Johan 11 - Asang Khongso New Testament

Lazaruh Duekhaih

¹ Bethani vang ah kaom ahmin Lazaruh naa pae ih kami longto to ngan a nat. Bethani loa Meri hoi amza Marta ohhaih ih vang ni.

² (Ahi Meri hae Angraeng ih khok ah hmuihoihtui ka bawh moa angmah ih sam hoiah ka hukung to ni; ngan kana Lazaruh ih anih ih thangqoi ni).

³ A tanu hnit mah Jesuh khaeah, “Angraeng, na palung ih nampui loa ngan a nat,” tiah lok a pat pae hoi.

⁴ Ato lok to Jesuh mah a thaih na-ah, “Hi nathaih aboenghaih ih hae Lazaruh duekhaih hanih na ai ni; hitiah ka om hae Sithaw lensawkhaih amtuengsak hanah om ueloa ahi ranghoiah Sithaw Capa mah lensawkhaih to hnuh tih,” tiah a naa.

⁵ Jesuh loa Marta hoi amnauk hoi Lazaruh to palung phi.

⁶ To-e Lazaruh to ngan a nat tiah tamthang to a thaih na-ah a ohhaih ih khaeah to ni hnetto a oh rae vop.

⁷ Topacoengah a hnukbangnawk khaeah, “Judea prae ah caeh o let si,” tiah a naa.

⁸ Hnukbangnawk mah, “Patukkung, zanghnii thuem ta-ah to ih kaom kaminawk mah nang to hlung hoiah vah mat han koeh o; vaihi na caeh let han nangcaeng bae maw?” tiah a naa pae o.

⁹ Jesuh mah, “Nito na-ah nitue hlaihnetto a oh na ai maw? Topongah ami doeh athun ka aang ah ka caeh loa amthaek ai, kawmawtiah hi long aanghaih to a hnuk o.

¹⁰ To-e aqum thungah caeh o nahaeloa amthaek o tih, kawmawtiah aanghaih to tawn o ai,” tiah a naa.

¹¹ Ahi hae Jesuh mah a thuih boih pacoengah, “Aicae ampui Lazaruh loa a iih boah, to-e ka caeh moa ka pathawk han,” tiah a naa.

¹² Hnukbangnawk mah, “Angraeng, iip nahaeloa ngantui let tih,” tiah pathim pae o.

¹³ Jesuh mah thuihkoehhaih ih loa Lazaruh duek boah tihaih ih to ni, to-e anihcae mah loa ka iip romram a thuihkoehhaih ih mue tiah a dawn o.

¹⁴ Topongah Jesuh mah anihcae khaeah kacai ta-ah, “Lazaruh loa duek boah;

¹⁵ To-e nangcae hanah na taang o thaih hanah anih khaeah ka om ai hae kanghoe parai. Anih khaeah to caeh o si,” tiah a naa.

¹⁶ Thomas (Caphae naa pae ih kami) mah hnukbang ampuinawk khaeah, “Patukkung hoiah duek nawn hanah caeh o boih si,” tiah a naa.

Jesuh Angthawklethaih hoi Hinghaih

¹⁷ Jesuh a phak na-ah Lazaruh up o haih ih hae ni palito a oh boah tito a panoek.

¹⁸ Bethani loa Jerusalem hoitoah meng hnetto pha ai kue moa,

¹⁹ A thangqoi mah duek tak ih Marta hoi Meri hnit to anghnut o haih hanah Judah kami paroeai angzoh o.

²⁰ Jesuh kangzo to Marta mah a thaih na-ah dawt hanah a caeh, to-e Meri loa im ah a oh.

²¹ Marta mah Jesuh khaeah, “Angraeng, hiah na oh nahaeloa ka thangqoi duek han na ai tomah!

²² To-e vaihi mataeng Sithaw khaeah kawbatih doeh na hnik ih boih to na paek tih tiah ka panoek,” tiah a naa.

²³ Jesuh mah Marta khaeah, “Na thangqoi loa angthawklet tih,” tiah a thuih pae.

²⁴ Marta mah, “Hnukkhuem ni aloa angthawklet tih, tih to ka panoek,” tiah a pathim pae.

²⁵ Jesuh mah Marta khaeah, “Kai loa angthawklethaih hoi hinghaih ni. Kai ka taang kaminawk boih loa dueh o langla cadoeh hing o tih;

²⁶ kai thungah ka hing moa kai ka taang kaminawk boiboih loa natuek doeh dueh o mak ai. Ahi hae na taang maw?” tiah a naa.

²⁷ Marta mah, “Ka taang, Angraeng! Nang loa longprae ah kangzo han Sithaw Capa Messiah ni tito ka taang,” tiah a pathim.

Jesuh A Qah

²⁸ Marta mah hi lok hae a thuih pacoengah amlaem moa amnauk Meri to tamqu lamah a kawk duem. “Patukkung hiah a oh moa nang to angduengh o,” tiah a thuih pae.

²⁹ Ato lok to Meri mah a thaih na-ah angthawk moa anih to dawt hanah karang ah a caeh.

³⁰ (Jesuh loa vang thungah na pha ai vop, Marta mah a dawthaih ih khaeah to a oh vop).

³¹ Meri to pahloep hanah im ah kanghnu haih kaminawk mah anih to angthawk moa karang ah ka tacawt to a hnuk o na-ah a hnukah patom o. Taprong ah qah hanah a caeh kalang mue tiah a dawn o.

³² Meri loa Jesuh ohhaih ih khaeah a phak moa anih to a hnuk hoiloa a khokkung ah tabok moa, “Angraeng, hiah na oh nahaeloa ka thangqoi a duek han ai tomah!” tiah a naa.

³³ Jesuh mah Meri hoi angmah kanghnu haih kaminawk hoi ka qah to a hnuk na-ah palung a qoe pae moa palunghoih ai.

³⁴ “Naamaw na phum o?” tiah a duengh. Anihcae mah, “Angraeng, angzo loa khen ah,” tiah a naa pae o.

³⁵ Jesuh loa a qah.

³⁶ Toah kaom kaminawk mah, “Lazaruh palung phi hae loa!” a ti o.

³⁷ To-e thoemto mah, “Mikmaeng kami doeh mikhnukhaih ka paek hae na ai maw? Lazaruh hae dueh aiah sah thaih ai maw?” tiah a ti o.

Lazaruh A Hinghsak Let

³⁸ Jesuh loa vaito ahaam ui bae moa taprong ah to a caeh. Ato taprong loa hlungkhaw ah oh pongah akhaw to hlungtampae hoiah khah o.

³⁹ Jesuh mah, “Hlungtampae to takhoe oah,” tiah lok a paek. Kadueh ih tanu Marta mah, “Angraeng, hmui phi tih boah, aphumhaih ih hae ni palito a oh boah!” tiah a naa.

⁴⁰ Jesuh mah anih khaeah, “Na taang nahaeloa Sithaw lensawkhaih to na hnuh tih tiah kang thuih na ai maw?” tiah a naa.

⁴¹ Tona-ah hlungtampae to takhoe o. Jesuh loa a doeng tahang moa, “Pa, ka lokthuih ih hae na tahngaih pongah kawn parai.

⁴² Ka lok hae nang thaih pae toemoe tito ka panoek, to-e ahi ka thuihhaih ih hae hiah kaom kaminawk hanih ni, anihcae mah kai hae nangmah patoeh ih ni tih to a taang o hanah ni,” a naa pae

⁴³ Ahi lok a thuih boih pacoengah khoeh puiah hoiah, “Lazaruh, tacawt ah!” tiah a kawk.

⁴⁴ Anih loa a ban hoi a khok to qokkhuk kahni zaeng ih hoi mikhmai zaeng ih kahni hoiah to tacawt. Jesuh mah anihcae khaeh, “Khramh pae o, caeh na soe,” tiah a naa.

Jesuh Hum Hanah Angcaenghaih

⁴⁵ Meri to anghnuthaih hanah kangzo kami ka pop mah Jesuh mah a sak ih to a hnuk o moa anih to a taang o.

⁴⁶ To-e anihcae thungih thoemto loa Farasi kaminawk khaeah amlaem o moa Jesuh mah hmuen a sak ih to a thuih pae o.

⁴⁷ Topongah Farasinawk hoi qaihma kacoetanawk to lokcaek kungnawk kawngsi hoiah angqum o moa, “Kawbangmaw sak o han? Hi kami mah a sak ih dawnraihaih hmuen boiboih hae khen oah!

⁴⁸ Hibatiah a caehsak o poe nahaeloa mi boih mah anih to taang o tih, moa Rom akaatawn kungnawk to angzo o ueloa aicae ih Tempal hoi aicae caeng kami hae na phrae o king tih,” tiah a thuih o.

⁴⁹ Anihcae thungih longto, ahmin Kaiafas naa pae o ih, ato saning ah Qaihma Kalen ka tok mah, “Namthu o bae hae!

⁵⁰ Caeng bum boih anghmat angtaa pongah loa kami zetpui zuengah kami longto dueksak hae a hoih kue tih to na panoek o ai maw?” tiah a naa.

⁵¹ Tangtang ah ti nahaeloa, hitiah a thuih ih hae angmah ih palung thung hoi-ih ka tacawt to a thuih ih na ai ni; ato saning loa Qaihma Kalen ah oh pongah Judah kaminawk zuengah Jesuh to dueh tih, tiah tahma batiah a thuih coek ih ni.

⁵² A duekhaih han loa anihcae han khueh na ai moa Sithaw kami kanghaeh dungnawk boih to bum maeto ah tacu hanah doeh ni.

⁵³ To ni nahoiah loa Judah kami akaatawn kungnawk loa Jesuh to hum hanah patoem o.

⁵⁴ Topongah Jesuh loa Judah prae ah kamtueng lawngah kholong caeh ai boah, ato hmuenh hoitoah tacawt moa praetanghaeng ka hnai ah ka om Efraim naa pae o ih vang ah to a caeh moa toah to hnukbangnawk hoiah a oh o.

⁵⁵ Takantak Poi tue a hnaih boah moa kami paroeai mah poi oh ai nahlanah bokhaih bang thoengcaihaih sak hanah vangca bang hoitoah Jerusalem ah to a caeh o.

⁵⁶ Anihcae mah Jesuh to pakrong o moa Jerusalem Tempal thungah acu o na-ah anihcae mah longto hoi longto, “Kawbangmaw na dawn? Poi kungah hae angzo tangtang tih maw?” tiah angduengh o.

⁵⁷ Qaihma kacoetanawk hoi Farasinawk mah, “Ami doeh Jesuh ohhaih panoek nahaeloa anih to ka naeh o thaih hanah na thaihsak o han,” tiah lok to a paek.