Johan 14 - Asang Khongso New Testament

Jesuh Pa Khaeah Caehhaih Loklam

¹ Jesuh mah a hnukbangnawk khaeah, “Palung angphosak o hmah loa dawnraisak o hmah. Sithaw taang oloa kai doeh taang oah.

² Pa ih im thungah imlaek zetpui a oh moa nangcae hanih ahmuenh paroep hanah ka caeh han. Totiah om ai nahaeloa kang thui o mak ai.

³ Kai loa ka caeh moa nangcae hanih ahmuenh to ka paroep boih pacoengah kangzoh let moa kaimah khaeah kang lak o han, ka ohhaih nakhaeah nangcae doeh na oh o toengh hanah.

⁴ Ka caehhaih han ahmuenh ka pha loklam to na panoek o,” tiah a naa.

⁵ Thomas mah, “Angraeng, naamaw na caeh han tito ka panoek o ai; topongah toah phakhaih loklam to kawbangmaw ka panoek o thaih han?” tiah a naa.

⁶ Jesuh mah anih khaeah, “Kai loa loklam, loktang hoi hinghaih ni; kai ranghoi tiaialoa ami doeh Pa khaeah pha thaih mak ai,” tiah pathim pae.

⁷ Anihcae khaeah, “Vaihi loa kai hae na panoek o boah, Pa doehsoe na panoek o, vaihi kazit hoiloa anih to na panoek o moa na hnuk o boah,” a naa pae.

⁸ Filip mah anih khaeah, “Angraeng, nam Pa to na patuek ah; ato ni kaicae mah kangtoeng o,” tiah a naa.

⁹ Jesuh mah, “Atue ka sawk parai thungah nangcae boih khaeah ka oh boah; to-e kai hae na panoek o ai, Filip? Ami doeh kai ka hnuh loa Pa to a hnuk boah. Tipongmaw ‘Nam Pa to na patuek ah,’ tiah nang naa.

¹⁰ Filip, kaimah hae Pa thungah ka oh moa Pa doeh kai thungah a oh, tihae na taang ai maw? Jesuh mah a hnukbangnawk khaeah, ‘Nangcae khaeah kang thuih ih lok hae kaimah palung thung hoi-ih ka tacawt na ai ni. Kai thungih ka om Pa angmah ih toksakhaih ih ni,’ tiah a naa.

¹¹ Kai loa Pa thungah ka oh moa Pa doeh kai thungah a oh, tiah ka thuih ih hae na taang ah. Toti ai nahaeloa ka sak ih hmuennawk pong taloe loa taang oah.

¹² Loktang kang thuih o: Kai ka taang kaminawk loa ka sak ih to sah o tih; ahlong, hmuen kalen kue mataeng doeh sah o tih, kawmawtiah kai loa Pa khaeah ka caeh han pongah ni.

¹³ Kawbatih doeh ka hmin hoiah na hnik o ih boih to kang sak pae o han, tona-ah ni loa Pa lensawkhaih to Capa ranghoiah amtueng thaih tih.

¹⁴ Ka hmin hoiah kai khaeah na hnik o ih boiboih to kang sak pae o han,” tiah a thuih.

Cai Pakhra Ih Lok Amaihhaih

¹⁵ Jesuh mah, “Kai na palung o nahaeloa ka lokpaek ihnawk hae na pazui o tih.

¹⁶ Pa khaeah ka hnik moa anih mah bomkung kalah to na paek o ueloa nangcae khaeah dungzan ah om tih.

¹⁷ Anih loa Sithaw kawng loktang to taphongkung Pakhra ni. Long mah anih to hnuh thaih ai moa panoek thaih ai pongah talawk thaih ai. To-e nangcae loa anih to na panoek o, kawmawtiah anih loa nangcae khaeah oh poe moa nangcae thungah a oh.

¹⁸ “Ka caeh na-ah nangmahcae khueh ah kang caeh o tak sut mak ai; nangcae khaeah kangzoh let han.

¹⁹ Nawnetta thung loa long mah kai hae na hnuh mak ai boah, to-e nangcae mah kai hae na hnuh o tih; kawmawtiah kai hae ka hingh pongah nangcae doeh na hing o toeng tih.

²⁰ Ato ni to a phak na-ah kai hae Pa thungah ka oh tihoi kai hae nangcae thungah ka oh batih toengah nangcae doeh kai thungah na oh o tito panoek o tih.

²¹ “Kai ih lokpaek ka tapom moa ka pazui loa kai ka palung kaminawk ni. Kai ka palung kaminawk loa Pa mah doeh palung toeng tih; kaimah doeh ka palung moa anihcae khaeah kamtueng han,” tiah a naa.

²² Judas Iskariot na ai Judas mah, “Angraeng, kaicae khaeah namtueng moa long khaeah namtueng han ai hae kawbangmaw om tih?” tiah a duengh.

²³ Jesuh mah, “Ami doeh kai ka palung loa ka patuk ih hae pazui tih. Pa mah anih to palung ueloa Pa hoi kaimah to kangzoh hoi moa anih khaeah ka oh hoi han.

²⁴ Ami doeh kai ka palung ai loa ka patukhaih ih doeh pazui ai. Ka patukhaih na thaih o ih hae kaimah ih lok tacawt na ai ni, to-e patoeh takung Pa khae hoitoah kangzo ni.

²⁵ “Nangcae khaeah ka oh nathuemah hi lok hae kang thuih o boah.

²⁶ Ka hmin hoiah Pa mah patoeh hanih bomkung Cai Pakhra mah cungriboih to patuk ueloa ka thuih kok ih boih to doeh panoeksak let tih.

²⁷ “Nangcae khaeah monghaih kang caehtak o; Kaimah ih monghaih to ni kang paek o. Long mah paek ih batiah kang paek ai. Palung mawn o hmah loa palungboeng o hmah; zi doeh zi o hmah.

²⁸ ‘Kai ka caeh han, to-e kangzoh let han,’ tiah kang thuih ih to na thaih o. Kai nang palung o tangtang nahaeloa Pa khaeah ka caeh han hae palung nanghoe o tih; kawmawtiah anih loa kai ponghdoeh a lenh.

²⁹ Ato hmuen to ang phak tangtang na-ah na taang o thaih hanah ang phak ai nahlanah vaihi kang thuih o hmaloe boah.

³⁰ Nangcae khaeah ka sawk ah lok kang thui thaih mak ai boah, kawmawtiah hi long ukkung hae angzoh li boah. Kai nuiah hmuensak thaihaih tidoeh tawn ai,

³¹ to-e kaimah Pa hae ka palung tito long mah panoek han oh; totih pongah ni loa Pa mah lok ang paek ih batih toengah cungriboih to ka sak. “Angzo oah, hi hmuenh hoitoah caeh o si,” tiah a naa.