amsawn lok kathui kaminawk ohhaih hanih ahmuenh loa hmai hoi kaat hoiah kangqong tuili, pahnit duekhaih ih to ni,” tiah a thuih.

Jerusalem Kangtha

⁹ Vanmi sarihto thungih longto, nathaih kasae raekhaih hnukkhuem koek sarihto hoiah kakoi boengloeng sarihto ka sin to kai khaeah angzoh moa, “Angzo ah, Tuuca ih zu, sava ka sah hankoi linga tangla to kang patuek han,” tiah ang naa.

¹⁰ Pakhra mah ang naeh moa vanmi mah mae kasang paraiah to ang caeh o haih. Anih mah Jerusalem, Vangpui Kacai to Sithaw khae hoi-ih van hoitoah kanghum to ang patuek.

¹¹ Ato vangpui loa Sithaw lensawkhaih hoiah ka aang vangpui ni. Vanglipui loa hlung thokana, jasper hlung batiah a aang moa hmaidan batiah caipin.

¹² Ato vangpui loa sipae kalen kasang parai hoi khongkha to a tawnh moa ato khongkha to vanmi hlaihnetto mah a cong o. Ato khongkha pongah Israel kami acaeng hlaihnet tonawk ih ahmin to tarik o.

¹³ Khonghma maeto ah khongkha thumto a oh rip: niangzaebang ah khongkha thumto, aloihbang ah khongkha thumto, aluekbang ah khongkha thumto, niduembang ah khongkha thumto a oh.

¹⁴ Vangpui sipae loa takung amtonghaih hlung hlaihnetto nuiah padoet ah oh moa ato hlung hlaihnetto nuiah to Tuuca kawkpatoeh hlaihnet tonawk ih ahmin to tarik ah oh.

¹⁵ Kai khaeah lok kathui vanmi mah vangpui hoi khongkha hoi sipae to nawt hanah sui nawtcung to a tawnh.

¹⁶ Vangpui loa takii palito kangitik ah oh moa azoeng hoi avak doeh angvan king. Vanmi mah vangpui to angmah ih nawtcung hoiah a nawt: azoeng meng sangto pacoeng cumvai pangato, avak sangto pacoeng cumvai pangato, asangbang doeh sangto pacoeng cumvai pangato toengtoeng ah oh.

¹⁷ Vanmi mah sipae to doeh a nawt moa angmah patoh ih nawtcung hoiah a nawt na-ah pe cumvai hnetto pacoeng hlaitarukto a sang.

¹⁸ Sipae loa jasper hlung thokana hoiah sak ah oh moa vangpui loa hmaidan batih kacaipin sui ngai hoiah sak ah oh.

¹⁹ Vangpui sipae loa takung amtonghaih hlung loa hlung thokana congca hoiah a hoihsak iah oh. Hmaloe koek takung amtonghaih hlung loa jasper hlung hingit thokana ni, a pahnithaih loa safaiar hlung kam-ing thokana ni, a pathumhaih loa agate hlung thokana ni, palihaih loa emerald hlung thokana ni;

²⁰ a pangahaih loa onix hlung kathim thokana ni, a tarukhaih loa karnelian hlung kathimdung thokana ni, a sarihhaih loa quartz hlung kamsen thokana ni, a tazethaih loa beril hlung hingit thokana ni, a takawthaih loa topaz hlung kamsen thokana ni, hatohaih loa khalsedoni hlung kam-ing thokana ni, hahlaitohaih loa tarkhua hlung kathim hoi kamsen kangbaeh thokana moa hlaihnettohaih loa amethist hlung kamsen thokana ni.

²¹ Khongkha hlaihnetto loa pale hlung hlaihnetto hoiah sak ah oh; khongkha maeto na-ah pale hlung maemaeto ah sak rip ah oh. Vangpui thung loklam doeh sui ngai hoiah sak ah oh moa hmaidan batiah caipin.

²² Vangpui thungah tempal ka hnuh ai, kawmawtiah a tempal loa Cungri sahthai Angraeng Sithaw hoi Tuuca to boah ni.

²³ Vangpui loa nii aanghaih doehsoe, khrah aanghaih doehsoe aloe ai boah, kawmawtiah Sithaw lensawkhaih mah ato vangpui ah a aang moa Tuuca loa ato vangpui ih hmai-im ah a oh.

²⁴ Longnui kaminawk boih mah ato vangpui aanghaih ranghoiah caehhaih to hnuh o ueloa long sangpahrangnawk mah ato vangpui thungah a tawnhnang o ih hmuenmae to angzo o haih tih.

²⁵ Vangpui khongkhanawk loa thunqui paong toemoe; natuekah doeh angkhaa vaih ai, kawmawtiah toah loa aqum doeh om ai boah.

²⁶ Caeng kaminawk boih ih a lenhhaih hoi tawnhnanghaih loa ato vangpui ah na sin o tih.

²⁷ To-e ka kathoeng kacai ai loa tidoeh ato vangpui thungah akun mak ai; azat kaom hmuen kasah kami hoi amsawn lok kathui kami loa ami doeh akun mak ai. Tuuca ih hinghaih cabu thungah ahmin kangrik khueh to ni vangpui thungah akun o tih.