Lokphong 20 - Asang Khongso New Testament

Saning Sangto

¹ Topacoengah van hoi-ih kanghum tathuk vanmi longto, a ban ah boeng kanghmang tangqom kathuk ih sawr hoi sumqui kazit parai ka sin to ka hnuk.

² Anih loa zanghnii ih pahuipui dragon to a naeh, sumqui hoiah pahlet moa saning sangto thung paung moa ato dragon loa Diabol tiaibaloa Setan ni.

³ Vanmi loa dragon to boeng kanghmang tangqom kathuk thungah pakhrak moa tangqom to khah pacoengah saning sangto boeng airoek caeng kaminawk boih to alingsak han aiah tacik to daengh moa a suek. Ato pacoengah atue setta thung prawt let ah om tih.

⁴ Topacoengah angraeng tangkhangnawk to ka hnuk moa ato nuiah kanghnunawk khaeah lokcaek hanah akaa to paek ah oh. Jesuh mah taphong ih loktang lok hoi Sithaw lok to a thuih o pongah hum ih pakhranawk to doeh ka hnuk. Anihcae loa moisaeng to bok o ai, ato ih kraangthoi to doeh bok o ai, a lutae hoi a ban ah moisaeng mathaih ih to doeh tawn o ai. A hingh o moa Khrih hoiah sangpahrang batiah saning sangto thung a uk o.

⁵ (Kadueh kami kanghmat loa saning sangto boeng airoek loa hing o mak ai). Hi hae kadueh kaminawk angthawklethaih ih hmaloe koek ni.

⁶ Ahi kadueh kami angthawklethaih ih hmaloe koek ah ka om kaminawk loa kanghoe kami hoi taham kahoih kami ah oh. Pahnit duekhaih ih mah anihcae nuiah akaa tawn mak ai boah. Anihcae loa Sithaw hoi Khrih ih qaihma ah om o tih boah moa Khrih hoiah saning sangto thung uk o tih.

Setan Pazawkhaih

⁷ Saning sangto boeng pacoengah Setan loa thongim thung hoitoah tacawt ueloa,

⁸ longnui bum ah kanghaeh dung caeng kaminawk boih to aling hanah caeh o tih; ato caeng kaminawk to Gog hoi Magog tiah a naa o. Setan mah misatuk hanah takok cu ueloa tuiculi tuitaeng ih savuet zetto om o tih.

⁹ Anihcae loa longnui bum ah a caeh o moa Sithaw kaminawk ohhaih ih hmuenh hoi Sithaw mah palung ih vangpui to a ven o hmoek. To-e van bang hoitoah hmai a krak tathuk moa anihcae to a kangh king.

¹⁰ Topacoengah anihcae kaling Diabol to hmai tuili hoi kaat hmai thungah a vah o; toah to qum thun dungzan hoi dungzan raek ah om poe tih boah.

Hnukkhuem Koek Locaekhaih

¹¹ Topacoengah angraeng tangkhang kanglung kalenpui hoi ato nuiah kanghnu to ka hnuk. Ato nuiah kanghnu kami ih mikhnuk ah long hoi van to a cawnh hoi moa hnuh thai ai boah.

¹² Kami kadueh koknawk, kathoeng kalen, angraeng tangkhang hma-ah kangdoe to ka hnuk. Cabu loa adaih ah oh, topacoengah cabu kalah hinghaih cabu to adaih ah oh bae. Kadueh kaminawk loa a sak o ih to cabu thungah khrumh tangcae ih batih toengah lokcaek ah om tih.

¹³ Topacoengah tuiculi loa angmah thungih kaom kadueh kaminawk to a prawt. Duekhaih hoi taqawk kho mah doeh paung o ih kadueh kaminawk to a prawt o toengh. Anihcae boih mah a sak o ih batih taring ah lokcaek ah oh.

¹⁴ Topacoengah duekhaih hoi taqawk kho loa hmai tuili thungah a vah o. (Hi hmai tuili loa pahnit duekhaih ih ni).

¹⁵ Ami doeh hinghaih cabu thungah ahmin tarik ai boih loa hmai tuili thungah vah ah oh.