Hebrai 10 - Asang Khongso New Testament

¹ Judah kaminawk ih Tawklok loa kaom tangtang hmuennawk ih kacung hoi kahmaan kraang ah om ai; hmuen kahoih kangzo hankoi ih kraanghlip khueh ah ni a oh. A sak o noek ih batiah angbawnhaih to saning kruek a sak o tuektuek. Totibaloa Tawklok mah hibatih angbawnhaih ranghoiah kawbangmaw Sithaw khaeah kangzo kaminawk to kami kacung ah omsak thai tih?

² Sithaw ka bok kaminawk to a zaehaih ih to thoengcaisak ah om tangtang boah nahaeloa anihcae mah ka zae o tiah dawn o mak ai boah ueloa angbawnhaih ihnawk boih to toengh o tih boah.

³ To-e tangtang aloa saning kruek angbawnhaih sak ih mah kaminawk ih zaehaih to ni panoeksak rum.

⁴ Kawmawtiah maitawtae ih athii hoi ma-eh ih athii mah zaehaih to natuek doeh thoengcaisak thai ai.

⁵ Totiah oh pongah Khrih to longnui ah angzoh tom na-ah Sithaw khaeah, “Angbawnhaih hoi hmuen paek tahlang to na koeh ai, to-e kai han-iah takbum to na paroep zawh boah.

⁶ Bokting nuiah boii abum qoek ah paek ih hmaiqoeng angbawnhaih sak to na koeh ai, Zae thoengcaisak hanah angbawnhaih sak ih doeh na koeh ai.

⁷ Topongah Tawklok thungah kai ih kawng to tarik ih batiah kaimah, ‘Aw Sithaw, na koeh ih sak hanah kai hiah ka oh,’ ka naa,” tiah a thuih.

⁸ Hmaloe koek ah a thuih ih loa, “Angbawnhaih hoi hmuen paek ih doehsoe, bokting nuiah hmaiqoeng ih boiinawk doehsoe, zaehaih thoengcaisak hanah angbawnhaih ih doehsoe, na koeh ai moa na kawnh ai,” tiah a thuih. Hi angbawnhaih ihnawk boih hae Tawklok batih toengah sakah oh e hitiah a thuih toengtoeng.

⁹ Topacoengah anih mah, “Aw Sithaw, na koeh ih to sak hanah hiah ka oh,” tiah a thuih. Topongah angbawnhaih kangquemnawk boih to takhoe king moa Khrih angbawnhaih to a suek zuengah.

¹⁰ Kawmawtiah Sithaw mah saksak hanah a koeh ih to Jesuh Khrih mah a sak king pongah angmah ih takbum to vaitoah ka khawt koengah paekhaih ranghoiah aicae boih loa zaehaih ih hoitoah thoengcai ah oh boah.

¹¹ Judah qaihmanawk boih loa angmahcae ih tok to nithokkruek a sak o moa a sak o noek ih angbawnhaih to avaih paroeai a sak o; to-e ato angbawnhaih ih mah zaehaih to natuek doeh thoengcaisak thai ai.

¹² To-e Khrih loa zaehaih thoengcaisak hanah angbawnhaih vaito khueh angpaek moa ato loa dungzan hanih boah ni; topacoengah Sithaw bantang bangah to anghnut.

¹³ Toah to Sithaw mah angmah ih misanawk to a khokkoenghaih iah a suek airoek to a zing.

¹⁴ Totiah to vaito angbawnhaih hoiah zaehaih thoengcai ah kaom kaminawk loa dungzan ah kami katoeng ah a sak.

¹⁵ Topacoengah Cai Pakhra mah doeh panoek haih bom ih saksi to aicae khaeah amtuengsak. Hmaloe koek ah Cai Pakhra mah,

¹⁶ “Hi hae Angraeng mah thuih ih lok ni; hmabang tue ah anihcae hoiah ka sak hankoi paipi loa hitiah ni: Ka lokpaeknawk hae anihcae ih palungthin thungah ka suek pae moa anihcae poekhaih ih thungah ka tarik han,” tiah a thuih.

¹⁷ Topacoeng baeah anih mah, “Anihcae zaehaih ih hoi hoihhaih ai ihnawk to ka pakuem pae mak ai boah,” tiah a thuih let bae.

¹⁸ Topongah anihcae zaehaih ih to tahmen ah oh nahaeloa zaehaih thoengcai hanah angbawnhaih ih angaih mak ai boah.

Sithaw To Hnai O Si

¹⁹ Topongah naukamzanawk, Jesuh duekhaih ranghoiah Ahmuenh Kacai Koek thungah akunhaih thai ih loihhaih kacung to aicae mah tawnh o boah.

²⁰ Angmah ih kahnizang ranghoiah loklam kangtha, loklam kahing, to ang paong pae boah. Ato kahnizang loa angmah ih takbum to ni.

²¹ Aicae loa Sithaw ih im khenzawnkung qaihma ah oh o.

²² Topongah palungthin tang hoi taanghaih kangcak hoiah Sithaw to hnai o si. Zaehaih palungthin thoengcaisak ih hoi tui kathoeng hoiah pasaeh ih takbum hoiah Sithaw to hnai o si.

²³ Aicae mah oepdoenghaih tawnh o ih to kacak ah patawn o khrueng si, kawmawtiah a lok amaihhaih ka cungsakkung Sithaw to aicae mah taang o.

²⁴ Longto hoi longto ih taham to poek o si, longto hoi longto abomhaih hoiah amlunghaih hoi hmuen kahoih sakhaih to amtuengsak o si.

²⁵ Nawnto ah acuhaih tawnh o toemtoem ih hae kami thoemto mah toengh o ving batiah aicae mah toengh hmah siloa thapaek o aep si, kawmawtiah Angraeng Ni loa a hnaih hruet hruet boah pongah longto hoi longto thahmaehaih paek o aep aep si.

²⁶ Kawmawtiah loktang lok to ang panoeksak pacoengah panoek canlang hoiah zaehaih to sak o toengtoeng nahaeloa zaehaih thoengcaisak hanah angbawnhaih ih tidoeh om mak ai boah.

²⁷ Anihcae mah hnuk hanih ka om loa kangzo hankoi lokcaekhaih hoi Sithaw lok ka aek kaminawk to ka kangh king hankoi zit kaom hmai kamngaeh to boah ni.

²⁸ Ami doeh Mosi ih Tawklok ka pazui ai loa panoekkung saksi mi hnetto mi thumto mah a zae tiah a hnuk ih loa palungnathaih tidoeh om aiah paduek ah oh.

²⁹ Totiah om nahaeloa Sithaw Capa tiadoeh ka sah ai loa kawbangah maw sah tih? Zaehaih ka thoengcaisakkung Sithaw ih paipi thii to tiadoeh tamu ka suem ai to loa kawbangah maw sah tih? Cai Pakhra tahmenhaih to tamhnuih tamsak lok ah ka thuih kaminawk loa kawbangah maw sah tih? Tobatih kaminawk loa natanto kalen aep raekhaih to maw tongh o tih tito dawn o noek ah!

³⁰ Kawmawtiah, “Kaimah lu ka lak moa kaimah ka pathok han,” ti ih hoi, “Angraeng mah angmah ih kaminawk loa lokcaek tih,” tiah ka thuikung to amimaw tito aicae mah panoek o.

³¹ Kahing Sithaw ih ban thungah krak han hae zit oh parai!

³² Hnukbang ih ka laem tangcae ah kawbangah maw na oh o tito dawn o noek ah. Tona thuemah Sithaw aanghaih mah nangcae to angtoeh o pacoengah patang khanghaih katingai na tongh o, to-e ato raihaih mah nangcae to pazawk o ai.

³³ Nangcae loa avaih vaih ah mipui hma-ah pacaekhlaekhaih ih hoi raekraihaih to na tongh o moa avaih vaih aloa tobatih toeng pacaekhlaekhaih hoi raekraihaih ka tongh kaminawk to na pauep o haih bom toeng hanah coengcoe ah na oh o.

³⁴ Thongkrah kaminawk ih patang khanghaih to na pauep o haih bom moa nangcae ih vawnsainawk boih to ang lomh pae o na-ah na sunghaih ih to anghoehaih hoiah na pauep o thaih, kawmawtiah hi vawnsai pongdoeh kahoih kue hoi dungzan kangcak hankoi hmuen to na tawnh o tito na panoek o.

³⁵ Topongah misahoihhaih to tahmat o ving hmah, kawmawtiah na misahoihhaih ih mah kawnvang kalenpui to na hak o tih.

³⁶ Sithaw koehhaih sak han hoi a lok amaihhaih ih to hak thaih hanah palungsawkhaih hoiah om oah.

³⁷ Kawmawtiah Cabu Kacai mah, “Atue setta thungah kangzo hankoi Angmah to angzo tih, akraa mak ai.

³⁸ To-e kai ih kami katoengnawk mah taang o ueloa hing o tih; to-e ami doeh hnuk bangah kamlaem let kami loa ka kawnh mak ai,” tiah a thuih.

³⁹ Aicae loa hnuk bangah kamlaem moa kanghma kami ah om o ai. Taanghaih ka tawn hoi pahlonghaih ka hak kami ah ni oh o.