Lokphong 14 - Asang Khongso New Testament

Tuuca hoi Angmah Ih Kaminawk

¹ Topacoengah ka khet moa Zion Mae ah Tuuca kangdoe to ka hnuk; anih hoiah vanto ah tasing maeto pacoeng mongtong palito hoi sangpalito a oh o moa atonawk loa angmahcae ih ahmin hoi ampa ih ahmin to lutae ah tarik o ih ni.

² Topacoengah tacangtui ka krah tuen batih hoi khopazi batiah katuen parai lok maeto van hoi-ih ka thaih. Ato tuenh loa katoeng kakruek kaminawk mah katoeng kruek ih a tuenh hoiah ahmong.

³ Kami tasing maeto pacoeng mongtong palito hoi sangpalito loa angraeng tangkhang hma hoi hmuensak kahing palitonawk hma hoi kacoetanawk hma-ah angdoet o; laa kangtha to a sak o moa ato laa loa angmahcae khueh mah amtuk thaih ih ni. Mi boiboih thungah anihcae khueh ni krangkok ah a oh o.

⁴ Anihcae loa nongpuinawk hoiah zaesakhaih ih om aiah angmahcae hoi angmahcae to kathoeng kacai ah kaom thendoeng kacuemnawk ni. Tuuca a caeh nakruek ah pazui o. Kami kanghmat thung hoi-ih krangkok ah oh o moa Sithaw hoi Tuuca khaeah tahlang hmaloe koek ih kami ah oh o.

⁵ Lok amlai o vaih ai; pazaehaih tidoeh tawn o ai.

Vanmi Longthumto

⁶ Topacoengah nilavan ah ka zawk vanmi kalah longto to ka hnuk. Anih loa longnui kaminawk boih, kami congca boih, caeng congca boih, lok congca boih hoi prae congca boih khaeah taphong hanah dungzan Tamthang Kahoih to a phawh.

⁷ Lok katuen paraiah, “Sithaw to khangza oloa a lenhhaih to pakoeh oah! Kawmawtiah Sithaw lokcaekhaih hanih atue loa a phak boah. Van hoi long, tuiculi hoi tuipueknawk ka sahkung to bok oah,” tiah a thuih.

⁸ Vanmi pahnithaih mah vanmi hmaloe koek a hnukah baang moa, “Balilon loa amtim boah! Amtim boah! Thingan koehhaih misur mu to mi boiboih a naeksak o boah,” tiah a thuih.

⁹ Vanmi pathumhaih mah hmaloe koek longhnetto hnit hnukah a baang moa, “Ami doeh moisaeng hoi ato ih kraangthoi ka bok loa anihcae ih a lutae ah tiaibaloa a ban ah mathaih katawn kaminawk loa,

¹⁰ Sithaw ih misur mu, a palungphuihaih mu, a palungphuihaih ih boengloeng thungah tui abaeh ai roeroe ah lawn ih to nae o tih.

¹¹ Anihcae raekhaih ih hmaikhue loa boeng aiah a dawh tahang toemoe. Moisaeng hoi a kraangthoi ka bok moa a hmin mathaih katawn kaminawk han-iah loa qum thun palungmonghaih om mak ai boah,” tiah a thuih.

¹² Hitih tue thuemah Sithaw ih lokpaek ka pazui moa Jesuh hanah oepthok ah kaom Sithaw kaminawk loa palungsawkhaih hoiah pauep han angaih tih.

¹³ Topacoengah van hoi-ih lok maeto ka thaih moa, “Hi hae tarik ah. Vaihi hoikamtong ah Angraeng ih tok ka sah moa kadueh kaminawk loa tahamhoih o!” tiah a thuih. Tona-ah Pakhra mah, “Ue, ahlong tangtang! Anihcae loa a toksak patanghaih thung hoitoah anghak o tih boah, kawmawtiah a toksakhaih o ih mah anihcae to caeh haih tih,” tiah a thuih.

Longnui Cangaah Tue

¹⁴ Topacoengah ka khet moa tamai kanglung maeto ka hnuk, ato tamai nuiah kami hoiah kahmong longto anghnut; a lu ah sui angraeng lumuek to angmuek moa a ban ah cakraa kanoe parai maeto to a sinh.

¹⁵ Topacoengah vanmi kalah tempal thung hoitoah tacawt moa tamai nuiah kanghnu longto khaeah lok katuen paraiah, “Cakraa to cang aah hanah patoh ah, kawmawtiah atue loa khawt boah; longnui cang loa a hminh boih boah,” tiah a hangh.

¹⁶ Topacoengah tamai nuiah kanghnu to mah angmah ih cakraa to long ah vikvuek moa longnui ih cang to a aah.

¹⁷ Topacoengah van ih tempal thung hoi-ih ka tacawt vanmi longto ka hnuk moa anih doeh cakraa kanoe parai to a tawnh toeng.

¹⁸ Topacoengah hmai ka ukkung vanmi kalah longto bokting hoitoah angzoh. Anih loa cakraa kanoe parai ka tawnkung vanmi khaeah lok katuen paraiah, “Na cakraa to patoh aloa longnui misur dum ih misur thaihnawk to aat ah, kawmawtiah misur thaih loa a hminh boah,” tiah a hangh.

¹⁹ Topongah vanmi loa angmah ih cakraa to longnui ah vikvuek moa misur kung ih misur thaihnawk to a aah, moa Sithaw palungphuihaih ih misur pasawhhaih tangqom thungah to a pakhrak.

²⁰ Misur thaih loa vangpui laep misur pasawhhaih tangqom thungah pasawh o moa athii to a longh; ato athii loa meng cumvaihnet khoekto a longh moa pe panga roekrak to a thuk.