Kolosa 3 - Asang Khongso New Testament

¹ Nangcae loa Khrih hoiah angthawksak boah pongah Sithaw ih bantang bang Khrih anghnuthaih van prae ih hmuenh pongah nangcae ih palungthin to suem oah.

² Hi longnui hmuennawk pongah palungthin to paeh aiah vannui bangih hmuennawk pongah palungthin to suem oah.

³ Kawmawtiah nangcae loa na duek o boah moa nangcae hinghaih ih loa Khrih hoiah nawnto Sithaw khaeah hawk ah oh boah.

⁴ Nangcae hinghaih ih tangtang loa Khrih ni, angmah to angzoh na-ah nangcae doeh anih hoiah nawnto amtueng ueloa angmah ih lensawkhaih to na bo o toeng tih.

Hinghaih Kangquem hoi Kangtha

⁵ Topongah nangcae thungih tok ka sah long takngan koehhaih ih: nongpui nongpa zaehaih ih, khet kamcuk aiah hinghaih, takngan huedoenghaih, kahoih ai sak koehhaih hoi kaoe kaloe koehhaih ih hae na paduek o han oh (Kaoe kaloe koehhaih hae kraangthoi bokhaih tawk maeto ni).

⁶ Tobatih hmuennawk sak o pongah Sithaw palungphuihaih ih to a lok tahngai ai kaminawk nuiah pha tih.

⁷ Zanghnii ah loa nangcae doeh tobatih takngan koehhaih ih mah ang uk o na-ah loa takngan koehhaih ih batiah toengah to na hingh o.

⁸ To-e vaihi loa hibatih palungphuihaih ih, palung amthuenghaih ih, uthaih ih palungthin to na vah o king hanah oh. Mi hnaphnaehaih ih lok doehsoe, loksae ka thoengkai ai doehsoe, pakhaa thung hoitoah na tacawtsak han om ai.

⁹ Longto hoi longto angling o hmah, kawmawtiah nangcae loa kami kangquem tuinuenh to nang khring o boah moa,

¹⁰ kami kangtha tuinuenh to nanghlong o boah. Ato kami kangtha loa ka sahkung Sithaw mah angmah ih tungkraang batiah kangtha ah a sak toemoe. Totiah a sakhaih ih loa angmah to kacung ah panoeksak hanah ni.

¹¹ Totiah oh pongah, Gentel kami hoi Judah kami doehsoe, tangzat hin ka aat hoi ka aat ai doehsoe, kami kamthu, kami kasaeng kaprang, misong hoi kaloih kami doehsoe, pazit pakrawnhaih ih tidoeh om ai boah; Khrih hae tiboih boih ah oh moa tiboih boih thungah a oh.

¹² Nangcae loa Sithaw ih kami ah na oh o; anih mah nangcae to palung moa angmah han-iah ang qoih o. Topongah mi palungnathaih, tahmenhaih, mi hlimah angdokhaih, tuinom hoihhaih hoi palungsawkhaih ih to kahni batiah ang khuk oah.

¹³ Longto hoi longto nuiah palung angaihhaih ai ih hoi laisaephaih ih na tawnh oh na-ah palungsawkhaih hoiah pauep oloa zae tahmen oah. Angraeng mah nangcae to zaehaih tahmen batih toengah nangcae doeh longto hoi longto zaehaih tahmen o toeng ah.

¹⁴ Hi hmuennawk boih nuiah amlunghaih to thap o thuih ah, amlunghaih loa cungriboih to maeto ah kacung ta-ah tacukung ni.

¹⁵ Khrih mah paek ih monghaih loa lok na takroek o nakruek ah lam patuekkung ah a oh; kawmawtiah hi monghaih hae na hnuk o hanah Sithaw mah takbum maeto ah oh hanah ang kawk o boah. Topongah anghoe kawnhaih hoiah om oah.

¹⁶ Khrih ih tamthang lok kacung to nangcae ih palungthin thungah om na soe. Longto hoi longto ciinghaih boiboih hoiah patuk oloa thuitaek oah. Sam laa, pakoeh bokhaih laa hoi laa kacai to sah oah; palungthin thungah anghoe kawnhaih laa hoiah Sithaw to pakoeh oah.

¹⁷ Khrih ranghoiah aicae Ampa Sithaw khaeah kawn lok thuih batiah cungriboih na sah moa na thuih o na-ah Angraeng Jesuh hmin hoiah sah oah.

Hinghaih Kangtha Thungah Angpaehhaih

¹⁸ Zunawk, na savanawk ih lok to tahngai oah, kawmawtiah Khrihca ah na oh o batiah ato to na sak o hanah oh.

¹⁹ Savanawk, na zunawk to palung o aloa anihcae khaeah lok kaham to patoh o hmah.

²⁰ Nauktanawk, Khrihca ah na oh o pongah namno nampa ih lok to tahngai o toemoe ah, kawmawtiah ato loa Sithaw palung kanghoesakkung ah oh.

²¹ Ampanawk, na canawk to palungphuisak o hmah, palungboeng o moeng tih.

²² Misongnawk, tiboih pongah nangcae ka tawnkungnawk ih lok to tahngai pae oah; anihcae ih palung kahoih to hak hanah koeh pongah angmahcae mikhnuk ah khueh lok ka tahngai na aiah, Angraeng to na khangza o pongah palungthin tang hoiah a lok to tahngai pae oah.

²³ Kawbatih hmuen doeh na sak o kruekah kami hanih na aiah Angraeng hanih ka sah batih toengah palungthin boiboih hoiah sah oah.

²⁴ Angraeng mah angmah ih kaminawk hanah a suek pae ih kawnvang na paek o tih tito pahnet o hmah. Kawmawtiah Khrih loa na toksak pae o ih Angraeng tangtang ni.

²⁵ Zaehaih hmuen ka sah kami loa zaehaih hmuen a sak o ih atho to hak tih, kawmawtiah Sithaw loa mi boih to kangvan rip ah lokcaek tih.