Galati 3 - Asang Khongso New Testament

Tawklok Tiaibaloa Taanghaih

¹ Galati kami kamthunawk! Mimah maw na anh o? Jesuh Khrih kraws nuiah a duekhaih to nangcae ih mik pongah hoihdak ta-ah amtueng to loa!

² Hi hmuen maeto hae na thui oah: Sithaw Pakhra na hak o ih hae Tawklok mah nguek ih na sakhaih o ih ranghoiah maw, tiaibaloa Tamthang kahoih na thaih o ih hoi na taang o ih pongah maw na hak o?

³ Kawbangmaw hitih khoekto namthu o thaih loa! Nangcae loa Sithaw ih Pakhra ranghoiah namtong o; aboeng nabangah loa nangmahcae tharahhaih ranghoiah boengsak han na koeh o maw?

⁴ Na hnuk na tongh o ih boiboih to loa azom ah maw om king tih boah? Azom ah loa om king mak ai roeroe!

⁵ Sithaw mah Kai Pakhra to ang paek moa nangcae salak thungah dawnrai hmuen sak ih to Tawklok mah nguek ih sak pongah maw, tiaibaloa tamthang kahoih na thaih o moa na taang o pongah maw?

⁶ Abraham kawng to dawn o noek ah. Cabu Kacai mah, “Abraham loa Sithaw to a taang moa a taanghaih pongah Sithaw mah kami katoeng ah talawk pae,” tiah tarik ih batiah a oh.

⁷ Topongah Abraham ih cadii tangtang loa taanghaih ka tawn kaminawk ni tihae na panoek o han oh.

⁸ Cabu Kacai mah, “Taanghaih ranghoiah Gentel kaminawk loa Sithaw mah kami katoeng ah talawk tih,” tiah a thuih sut boah. Topongah Cabu Kacai mah, “Nang ranghoiah caeng bum boih to Sithaw mah tahamhoihhaih paek tih,” tiah Abraham khaeah Tamthang Kahoih to a thuih.

⁹ Abraham mah a taang moa tahamhoihhaih a hak; tobatiah ka taang kami boiboih loa Abraham batih toengah tahamhoihhaih hak o tih.

¹⁰ Tawklok pazuihaih pongah kamhnga kaminawk loa tangoenghaih hlimah a hingh o. Kawmawtiah Cabu Kacai mah, “Ami doeh Tawklok cabu thungah tarik ih boiboih to ka pazui ai loa Sithaw tangoenghaih hlimah om ai!” tiah a thuih.

¹¹ Vaihi loa Cabu Kacai mah, “Taanghaih ranghoiah Sithaw mah kami katoeng ah tapom ih kami khueh mah ni hing tih,” tiah a thuih pongah Tawklok pazuihaih ranghoiah mita mah doeh Sithaw hma-ah toenghaih hnuh thai ai tihae kacai ah amtueng.

¹² Topongah Tawklok loa taanghaih hoiah angpaehhaih ih om ai. Cabu Kacai mah, “Ami doeh Tawklok mah nguek ih boiboih ka sah loa hing tih,” tiah a thuih ih batiah oh tangtang.

¹³ To-e Tawklok mah angzoh haih ih tangoenghaih thung hoitoah Khrih mah pahlong boah; kawmawtiah Cabu Kacai mah, “Ami doeh thing nuiah bangah ka om loa Sithaw ih tangoenghaih hlimah ka om ni,” tiah a thuih.

¹⁴ Hitiah sakhaih ih loa Jesuh Khrih ranghoiah Sithaw mah Abraham khaeah amaih ih tahamhoihhaih to Gentel kaminawk khaeah paek thai han hoi taanghaih ranghoiah Sithaw mah amaih tangcae ih Cai Pakhra to aicae mah hak o thaih hanah ni.

Tawklok hoi Amaihhaih

¹⁵ Naukamzanawk, nithokkruek na hnuk na tongh o tih thung hoitoah patahhaih maeto patoh ka patoh han; hmuen maemaeto kawng pongah kami longhnet palungdue hoi moa senthuh hoi na-ah mimah doeh paro thai ai moa thapthuih thai mak ai.

¹⁶ Vaihi loa Sithaw mah Abraham khae hoi a catawn khaeah lok amaihhaih ih to a sak. Cabu Kacai mah kami kapop thuih koehhaih iah, “catawnnawk,” tiah patoh ai, “catawn,” tiah khueh patoh moa a thuih koehhaih ih loa kami longto moa ato loa Khrih ni.

¹⁷ Ka thuih koehhaih ih loa Sithaw mah Abraham hoiah paipi to a sak moa ato to pazui hanah amaih. Saning cumvai palito pacoeng quithumto akraa pacoengah paek ih Tawklok mah ato paipi to phrae thai ai moa Sithaw lok amaihhaih ih to doeh phrae thai ai bae.

¹⁸ Kawmawtiah Sithaw ih langrae loa Tawklok pongah amhnga nahaeloa ato langrae loa angmah ih lok amaihhaih ih pongah amhnga mak ai. To-e Sithaw mah Abraham khaeah langrae a paekhaih ih loa a lok amaih boah pongah ni.

¹⁹ Totiah nahaeloa Tawklok mah amsakhaih ih loa timaw ka om? Tawklok loa sak pazaehaih ih to amtuengsak hanah paek ah oh moa ato Tawklok loa lok amaihhaih tangcae ah kaom Abraham ih catawn tacawt ai roekto thung ka om poe hanah paek ih ni. Tawklok loa vanminawk mah paek patoeng iah oh moa vanmi hoi kami salakah laicae longto a oh.

²⁰ To-e kami longto khueh toksak na-ah loa laicae to aloe ai boah; Sithaw loa maeto khueh ni a oh.

Tawklok Ih Patoephaih

²¹ Tawklok loa Sithaw lok amaihhaih ih hoiah misa ah oh hoi maw? Om hoi ai roeroe! Kawmawtiah kaminawk mah hinghaih ka omsak thai tawklok to hak nahaeloa ato tawklok pazuihaih ranghoiah Sithaw hma-ah kami katoeng ah om o thai king tih.

²² To-e Cabu Kacai mah longnui bum boih hae zaehaih tharahhaih thungah ni a oh tiah a thuih; topongah Jesuh Khrih taanghaih pongah takung kangsut ah kaom amaih ih langrae loa ka taang kaminawk khaeah paek ah oh.

²³ To-e taanghaih ih atue phak ai nahlanah loa ahi taanghaih ih amtueng airoek Tawklok mah thongkrah batiah aicae hae ang paung.

²⁴ Topongah taanghaih ranghoiah aicae mah Sithaw hma-ah kami katoeng ah oh o thai hanah Khrih angzoh airoekto Tawklok mah aicae hae ang uk.

²⁵ Vaihi loa taanghaih ih hae ang phak boah pongah Tawklok mah aicae hae na uk ai boah.

²⁶ Jesuh Khrih hoiah angpaehhaih ranghoiah nangcae boih mah Sithaw ca ah na ohhaih o ih loa taanghaih ranghoiah ni.

²⁷ Khrih hoiah angpaehhaih thungah baptisma to na hak o boah moa vaihi loa Khrih tuinuenh to nanghlong o.

²⁸ Topongah Judah kami hoi Gentel kami salakah doehsoe, misong hoi kaloih kami salakah doehsoe, nongpa hoi nongpui salakah doehsoe lahhaih ih om ai boah; Khrih Jesuh hoiah angpaehhaih ranghoiah maeto ah na oh o boih boah.

²⁹ Nangcae loa Khrih iah na oh o nahaeloa Abraham ih catawn ah na oh o moa Sithaw mah amaih tangcae ih qawk to na toep o tih.