Hebrai 1 - Asang Khongso New Testament

A Capa Ranghoiah Sithaw Ih Lok

¹ Zanghnii ah loa Sithaw mah aicae saezanawk khaeah tahmanawk patohhaih ranghoiah avaih paroeai lam kalah kalah hoiah lok a thuih.

² To-e hi hnukkhuem koek ni bangah loa a Capa patohhaih ranghoiah aicae khaeah lok ang thuih. Ato Capa patohhaih ranghoiah Sithaw mah long hoi van to a sak moa hnukkhuem koek ah tiboih boih to tawnhsak king hanah Sithaw mah a qoih ih kami ni.

³ Anih loa Sithaw lensawkhaih hoiah amtueng moa, Sithaw coenghhaih ih tungkraang tangtang ah oh moa angmah hmuensak thaihaih ih lok hoiah long hoi van to angcaksak. Kaminawk zaehaih ih tahmenhaih hoi zaehaih to thoengsak boih pacoengah van ah Lensawk Koek Sithaw ih bantang ban ah to anghnut.

Sithaw Capa Kalen

⁴ Sithaw mah a Capa khaeah a paek ih ahmin loa vanminawk ih ahmin pongdoeh a len kue batiah a Capa loa vanminawk pongdoeh kalen kue ah a sak.

⁵ Kawmawtiah Sithaw mah kawbatih vanmi khaeah doeh: “Nang loa ka Capa ni; Vaihni ah nam Pa ah ka coengh boah,” tiah thui vaih ai. Tokhueh aiah Sithaw mah kawbatih vanmi kawng to doeh: “Kai loa anih ih Ampa ah om tih moa, anih loa kai ih Capa ah om tih,” tiah thui vaih ai.

⁶ To-e Sithaw mah a Calu to hi longnui ah patoeh han thuih na-ah anih mah: “Sithaw ih vanmi boiboih mah anih to bok o tih,” tiah a thuih.

⁷ To-e vanminawk kawng to Sithaw mah, “Sithaw mah angmah ih vanminawk to takhi ah a sak moa, angmah ih tamtoehnawk to loa hmai palai ah a sak,” tiah a thuih.

⁸ Topacoengah a Capa kawng loa Sithaw mah, “Aw Sithaw, na prae loa dungzan khoekto angcak tih! Nangmah ih kaminawk to toenghaih hoiah na uk tih.

⁹ Nang loa kahmaan to na koeh moa kahmaan ai to loa na hnukmaa. Topongah ni Sithaw, na Sithaw mah nang to ang qoih moa, nampuinawk khaeah a paek ih ponghdoeh kalen aep khangza anghoehaih to ang paek,” tiah a thuih.

¹⁰ Topacoengah Anih mah, “Angraeng nangmah tangsuekah long na sak moa, na ban hoiah van to doeh na sak.

¹¹ Atonawk loa anghma boih tih, to-e nang loa nang cak poe tih; atonawk boih loa kahni batiah prawn boih tih.

¹² Nangmah atonawk to laihaw kathuk batiah na pakhraep ueloa, kahni batiah anglaih o king tih. To-e nang loa nangmah toengroeng ah om toemoe ueloa, na hinghaih loa natuek doeh boeng mak ai,” tiah a thuih bae vop.

¹³ Sithaw mah angmah ih vanminawk khaeah, “Na misanawk to nangmah ih khok koenghaih ih hlimah na suek airoek loa Ka bantang bangah anghnu ah,” tiah thui vaih ai.

¹⁴ Totibaloa vanminawk loa kawbatih kami ah maw oh o? Anihcae loa Sithaw tok ka sahkung pakhra ah oh o moa pahlonghaih ka hak han kaminawk to abom hanah Sithaw mah patoeh ih kaminawk ni.