Hebrai 13 - Asang Khongso New Testament

Sithaw Palung Anghoesakhaih

¹ Khrihca naukamzanawk batiah longto hoi longto amlung o poe ah.

² Nangmahcae im ah angvin to toemsak oloa khetzawn han pahnet o hmah. Totiah ka sah kami thoemto loa panoek aiah angmahcae im ah vanmi to a toemhsak o toemtoem.

³ Thongim thungah kang-ung kaminawk to pahnet o hmah, anihcae hoiah nawnto angung batiah dawn oloa pahnet o hmah. Patang ka khang kaminawk to pahnet o hmah, nangcae doeh anihcae hoiah patang khang batiah dawn oloa pahnet o hmah.

⁴ Apumhaih loa mi boih mah khangza han oh moa zuva loa longto hoi longto oepom ah oh han oh. Nongpui hoi nongpa zaehaih ka sah kaminawk hoi pazang sak zaehaih ka sah kaminawk loa Sithaw mah taracaek tih.

⁵ Tangka hae koeh o hmoek hmah, na tawnh o ih hoiah palungkiisak oah. Kawmawtiah Sithaw mah, “Kaimah natuek doeh kang caeh o tak mak ai ueloa kang pahnet o sut mak ai,” tiah a thuih.

⁶ Topongah misa kahoih ah om o siloa, “Angraeng loa na bomkung ni, ka zi mak ai. Mimah kai hae kawbangmaw na sah o thaih tih?” tiah thui o sih.

⁷ Nangcae khaeah Sithaw lok ka thuikung nangcae pahoikung hmaloenawk to pahnet o hmah. Kawbangmaw a hingh o moa a duek o tito dawn oloa anihcae ih taanghaih to aku la oah.

⁸ Jesuh Khrih loa zangduem, vaihni hoi dungzan khoekto angmah toengroeng ah oh.

⁹ Patukhaih ih congca kalah kalah mah nangcae to loklam kahmaan khae hoitoah kalah bangah angkhraengsak o hmah. Athungbang ih palungthin tharahhaih hae caknaek kawng tawkcah pazuihaih ranghoiah na aiah Sithaw tahmenhaih khae hoi-ih hak hae hoih; tobatih tawk ka pazui kaminawk loa ato tawknawk mah abom o mak ai.

¹⁰ Judah kaminawk bokhaih ih ahmuenh thungah tok kasah qaihmanawk mah aicae bokting nui ih angbawnhaih sak ih moi kawbatih doeh caa o thaih ih om ai.

¹¹ Judah kami Qaihma Kalen mah boii ih athii to a sinh moa zae angbawnhaih sak hanah Ahmuenh Kacai Koek thungah akun haih toemtoem; to-e boii ih takbum to loa iihhaih hmuenh tasabang ah hmai hoiah a qoeng o.

¹² Hitiah oh pongah Jesuh doehsoe angmah ih athii hoiah mipui ih zaehaih thoengcaisak hanah vangpui laepbang ah to duek.

¹³ Topongah anih khaeah iihhaih hmuenh laepbang ah caeh o siloa azathaih to phaw o haih bom si.

¹⁴ Kawmawtiah hi long ah vangpui kangcak to om ai; kangzo hankoi vangpui to aicae mah zing o.

¹⁵ Topongah Jesuh ranghoiah aicae ih angbawnhaih batiah Sithaw to pakoeh o toemoe si; totiah pakoehhaih loa pahnii pakhaa hoiah angbawnhaih sak iah oh moa Jesuh loa Angraeng ni tiah taphonghaih ih ni.

¹⁶ Hmuen kahoih sak hoi longto hoi longto angbom anghlom hae pahnet o hmah, kawmawtiah hinawk hae Sithaw palung kanghoesak angbawnhaih ih ni.

¹⁷ Nangcae pahoikungnawk ih lok to tahngai pae oloa anihcae ih lokpaek batih toengah pazui oah. A toksakhaih ihnawk boih to Sithaw hma-ah a thuih o king let han pongah anghak aiah nangcae ih hinghaih to a khet a zawn o. Anihcae ih lok to tahngai o nahaeloa angmahcae ih tok to anghoehaih hoiah sah o tih; totih ai nahaeloa palungsethaih hoiah tok o ueloa ato loa nangcae hanah avanghaih ih tidoeh om mak ai.

¹⁸ Kaicae hanah khophoeh pae o toemoe ah. Kasae kahoih panoekhaih kacai to tawnh o tihae ka panoek o, kawmawtiah kaicae loa kamsoem hmuen to sak toemoe hanah ka koeh o pongah ni.

¹⁹ Sithaw mah kai hae nangcae khaeah ang patoeh let palang hanah kana dakah kho nang phoeh pae oah tiah kang pacae o.

Aboeng Khophoehhaih

²⁰ Sithaw mah aicae Angraeng Jesuh to duekhaih thung hoitoah angthawksak let boah; angbawnhaih han a hinghaih a paek ranghoiah dungzan paipi to a caksak pongah Jesuh loa Tuu Congkung Kalen ah a oh.

²¹ A koehhaih ih to sak hanah nangcae angtoeng ih hmuen kahoih boiboih hoiah Sithaw mah na paek o na soe. Khrih loa dungtasawk hoi dungtasawk khoekto lensawkhaih oh na soe.

Aboenghaih Lok

²² Naukamzanawk, caa kang pat o ih hae sawk parai ai pongah hi thapaekhaih lok hae palungsawkhaih hoiah tahngai hanah kang pacae o.

²³ Aicae ih amnauk Timote loa thongim thung hoitoah tacawt boah tito kang thaihsak o han ka koeh. Na pha palang nahaeloa nangcae to angqum hanah kangzoh na-ah kanghoih han.

²⁴ Nangcae pahoikungnawk hoi Sithaw kaminawk boih khaeah kaicae mah ban kang sinh o tiah thui pae oah. Itali prae ih kaom naukamzanawk mah doeh nangcae to ban ang sinh o.

²⁵ Sithaw tahmenhaih loa nangcae boih khaeah oh na soe.