Johan 7 - Asang Khongso New TestamentJesuh hoi Amnauknawk 1 Ahi pacoengah Jesuh loa Galili prae thungah angvin ah caeh amkaeh; Judea prae thungah to loa caeh amkaeh han koeh ai, kawmawtiah Judea prae thungih Judah kami akaatawn kungnawk mah anih to hum han a thuih o pongtoah ni. 2 Judah kaminawk ih Samdai im Poi loa a hnaih boah moa, 3 topongah amnauknawk mah Jesuh to, “Na sak ih hmuennawk hae nang ih hnukbangnawk mah a hnuk o toengh hanah ahi hmuenh hoitoah tacawt loa Judea prae ah to caeh ah. 4 Ami doeh hmin amthang han ka koeh nahaeloa a sak ih hmuen to hawk thaih mak ai. Nang loa hi hmuennawk hae na sak pongtoah nang ih kawng to longprae bum boih mah panoek na soe!” a naa o. 5 (Angmah ih amnauknawk mah doeh Jesuh to taang o ai). 6 Jesuh mah anihcae khaeah, “Kai hanah atue pha ai vop. Nangcae han loa kawtih tue doeh atue kahoih ah a oh. 7 Long mah nangcae to na hnumaa ai, to-e kai loa ang hnukmaa; kawmawtiah a hinghaih tuinuenh kahoih ainawk to ka phroe pae pongah ni. 8 Nangcae loa poi kungah to na caeh o. Kai han loa atue mah pha ai vop pongtoah ka caeh mak ai,” tiah a naa. 9 Totiah a thuih moa Galili ah to a oh. Samdai Im Poi Ah Jesuh A Caeh 10 Amnauknawk to poi kungah a caeh o pacoengah Jesuh doeh a caeh toeng; to-e kamtueng cawnlawn ah caeh ai moa tamqu bangah a caeh duem. 11 Judah kami akaatawn kungnawk mah anih to poi kungah pakrong o moa, “Naamaw a oh?” tiah a duengh o. 12 Mipuinawk thungah anih kawng to mimah thaih aiah aram o duem moa thoemto mah, “Kami kahoih ni,” a ti o. Mi kalahnawk mah, “Na ai ni, mipui to a zaehoih pazae!” a ti o. 13 To-e kamtueng ah thui o vam ai, kawmawtiah Judah kami akaatawn kungnawk to a zit o. 14 Ato poi to atue umli roekrak aboeng na-ah Jesuh loa Tempal ah to a caeh moa patukhaih to amtong. 15 Judah kami akaatawn kungnawk loa a dawnrai o phi moa, “Hi kami hae tidoeh amtukhaih ih tawn vaih ai tomah, kawbangmaw hi zetto a panoek thaih vai?” tiah a ti o. 16 Jesuh mah, “Ka patuk ih hae kaimah patukhaih ih na ai ni, to-e matoehkung Sithaw khae hoitoah kangzo ni. 17 Ami doeh Sithaw koehhaih ih sak hanah ka koeh loa ka patuk ih hae Sithaw khae hoitoah kangzo maw, tiaibaloa kaimah ih akaatawnhhaih hoiah maw ka thuih, tito panoek tih. 18 Angmah ih akaatawnhhaih hoiah ka thui kami loa angmah hanah lensawkhaih ka pakrong ni. To-e angmah patoehkung hanah lensawkhaih ka pakrong kami loa oeptaang kaom kami ni, angmah thungah pazaehaih tidoeh om ai. 19 Mosi mah Tawklok to ang paek o na ai maw? To-e mita mah doeh Tawklok to pazui o ai. Tipongmaw kai hum han nang patoem o?” a naa. 20 Mipui mah, “Nang thungah taqawk to a oh! Nang to mimah maw hum han ang patoem?” tiah a naa o. 21 Jesuh mah, “Dawnraihaih hmuen maeto ka sak moa na dawnrai o boih. 22 Mosi mah nangcae caa nongpanawk to tangzat hin aah hanah lok a paek, (ahi tangzat hin aahhaih patongkung loa Mosi na ai ni, nangmahcae saezanawk ni); moa topongah nangcae caanawk to Sabbath ni ah tangzat hin to na aah pae o. 23 Mosi ih Tawklok phraek han aiah Sabbath ni ah caanawk to tangzat hin na aahsak o nahaeloa tipongkhoe maw kaimah Sabbath ni ah kami longto ka hoihsak pongah ka nuiah palung na phuii o? 24 Tasabang khethaih hoiah lokcaekhaih ih to toengh o laih, loktang to khethaih hoitoah lokcaek oah,” tiah a naa. Anih Hae Messiah Maw? 25 Jerusalem vang kami thoemto mah, “Judah kami akaatawn kungnawk mah hum han patoem o ih kami loa anih hae na ai maw? 26 Khen o e! Mipui hma-ah kamtueng ah lok a thuih moa tidoeh thuih o ai. Hi kami hae Messiah ni tiah anihcae mah panoek o tangtang thaih tih maw? 27 To-e Messiah angzoh na-ah loa naabanghoiah maw angzoh tito mimah doeh panoek mak ai. Hi kami loa naabanghoiah maw angzoh tito aicae boih mah panoek o king bae?” tiah a thuih o. 28 Jesuh mah Tempal ah patuk na-ah khoeh puiah hoiah, “Kai hae na panoek o tangtang maw? Naabanghoiah maw kangzoh tihae na panoek o tangtang maw? Kaimah ih akaatawnhhaih hoiah kangzo ai. To-e matoehkung loa loktang tang ni. Nangcae mah anih to na panoek o ai. 29 Kai loa anih to ka panoek, kawmawtiah kai loa anih khae hoitoah kangzoh moa anih mah kai hae ang patoeh,” tiah a naa. 30 Tona-ah anih to naeh hanah patoem o, to-e mimah doeh naeh tangtang ai; kawmawtiah anih ih atue to pha ai vop. 31 To-e mipui thungih kami paroeai mah anih to a taang o moa, “Messiah angzoh na-ah loa hi kami mah a sak ih ponghdoeh dawnraihaih ka pop kue ah ka sah han vai?” tiah a thuih o. Jesuh Naeh Hanah Patoeh O 32 Jesuh kawng to mipui mah tamqu lamah aram o ih to Farasinawk mah a thaih o, topongah anihcae hoi qaihma kacoetanawk mah anih to naeh hanah tempal congkung palik thoemto to patoeh o. 33 Jesuh mah, “Nangcae khaeah nawnetta thung ni ka oh moa topacoeng loa matoehkung khaeah ka caeh ving han. 34 Nangcae mah kai hae na pakrong o tih, to-e na hnuh o mak ai, kawmawtiah ka ohhaih hanih ahmuenh ah to na caeh o thaih mak ai,” tiah a naa. 35 Judah kami akaatawn kungnawk loa angmahcae salak thungah, “Aicae mah hnuk o han aiah naamaw caeh han a thuih toeng? Aicae caeng kaminawk ohhaih Grik vangpui maemaeto ah caeh moa Grik kaminawk to patuk han a thuih maw vai? 36 ‘Na pakrong o tih e na hnuh o mak ai. Ka ohhaih hanih ahmuenh aloa na caeh o thaih mak ai,’ tiah a tito a thuihkoehhaih ih loa timaw vai?” tiah a ti o. Hinghaih Paekkung Tuiva 37 Poi ni hnukkhuem koek hoi lokpui koek ih ani ah Jesuh loa angdoet moa khoeh puiah hoiah, “Ami doeh tui kanghae loa kai khaeah angzo na soeloa nae na soe. 38 Cabu Kacai mah, ‘Ami doeh kai ka taang loa palung thung hoitoah hinghaih tui to puek tih,’ tiah a tih batiah om tih,” tiah a thuih. 39 Hitiah Jesuh mah a thuih ih loa Pakhra kawng to ni, angmah ka taang kaminawk boih loa ato Pakhra to hak o tih. Ato tue nathuemah loa Pakhra to paek ah om ai vop, kawmawtiah Jesuh to lensawkhaih toah angthawksak let ah om ai vop. Mipui Salak Thungah Ampraekhaih 40 Totiah a thuih ih to mipui thungih kami thoemto mah a thaih o na-ah, “Hi kami hae tahma tangtang ni,” tiah a ti o. 41 Kalah thoemto mah, “Anih loa Messiah ni,” a ti o. To-e thoemto mah, “Messiah loa Galili bang hoitoah angzoh han om ai. 42 Cabu Kacai mah, ‘Messiah loa Sangpahrang David ih cadii ah om ueloa David ohhaih Bethlehem vang ah za tih,’ a tih to loa,” tiah a ti o. 43 Tona-ah Jesuh pongah mipui thungah ampraekhaih hlaek ih a oh. 44 Thoemto mah anih to naeh hanah a koeh o, to-e mimah doeh naeh tangtang ai. Akaatawn kungnawk Taanghaih Ai Ih 45 Tempal congkung risanawk amlaem o na-ah qaihma kacoetanawk hoi Farasinawk mah, “Tipongmaw anih to nangzoh o haih ai?” tiah a duengh o. 46 Congkung risanawk mah, “Mimah doeh ahi kami batiah lok apae vaih ai,” tiah a pathim o. 47 Farasinawk mah, “Nangcae doeh amthusak o boah tani? 48 Judah akaatawn kungnawk thungih longto, tiaibaloa Farasinawk thungih longto ta anih ka taang to na panoek ih a oh maw? 49 Ahi mipui loa Mosi ih Tawklok to panoek o ai, topongah anihcae loa Sithaw ih tangoenghaih thungah a oh o,” tiah a naa o. 50 Toah ka om Farasinawk thungih longto, Jesuh ka hnuh vaih boah, Nikodemu naa pae o ih to a oh toengh. Anih mah kalahnawk khaeah to, 51 “Aicae ih Tawklok batiah loa ami doeh angmah ih loklaang to thaih ai nahlan hoi a sak ih to hnuh ai nahlan aloa zaenet thaih mak ai,” tiah a naa. 52 Tona-ah anihcae mah, “Nang doeh Galili kami toeng maw? Cabu Kacai to kroek e Galili hoitoah tahma tacawt vaih ai tito na hnuh tih,” tiah a naa o. 53 [Topacoengah anihcae boih loa angmahcae ih im ah to a caeh o king]. |
Asang Khongso New Testament in Eastern Khumi © Bible Society of Myanmar, 2023.
Bible Society of Myanmar