Johan 2 - Asang Khongso New Testament

Kana Vang Ih Zupaluen Poi

¹ Ni hnetto pacoengah Galili prae Kana vang ah zupaluen poi to a oh. Jesuh ih amno to doeh toah to a oh moa,

² Jesuh hoi a hnukbangnawk doeh zupaluen poi ah to pacae o toeng.

³ Misurtui to aboeng ving na-ah amno mah Jesuh khaeah, “Misurtui tawn o ai boah,” tiah a thuih pae.

⁴ Jesuh mah, “No, timaw ka sak han tito nang thuih han om ai, ka tue na pha ai vop,” tiah a naa.

⁵ Jesuh amno mah tamtoehnawk khaeah, “kawbatih doeh a thuih ih boih to sah oah,” tiah a naa.

⁶ Judah kaminawk mah thoengcaihaih kawng tawkcah to tawnh o moa ato hanah maroi tarukto pahnut o. Maroi maeto thungah galan pumto hoi quithumto salak aacaeh.

⁷ Jesuh mah tamtoehnawk khaeah, “Hi maroinawk hae tui ka koiah lawn oah,” tiah a naa. Ka proem zawt zawt khoekto tui to a lawn o moa,

⁸ anihcae khaeah, “Maroi thungih tui to buek o thoemh aloa poi ukkung khaeah paek oah,” tiah a naa. Tui to a paek pae o moa,

⁹ ato tui to loa misurtui ah coengh moa a pataeng. Anih loa hi misurtui loa nahoiah maw angzoh tito panoek ai; (Tui ka buek tamtoehnawk mah doeh panoek o ai); topongah zulakung to a kawk moa,

¹⁰ anih khaeah, “Mi boih mah misurtui asing to angvinnawk a tuih o hmaloe moa ka boep ah a naek o pacoengah misurtui tangduk to a tuih. To-e nang loa misurtui asing to vaihi khoekto na ken vop,” tiah a naa.

¹¹ Jesuh mah hi dawnraihaih hmuen hmaloe koek hae Galili prae Kana vang ah a sak; toah a lensawkhaih to amtuengsak moa a hnukbangnawk mah a taang o.

¹² Ato pacoengah Jesuh hoi amno, amnauknawk hoi a hnukbangnawk loa Kapernaum vang ah a caeh o moa toah to ani zetta a oh o.

Tempal Ah Jesuh A Caeh

¹³ Takantak Poi tue loa a hnaih tom boah, moa topongah Jesuh loa Jerusalem ah a caeh.

¹⁴ Toah Tempal thungah maitaw, tuu hoi aapahunawk ka zawkung hoi tangka kaphraknawk caboi ah kanghnu to doeh a hnuk.

¹⁵ Topongah khawkqui to bohhaih hanah a zet moa boiinawk boiboih tuu doehsoe, maitaw doehsoe, a zawh o ihnawk to a boh moa Tempal thung hoitoah pathok kingking; tangka taphrak kungnawk ih caboinawk to palaeng pae kingking moa tangka anoinawk to doeh a haeh pae dungdung.

¹⁶ Aapahu ka zawnawk khaeah, “Hi hmuenh hoitoah aapahunawk to caeh o haih king ah! Pa ih im hae hmuenmae zawhhaih ahmuenh ah patoh o hmah!” tiah a naa.

¹⁷ A hnukbangnawk mah, “Aw Sithaw, na im palungnathaih hae palung thungah hmai batiah angqongh,” tiah Cabu Kacai mah thuih ih to a dawn o vawk let.

¹⁸ Judah kami akaatawn kungnawk loa angzoh o bae moa, “Hibatih sak thaihhaih ih akaa na tawnh tito patueng hanah tih dawnraihaih to maw na sak thaih,” tiah a duengh o.

¹⁹ Jesuh mah, “Ahi Tempal hae phrae o king loa ni thumto thungah ka sak let han,” tiah a naa.

²⁰ Anihcae mah, “Ni thumto thungah na sak let thaih han maw? Ahi Tempal sak na-ah hae saning quipalito hoi tarukto akraa,” tiah a naa pae o.

²¹ To-e Jesuh mah thuihkoeh ih Tempal loa angmah ih takbum to ni.

²² Topongah Jesuh duekhaih thung hoitoah angthawklet na-ah a hnukbangnawk mah angmah ih takbum kawng to ni a thuih tito a dawn o let moa Cabu Kacai mah a thuih ih hoi Jesuh mah a thuih ih to a taang o.

Jesuh Mah Mi Palungthin Panoek King

²³ Jesuh loa Takantak Poi thung Jerusalem ah a oh nathuemah dawnraihaih a sak ih to a hnuk o na-ah kami zetpui mah anih to a taang o.

²⁴ To-e Jesuh loa anihcae ih palungthin boih to taang pae ai, kawmawtiah anihcae to kawbatih kami maw tito a panoek king.

²⁵ Kami ih kawng to thuih pae hanah ami doeh aloe ai, kawmawtiah angmah roeroe to mah kami palungthin thungah timaw ka om tito a panoek phaeng.